ڕژێمو تورکی ٩ گەنجێ پاوەیش دیپۆرتێ سوریای کەردێ

ڕژێمو تورکی ٩ گەنجێ شارو پاوەیش تەسلیم بە چەتەکێ جەبهەت ئەل نوسرەی جە سوریا کەردێ و دژ بە ئانەیە جە تاران خانەوادێ گەنجەکان جە وەردەمو سەفارەتو تورکیایەنە کۆبیێوە و ناڕەزایەتیشان نیشانەدا.

کاربەدەستێ ڕژێمو تورکیای، نزیک بە ٣ مانگێ جەی وەڵتەر، ٩ گەنجێ شارو پاوەو هەرێمو هەورامانیشان دەستگیرێ کەردێبێنێ. تەمامیای مافو ئەوەمەنی فەرمی کریان بە بەهانەو دەستگیرکەردەکەی. 
بەڵام ئاشکرابییەن؛ گەنجە پاوەیەکێ ویزاو ٣ مانگێشان بییەن و جە دمای تەمامیایش پەی تازەکەدەیش سەردای لایەنە پەیوەندیدارەکانشان کەردەن. کەچی جیاتی تازەکەردەیۆ ویزاکانشان، دەستگیرێ کریێنێ و دەرەنجام جە دمای ١٠٠ ڕوێ زیندانیکەردەیشان، ڕژێمو تورکی هەر ٩ گەنجەکێش دیپۆرتێ سوریای کەردێنێ و جە ئاگە تەسلیم بە چەتەکێ جەبهەت ئەل نوسرەی کریێنێ.
گەنجەکێ تا ئیسە چارەنویسشان نادیارەن و سوراغشان نییەن و ئانەیچە بییەن بە مایەو نیگەرانی کەسوکاریشان.
دژ بە ئانەیە جە تاران-و پایتەختو ئێرانی، خانەوادێ ٩ گەنجەکەی جە وەردەمو سەفارەتو تورکیایەنە کۆبیێوە و ناڕەزایەتیشان نیشانەدا.
جە ناڕەزایەتیەکەنە، خانەوادەکێ داواشان جە ڕژێمو تورکی کەرد: بە زوویی چارەنویسو ڕۆڵەکانشان ئاشکرا بکەرۆنە.
خانەوادەکێ باسشان جە ئانەیە کەردەن: ڕۆڵەکێشان بەڕەسمی پەی هەرمانبەری شیێنێ تورکیا و هیچ کارێوی ناقانونیشان نەکەردەن و ڕژێمو تورکی جە سڵامەتی و سەرنوشتیشان وەرپرسیارەن و پنەوازەن هەوڵ پەی ئازادکەردەیشان و ئەوەگێڵنایشان پەی ئێرانی بڎۆنە.
یاگۍ سەرنجێن، کە کاربەدەسێ سەفارەتو تورکیا جە تاران هیچ گۆششان بە ناڕەزایەتیەکەی نەڎا و تەنانەت ئامادێ نەبیێ چەمشان بە کەسوکارو ٩ گەنجەکەی بگنۆنە و یاداشتو ناڕەزایی و داواکاریەکەیشان چنە هۆربگێرانێ.