زینڎانیا دۊزوو پەکەکەی و پاژکی ئا ۋەرپەرسۍ پەدەکەیشا شەرمەسار کەرڎۍ کە هامکاری هجومەکا دۊڵەتوو ترکی ئەرەگیری مکەرا و با بە هامبەش و ئا هجوما. هاموەخت داواشا جە گەلوو پانیشتوو کورڎسانی کەرڎ کە ۋەران ۋەرو پەدەکەی هةڵۋېس برمانا.
بە نوېنەرایەتی جە زینڎانیا پەکەکەی و پاژکی دەنیز کایا ئەرەیاۋنېوەش ۋەڵا کەرڎۊ و چنەشەنە باسش چانەی کەرڎەن،"چی قۊناغەو کۊشیای شکۊمەنڎانەو ژیۋای ئازاڎیی کە جە لایەن و ڕابەرایەتیما و جمیەرەکەیما و گەلەکەیماوە دژ بە ئەرەگیرا ترکی ملۊڕاوە، ۋەرپەرسا پەدەکەی جیای ئانەی دژ پا هجوومە قڕکەریە کلتوری و جەستەییا کە بەکۊلۊنیالیزمی دۊڵەتوو ترکی و ئەمریکای کە جە پیلانگېڵی میان نەتەوەیینە دەورۍ سەرمەشقشا ۋینا، هەڵوېس گېرانە ۋەر، با بە هامبەشوو ئا هجووما. ئېمە ئا ۋەرپەرسا پەدەکەی کە با بە هامبەشۍ هجومەکا شەرمەسارېشا کەرمۍ و ئاگاڎیشا پنە مڎەیمۍ".
جە درېژەو ئەرەیاۋناکەینە ئامان،"جە دماین نموونەنە شەوەی ۋیەرڎۍ ٢٠٠ ترۊمبېلۍ کە چەکی قورس و زرېپۊششا دلېنە بیەن جە ڕاو دەشتەو حەیاتی و دەشتەو هەریریۊ هېزی سەروازیشا پۍ سیدەکانی جە مېڎانوو برادۊستی فاڕانۊ. ئا ئاژە بە حیچ جۊرۍ شیاوو قبوڵ کەرڎەی نیا. مشۊم ئا هېزە ئەرەگیرۍ جە مېڎانەکا گەریلاینە بەرکریا، داواکەرمۍ کە چا هەڵۋېسەیە پەشیمانۍ باوە، کە خزمەت بە چەتەکا ئاکەپەو مەهەپەی کەرۊ. ۋەروو ئانەی ئاکەپەو مەهەپەی فاشیست جە دژوو ڕابەرایەتیما، جمیەری و گەلەکەیما و کۊشیای ئازاڎیی گەلەکەیما قەسەم و دلېنەبەرڎەیش واردەن".
گەلەکەما جە پانیشت بەتایبەتی و گرڎوو گەلەکەیما مشۊم بزانا کە وەزیروو بەروو دۊڵەتوو ترکی هاکان فیدان، کە جە ٢٤ و ئابینە چنی ۋەرپەرسا پەدەکەی دیڎارش ئەنجام دا، وەختۍ ئا چەتا ڕەوانەو مېڎانەکا گەریلای کەرۊ، بەرگنۊ کە سەروو چ ئەساسۍ ڕېکۍ کۊتېنۍ. جیای ئانەی ڕېز جە کۊشیای و مدرامان و گەریلاکا ئازاڎیی کورڎسانی گېرا کە جە ۋەران ۋەروو بۊمبی و چەکی قەڎەغەکریاینە، سەرەڕاو ئانەی جە ئاستی میان نەتەوەینە قەڎەغەکریېنۍ، دۊڵەتوو ترکی بەکارشا مەرۊ، ئاڎۍ دەوروو جاسوسی و سیخوڕی گېڵنا و حۊڵ مڎا گەریلاکا پاکتاو کەرا. سەرسەعب و ئارۊیچ جە سەعات ٠٤:٣٠ دەیەقېنە هجومشا کەرڎ سەروو سەنگەرەکا گەریلای جە مېڎانوو گەوووی زینینە. ئېمە ئا هجومەیە بە تنی شەرمەسارکەرمۍ بانگەواز ئاڕاسەو گەلەکەیما بەتایبەتی گەلەکەما جە پانیشتوو کورڎسانی کەرمۍ کە بە ڕۊحوو شیلادزېوە جە دژوو پەدەکەی، چەتەکا دۊڵەتوو ترکی کە جە پانیستوو کورڎسانی و مېڎانەکانە بارەگا وەش کەرا، هەڵۋېس گېرانە ۋەر. ئېمە زینڎانیا شۊڕشگېڵڼی پەکەکەی و پاژکی سڵام چا گەریلایا کەرمۍ کە جە دژوو هجومەکا چەتە ئەرەگیریەکا ترکی، مدرامانی گۊرە بەراڕاوە و گرڎ ڕووۍ گورزە جە ئەرەگیرا مشانا. ئېمە داوا جە گرڎوو گەلەکەیما کەرمۍکە جە دەوروو گەریلاینە گوڕ بە مدرامانی بڎا و چی قۊناغە تاریخیېنە کە کۊشیایما ئینا قولەپۊپەنە، پەرە بە کۊشیای بڎ".
