مەنتێقەو خانەسۊروو شەنگالینە ژەناو ئێزدی بۊنەو ساڵیاڎوو سەرەوردای 'ژەنی، ژیوای، ئازاڎی'یوە جە وەرکەوتوو کورڎسانی و ئێراننە ئەرەیاوناێوەشا وەڵا کەرڎۊ داواشا کەرڎە دمایی بە گرڎوو نۊعەکاو ئەرەگیری، کۊیلەداری و فاشیزمی بۍ.
جمیەروو ئازاڎیی ژەناو ئێزدی (تاژێ) جە ڕاو کۊنفڕانسێوە ڕۊنامەوانییوە و بە ئەرەیاوناێوە ساڵیاڎوو سەرەوردای ' ژەنی، ژیوای، ئازاڎی'یشا وەرکەوتوو کورڎسانی و ئێراننە مەبارەک کەرد و واتشا، کە ئادۍ پێسە ژەناو ئێزدی کە جە فەرمانەو ٧٤یەمینینە نەجاتشا بییەن، گرڎ وەختۍ پەشتیوانی جە کۊشیای ژەنا و گەلا پەی ئازاڎی کەرا.
بە نامۍ جمیەروو ئازاڎیی ژەناو ئێزدی (تاژێ)ێوە، ئەندامەو ڕاوەبەرایەتیی تاژۍ نیام بەدەلە ئەرەیاوناکەیش واناوە و جە کەسایەتیی ژینا ئەمینیێنە سەرجەموو گەشمەرداو سەرەوردای و ئا ژەنا کە کۊشیاینە پەی ئازاڎیی کوشیێنۍ ویرێش ئارڎێوە و بە بۊنەو ساڵیاڎوو سەرەوردایەکەو وەرکەوتوو کورڎسانی و ئێرانیوە مەبارەکباییش کەرد.
نیام بەدەلە درێژەو قسەکاشنە ئاماژەش پانەیە کەرد، کە ژەنۍ گرڎ یاگێوە دنیێنە ڕووبەڕووۍ هجوومی باوە واتش، "پێسە ژەناو ئێزدی، کە چی فەرمانێنە ڕووبەڕووۍ کوشتەی، ورەتەی و بێسەروشۊنکەرڎەی بیەیمێوە، کۊشیایما دژوو ئا سیستمینە، کە ژەنی کوشۊ. پانیشتوو کورڎسانیچنە ئاخینیەی گولانۍ کوشیا، ئانەیچ پەیما فەرمانێوە بۍ،کوژرا، حەرژەنیوە کە کوشییۊ، ژیواێوە دلێنە بریۊ، وەلۍ ئێمە پێسە ژەنا مشۊم کوشیای حەرژەنێوە کەرمۍ بە پاڵنەروو کۊشیایما".
ئاخرۊ داوا جە سەرجەموو ژەناو دنیۍ کریا، کە وێشا بە ساعیبوو سەرەوردای " ژەنی، ژیوای، ئازاڎی" بزانا و دژوو گرڎوو نۊعە کۊیلایەتی، ئەرەگیری و فاشیزمی مرداوە."
س.ز
