ژینا ئەمینییە، ئا کناچە کورڎۍ ساڵەی ویەرڎۍ پۊلیسوو ئەخلاقوو تارانی بە ئەشکەنجە کوشتە و هەرپاسە جووڵیایۊ 'ژەنی، ژیوای، ئازاڎی' پەی ورگێرتەی خەڵاتوو ساخارۊڤی کاندید کریا، کە بەرزتەرین خەڵاتوو یۊبییەی ئەورووپاین بواروو مافەکاو ئینسانینە.
پەرلەمانوو ئەورووپای، پارتی گەلوو ڕاسگێروو ئەورووپای، سۊسیال دیموکراتەکۍ و فراکسیۊنوو ئەورووپای تازەی، ئەرەیاوناشا کە ژینا ئەمینی-یە و شۊڕشوو "ژەنی، ژیوای، ئازاڎی" پەی داکۊکی جە ئازاڎی ڕابەروستەی پێسە کاندیدۍ ورگێرتەی خەڵاتوو ساخارۊفی وزیێنۍ وەروو باسی.
ژینا ئەمینی-یە کە ١٦و ئەیلوولوو ٢٠٢٠ بە بەهانۍ ئانەیۊ 'قژێش بەرۊ بێنێ' لاو پۊلیسوو بە نام ئەخلاقیوە تاراننە کوشیا و کارڎایۊیچشنە سەرەورڎاێوە بێهامتا دەسش پەنە کەرد.
بریاوەو خەڵاتوو ساخارۊڤی مانگەو تشرینوو یوەمینە ئەرەیاونییۊ و بە مەراسیمێوە جە کۊبییەیۊ کۊمەڵەی گردینوو پەرلەمانوو ئەورووپاینە، مانگەو کانوونوو دووەمینە ستراسبورگنە خەڵاتەکەش پەنە بەخشییۊ.
پەی ورگێرتەی خەڵاتەکەی ئێساڵ چندین کەسایەتیۍ و جووڵیایۊیۍ داکۊکیکارۍ جە مافەکاو ئینسانی و مافوو ژەنا و ئازاڎیی ڕابەروستەی کاندیدۍ کریێنۍ.
خەڵاتوو ساخارۊڤی ساڵەو ١٩٨٨وە مدریۊ پا کەسا کە وەرگێریی جە ئازاڎیی ڕابەروستەی و مافەکاو ئینسانی کەرا، نامەکێچش جە زاناو بواروو فیزیای ئاندرەی ساخارۊڤیوە، ورگیریێنە، کە کەسایەتیێوە سەرەکیی وەرهەڵێسکاروو سەرڎەموو یۊبییەی سۊڤیەتی بۍ.
س.ز
