کەژەکە جە یۋەم ساڵوەگېڵ و گەشمەرڎەبیەو ژینا ئەمینیېنە ئەرەیاۋناش،"مشۊم درووشمەو ژەنۍ، ژیای، ئازاڎیی تەنیا جە وەختوو ۋېنیشانداکانە نە وچیۊوە، پەنەوازەن بۊ بە سەرمەشق و ژیۋای، کۊشیای و بە ڕېکوستە بیەی".
دەسەو ڕاوەبەری کەژەکەی جە یۋەم ساڵوەگېڵ و گەشمەرڎەبیەی ژینا ئەمینیېنە ئەرەیاۋنېوەش ۋەڵا کەرڎۊ داواش جە گرڎ لایۍ بەتایبەتی ژەنا کەرڎ مجیارە مېڎانەکا. کەژەکە داوایچش جە جمیەروو ژەنا کەرڎ کە ١٦ و ئەیلولی کەرا بە ڕۊو یۊگېرتەی و گوڕدای بە کۊشیای ئازاڎیی ژەنۍ.
جە ئەرەیاۋناکەو کەژەکەینە ئامان:
''ساڵەی ۋیەرڎۍ ئی وەختە ڕژېموو ئېرانی ژینا ئەمینیەش گەشمەرڎۍ کەرڎە. بە ڕېزوو پنەزانایۊ ۋەردەم و یاڎوو ژېنا ئەمینیۍ و تەماموو گەشمەرڎا ناڕەزاییەکانە کە جە جاڎەکانە گیانشا بەخشا یاخوڎ دریۍ قەنارە، سەرەو ڕېزی منامنمېرە. جارېوەتەر وەعد مڎەیمۍ کە ئېمە کۊشیایما جە دژوو تنووتیژی دۊڵەتوو پیاسالاری بە پاگیریوە گەشتەروو بەگورتەر کەرمۍ''.
بنەڕەتوو جمهوری ئېرانی سەروو دلېنەبەرڎەو ئیراڎەو ژەنان. چەمکەکۍ 'ئەخلاقی'ی و 'ناموسی' پېسە چەکېوە بەکارمەیا پۍ ئانەی ژەنا کەرا بە کۊیلەو پیایا و دۊڵەتی، بەپاو ۋېش شېوەشا پنە بڎۊ، حەر نەبۊ پېسە بنەمېوە ئانەی سەروو ژەنارە سەپنۊ. ژینا ئەمینیە کە گەرەکش بۍ جە بارەو جەستەو قژا ۋېشۊ ئیراڎەو ۋېش نیشانە بڎۊ، پاسەوانەکۍ ئەخلاقی جمهوری ئېرانی شەرتەو' یان تۊ بەپاو باڵادەسی دۊڵەت-پیای جمیۊ یاخوڎ گیان و ۋېتش سەر منیەیرە'یشا وست ۋەروو دەمیش و کوشتەشا. ژینا ئەمینییە ئا کۊیلایەتیەی کە جە ئېرانەنە سەروو ژەنا کورڎی، فارس، ئازەری، بەلوچی و ئەویشای تەریرە مسەپیۊ، قبوڵ نەکەرڎ، ۋېڕاگریش کەرڎوو پا مەڵامەتۊ گەشمەرڎېشا کەرڎە.
ئی مدرامانە دەرئەنجاموو کۊشیای ٣٠ ساڵان
ئی مدرامانە پا ئازایەتیەو فەلسەفەو"ژەنی، ژیای، ئازاڎیی" کۊشیاو ئېمەی ژەناش جە کورڎسانەنە کە زیاڎ جە ٣٠ ساڵان ئامان ئاراوە. بەسوپا بیەو ژەنا، ئایدۊلۊژیاو ژەنا، پارتی بیەی ژەنا و سیستمی کۊنفیدراڵی ژەنا، کۊشیای ئېمەی ژەنا کە بە پېرسپېکتیڤی ژنۊلۊژی گۊرە بۊ، کاریگەریەکېش ڕۊ دماو ڕۊی زیاتەرۍ با و ۋەڵۍ باوە. ئا سەرهۊردایۍ دماو گەشمەرڎەبیەو ژینۍ جە ئېران و گرڎوو جەهانینە بەدرووشمەو "ژەنی، ژیای، ئازاڎیی" لۋۍ ڕاوە، ئانەشا وست ڕووە کە ئا وەڵۍ کۊتەیەی جە چارەک و یۋەم و سەڎەو ٢١ینە بەپاو ژەنۍ تەوەرۍ چنە کاریگەرۍ و گەردونیېنۍ. کۊشیای ئازاڎیی ژەنا جە کورڎسانەنە ئامان ئاراوە، سەروو ئەساس و فەلسەفەو"ژەنی، ژیای، ئازاڎیی" مەرزیانەرەو وەڵۍ کۊتەن. کۊشیایما کە دەوروو ئا درووشمېرە گەشتەر بیەن، جە کورڎسان، ۋەرکەوتوو میامینی و گرڎوو جەهانی سەروو بنەماکا پەرەسانای بە پاو ژەنۍ تەوەری چنڎە یەکلایی کەرەوە بۊ. ئا سەرهۊردایۍ بە مەڵامەتوو گەشمەرڎەبیەو ژینېوە لۋۍ ڕاوە، پەنەوازی ژەنا و گلېرگەی بە ئازاڎیی، یەکسانی و داڎپەروەریشا بەشېۋېوە فرە عال وست وەروچەما. جارېوەتەر سەلەمناش کە ژەنی سەرمەشقۍ کۊشیای ئازاڎیی، یەکسانی داڎپەروەرینۍ.
چەقی چارەسەری ڕیشەیی، کۊشیای ئازاڎیی ژەنان
جە ئېران و ۋڵاتا تەریچ ژەنا، پیایا، بەتایبەتی ژەنۍ گەنجۍ، پېکئاماکۍ تەرۍ گلېرگەی کە بە درووشمەو "ژەنۍ، ژیای، ئازاڎیی"مجیېرە دلۍ جاڎەکا، جە هەمان وەختەنە بەرشا وست کە چەق و ناوەنڎی چارەسەری ڕیشەیی، کۊشیای ئازاڎیی ژەنان. ئەگەر باجەکەش قورسیچ بۊ، هاوارشا کەرڎ کە ژیۋای بەبۍ ژەنۍ، ئازاڎیی بەبۍ ژەنۍ، ژیۋای بەبۍ ئازاڎیی مەبۊ. پېسە چنی سەڎەو ٢١ی هۊرچەرخنایۍ تاریخیا، کۊشیای پۍ ئازاڎیی ژەنایچ بیەن بە هۊرچەرخنایۍ گرنگ. مرڎایۊ ۋەران ۋەر بە کۊنەپەرسی و دۊڵەت پەرسی کلاسیکی ئېرانی، قاڵبە هامچەرخەکۍ سیستمی سەرمایەداری، بە ۋاتەی"ژەنۍ، ژیای، ئازاڎیی"، یاڎەوەری ئازاڎیی گلېرگەی و ژەنا زینڎە بۊوە و گنۊ ۋېش. بوارېوەتەری گرنگیچ ئانەن کە پیۍ ڕاسی سیستمی پیاسالاریشا قبوڵ نەکەرڎ، توڕەیشا ۋەران ۋەر نیشانە داو بە ئامای سەروو جاڎەی کاروەدایشا دژ ئەرمانا. ڕاسیېوە پیایا کە چنی ژەنا بەشڎاروو سەرهۊرداکا با، ڕەنجوو مانیایشا کېشا، گەشمەرڎۍ و زامڎارۍ با و قوربانی مڎا. چی سەرهۊرداینە بەرکۊت کە چنی کۊشیای ئازاڎیی ژەنا، بەشېوە جە پیایایچ سەروو بنەمایۍ دیموکراتیکی ملا دلۍ پڕۊسېوە فاڕیایۊ ، ئینەیچ ۋەڵېکۊتەیۍ گرنگا جە هۊرچەرخنای کۊمەڵایەتینە.
مدرامانوو ژینا ئەمینیۍ و مدرامانوو ملۋېنان کەسا کە خۊتانکەرڎەیشا چی مدرامانەیەکەرڎ، نیشانۍ سەرجەنۊ بنیاڎ نیایۊ ژیۋاین سەروو بنەماو یەکسانی و ئازاڎیی ژەنا. مدرامان جە جاڎەکانە و ۋۍ ڕېکوستەی کەرڎەی جە جاڎەکانەو بنیاڎ نیای ژیۋایۍ ئازاڎیی بە دەسوو ۋېشا، بۊ بە ماناڎارتەرین و ۋەردەوام تەرین جواب پۍ ئا گەشمەرڎەبیەیە و پۍ ئا مدرامانا کە ئامۍ ئاراوە. ژەنېوە ڕېکوستە نەکریۍ، گلېرگېوەڕېکوستە نەکریا، ۋەروودەموو دۊڵەتی و پیا باڵا دەسەکانە، جە پارېزنای مەحروومېنۍ. ئارۊ جە گرڎوو دنیېنە بەهەزاران کەسۍ کوشیا، دەسدرېژی کریۊ سەرشا، ئەنجام و ڕەنجوو مانیایشا وریۊ و بە ترسناکتەرین شېوە جەنگی تایبەتیشا ۋەران ۋەر کریۊ. جواب و ئېمە پۍ ئینیشا گرڎیی گەشەپنەدای وشیاری، ڕېکوستەی و کۊشیای ژەنان.
مشۊم ئەکادیمی، گرووپ، ئەنجوومەن، ئابوری ژەنا و ڕېکوزیا جۊربەجۊرەکا ژەنا، بنیاڎ بنیا پۍ ئانەی ژەنا یۊ بەیۊ فېرۍ باو جەوهەروو ۋېشا پارېزنا بە بنیاڎنیای سیستمی ژیۋای دیموکراتیکی و وەڵېش وزا. ئەگەرئېمەی ژەنا ۋېما بەڕېکوستەی نەکەرمۍ، مەتاومۍ سیستەم ۋەشکەرمۍ، ئا وەختە تنووتیژی پیای بەداروو دەوڵەتی پېسە سیستمېوە زیاتەر جە جارانی ۋېش بە ڕېکوستەی کەرۊ و گرڎ وەختۍ هجووم کەرۊ و بەشېوەی جیا جیا درېژە بە کۊکوشی مڎۊ.
حەرپۊکەی مەبۊ درووشمەو"ژەنۍ، ژیای، ئازاڎیی" تەنیا پېسە دروشمېوە جە چالاکیەکانە بەرزە کریۊوە، بەڵکم مشۊم شۆڕەبۊوە پۍ دلۍ ژیۋای، کۊشیای و ۋۍ بەڕېکوستە کەرڎەی. ئەفسون و ئی دروشمۍ ئینا چېگەنە. جە یۋەمین ساڵوەگېڵ و گەشمەرڎەبیەو ژینا ئەمینیېنە، داوا جە گرڎوو ئا کەسا کەرمۍ کە گەرەکشانە ئازاڎ بژیۋا، بەتایبەتی ژەنا، مجیارە دلۍ جاڎەکاو ۋېنیشاندای سازکەرا. بەتایبەتی ژەنا گەنجی چی ساڵوەگېڵەنە مجیارە دلۍ جاڎەکاو خۊتانکەرڎەی چی ئاخېزیە کەرا. سەروو ئی ئەساسیە داوا جە گرڎ کەسۍ و جمیەرەکا ژەنا کەرمۍ کە ڕۊوو ١٦ و ئەیلولی ڕۊو گەشمەرڎەبیەو ژینا ئەمینیۍ کەرانۍ بە ڕۊو گەشتەرکەرڎەی کۊشیای ئازاڎیی ژەناو یەک ڕیزی.
