ئینایمۍ مانگۆو ڕوبەڕوبیەیۆ تنوتیژی دژ بە ژەنانە و جە سەروبەڼو ٢٥و تشرینو دووەمینە، ژەنی دژو زیاڎبیەی تنوتیژی ئینۍ ۋۍ ڕێکوستەینە و بە دروشمۆو 'ژەنی ژیۋای ئازادی'وە ئینۍ ئەرەکۆشاینە. جە بارەو ٢٥و تشرینو دووەمیوە ژەناو ئامەدی قسێشا کەرڎۍ و واتشا: " مشۆم هۆشمەڼی ژەنا دلۍ گلێرگەینە قەوەت بکریۆ."

مشیۆم کار بە پەیماننامەو ئەستەنبوڵی بکریۆ'

ژەنێ بەنامێ حەسرەت یوروڵمازێوە باسش چانەیە کەرد سزا نەڎای کەسانێوە تنوتیژی ڕا وەربەرەو ئەنجامدای تنوتیژینە مکەرۆوە و واتش: "مشۆم دەمودەس پەیماننامەو ئەستەنبوڵی جابەجێکریۆنە، چونکی پارێزنەرو مافو ژەنێ و زاڕۆڵان. تورکیا ئی پەیمانۍ وزۆ پەشتەو گۆشا، پۆکەی مشۆم ژەنی کۆشش پەی جابەجێکەردەی ئا پەیمانۍ بکەرا. بەتایبەت مشۆم ناوەڼو پارێزنای ژەنا ئەرەمەرزیۆ.

دلۍ گلێرگەو پیا سالاریینە مژیومۍ پۆکەی ڕوو وە ڕوو تنوتیژی بیمێوە، ۋەرو ئانەی مشۆم هەنگام بە هەنگام ڕا چی ئاوەزیەتەیە بگێرمۍ و پەرە بە هۆشمەڼی ژەنا بڎەیمۍ."

'چی وڵاتەنە دیکتاتۆرێیەت هەن، کەس نمەتاوۆ قسێ بکەرۆنە'

گولای ئاکداغە ئاشکراش کەرد بنەڕەتو تنوتیژی دژ بە ژەنا بە پرۆژە هەرمانەش سەر مکریۆنە و ئینەش وات: "پەشتەو ئی هەرماناوە هێزێ گەورە هەن. جەلێوە گوایە ماچا ژەنی پارێزنمێ، جە لێوە تەرۆ هاندای ئاژێوە قەوەتو تنوتیژی هەن. جە ئاژێوە چامنەنە کە گوایە پارێزگاری جە ئاژەو ژەنا مکریۆ، بەڵام جە واقعێنە زەرەرۍ فرە جە ژەنا مکریۆنە. مشۆم ئیتر چارەسەریێ پەی ئینەیە بێزمێ. کە فرەیچ ئاسانا بەڵام مەکەرمێش. واچمۍ با ئەوەکۆڵیای جە ئاژەو تنوتیژی دژ بە ژەنا بکەرمێنە، بەڵام مەکەرمێش. پەی چێشی؟ چونکی  پەشتەو ئانەیۆ پرۆژێوە هەن. هەوڵمڎا وڵاتی جە دلێینەنە دلێنە بەرا و بە تەمامەتی فاڕاش. داخەم مەشۆ چارۆنە تورکیا دیکتاتۆرێوە بەرۆش ڕاوە و حیچ کەس خاوەنو مافو قسەکەردەیش نییا. وەرو ئانەی گرڎ هێزێشا ئینا دەسەنە مافو ژەنا پاشێل مکریۆ."

'ڕا جە ئەنجامدای تنوتیژی دژ بە ژەنا نمەگیریۆ'

ئیلنکور چۆبانە ئاماژەش پانەیەدا تنوتیژی و کوشتەی دژو ژەنا یاگێ تەرسێمانە و واتش: "گرد کاتێ ئینایمێ تەرسەو ئانەی کە سەرمارەبێ. مشۆم جە تەمەنێ کەمەنە زاڕۆڵەکاما بە عالی پەروەردە بکەرمێ. کاتێ حەقەتینەکا نیشانەو زاڕۆڵەکاما مڎەیمێ، ئاڼنەی بتاومێنە ڕا جە ڕووەدای چێوی خراپی مکەرمێ. هەرکاتێ تەلەفزیۆنێنە تەماشەو کوشتەو ژەنێ مکەرمێنە، بەڕاسی ئا ئاژە فرە ترسناکا."

خەیرییە سەری ئاماژەش پانەیەدا کە چارۆنە تنوتیژی دژ بە ژەنێ فرەتەر بییەن و واتش: "ژەنی دلێ گلێرکەینە پێسەو کەسێ لاوازۍ تەماشە مکریۆ. مشۆم ژەنی دژو ئی ئاوەزیەتەیە مرداوە و کۆشش بکەرا. پی جۆرە قەڎر جە ژەنا گیریۆنە. زیاڎ بییەی تنوتیژی دژ بە ژەنا دەرەنجامو ئانەینە کە کەمتەرین سزاو ئەنجامدای تنوتیژی دریۆنە، پۆکەی تا مۍ تنوتیژی زیاتەر بۆنە."