ماوەو زیاڎ جە ٢٥ ساڵان بە پیلانگێڵنیێوە مېیاننەتەوەییۆ ڕابەرو گەلوو کورڎی عەبدوڵا ئۆجالان گیریا و وزیا زیڼانو ئیمراڵییوە، جە ساڵەو ٢٠١٩یۆ بە سەختکەرڎەی گۆشەگیری هیچ زانیاریێوە جە ئیمراڵیۆ نیا، جە دژو گۆشەگیری سەختو ئیمراڵی، ژەنا ئەرەنیشتۍ کانتۆنو جزیرەی ناڕەزایی ۋێشا بەربڕی و جە ڕاو ئاژانسەکەیماوە پەیامو 'ئازاڎیی ڕابەریما گەرەکا'یشا دا.

'پېسە ژەنێوە عەرەبۍ گۆشەگیری ئیمراڵی شەرمەزار مکەرو'

لەیلا زخێنە ئەرەنیشتۍ ناوچەو تل براکی ئاماژەش بە گرنگی ئەرەکۊشای هامبەش و گرڎوو پێکئامایەکا سەرنیشتی و ۋەرکۆتوو سووریای جە دژوو گۆشەگیری کەرڎ و واتش: "پېسە ژەنێوە عەرەبۍ گۆشەگیری سەختو سەرو ڕابەر ئاپۆی شەرمەزار مکەرو. بە گرڎو پێکئامایەکا سەرنیشتوو ۋەرکۊتوو سوریای تا ماڕای گۆشەگیری خەبات مکەرمۍ. با دوژمن عال ئانەی بزانۆ تا دما قەترەو ۋنێما جە مېڎانەکانە کۆششما بەرزتەر مکەرمۍ. پەی ئازاڎیی جەستەی ڕابەر ئاپۆی دەنگما هۊربڕمۍ."

'کات کاتو ئازاڎیی ڕابەر ئاپۆیا'

لەیلا مەۆ جە شارو قامیشلۆیۆ ناڕەزایەتیش جە دژو گۆشەگیری ئیمراڵی بەربڕی و واتش: "گۆشەگیری سەرو ڕابەریما ڕەڎمکەرووە و هەڵوێسو ۋێما نیشانەو تەمامو جیهانی مڎەیمۍ. پەنەوازا بە بەرزکەرڎەیۆ ئەرەکۊشایما دەنگما بیاونمۍ بە تەمامو ڕێکوزیا مېیاننەتەوەییەکاو مافەکا مرۆڤی و ئی گۆشەگیرییە لابریۆ. ڕابەر ئاپۆ پەی ئاشتی و گلێرگەو دیموکراتیکی ئەرەکۆشا، کات کاتو ئازاڎیی ڕابەر ئاپۆیا."

'فکرەکۍ ڕابەر ئاپۆی دلۍ گەلانە ئازاڎێنۍ"

فاتمە حەمە شارو دێرکینە ئاماژەش پانەیە کەرڎ کە تا ئازاڎیی ڕابەرو گەلوو کورڎی عەبدوڵا ئۆجالانی جە ئەرەکۊشاینە مبا و پی جۆرە بەردەوامە بیە جە قسەکاش: "ڕابەر ئاپۆ سەرو بنەماو ئازاڎیی گەلا پەرەش بە فکرەکاو ۋێش دا، هەر پۊکەی ڕۆ دماو ڕۆی دلۍ گەلا ئازاڎینە وەڵا مبۆوە. ڕاسا جە ڕوو جەستەییۆ ئینا گۆشەگیرینە، بەڵام فکرەکێش ئینۍ دلۍ ئێمەنەو ئازاڎا. گۆشەگیری ئیمراڵی شەرمەزار مکەرمۍ و بەردەوامۍ بیمۍ تا مسۆگەرکەرڎەی ئازاڎیی ڕابەریما."