دیوانو سەیدی هەورامی چاپ و وەڵاو کریاوە
بەرگی تازەو دیوانو سەیدی هەورامی کە ٦٥٤ لاپەلێن جە ئامادەکەردەی عه‌بدوڵڵا حه‌بیبی چاپ و وەڵاو کریاوە.
دیوانو سەیدی هەورامی گەورە شاعرو هەورمانی جارێوتەر و بەشێوازیوتەری نوین چاپ و وەڵاو کریاوە.
جەی بارەوە پەلیانەو هەورامان نێت-ی ئەرەیاونانش: بەرگی تازەو دیوانو سەیدی هەورامی جە ٦٥٤ پەلیٛنە چاپ و وەڵاو کریانەوە کە بە ئەرک و مانیایو نویسەرو هورسوڕیاو ویارو فەرهەنگ و ئەدەبو هەورامانی(عەبدوڵای حەبیبی) ئامان بەرهەم. ئی بەرگە جیاواز جە بەرگە وەڵینەکەیشەن، چون بەهەورامی لەیەکەودای کریان پەی شیٛعرەکاش، شونیەرە ۳۸ پارچە شیٛعریٛ وەڵاونەکریێوە سەیدش چەنەنیٛ کە تائیسە نەدیێنیٛما و نەژنەوییٛنیٛما. یاگیٛ واتەین پەی یوەم جاری کتیبو دیوانو سەیدی هەورامی ساڵەو ۱۹۷۱ی میلادینە، محمەدئەمین کاردوٙخی چاپ کەردەن، لەیەکەودای شیٛعرەکاش بە زوانو کوردی کەردەن. هەواڵو چاپو دیوانو سەیدی پی جوٙرە ئامان جە زوانی نویسەریوە:
هەورامان نێت زانیاری زیاتەرش سەبارەت بە دیوانەکەی دان و ئاشکراش کەردەن: دماو یه‌ک ساڵ ماتڵیه‌ره، دیوانوو (سه‌یدی هه‌ورامی) جه لاو ئێنتێشاراتوو کوردستانیه‌وه چاپ بی و ئاما دلێو کتێبخانه‌و هه‌ورامانی. ئی دیوانه که جه ٦٥٤ لاپه‌لێنه چاپ بیه‌ن، سه‌رجه‌موو ئا شێعراو مامۆسا سه‌یدیه گێرۆنه وه‌ر که تا ئیسه دلێو نوسخه‌خه‌تیه‌کانه یۆزیاینێوه. جه وه‌ڵینه‌و ئی دیوانیه‌نه که نزیک به 200 لاپه‌لان سه‌روو ئی بابه‌تا باس کریان:
سه‌یدی کێ بیه‌ن؟
سه‌یدی یۆ یام دوێ؟
شه‌جه‌ره‌نامه‌و سه‌یدی
سه‌یدی پێسه‌و مه‌ڵڵایوی
زوانی شێعریو سه‌یدی
سه‌یدی و عه‌شق و وه‌شه‌ویسی
یاگێو سه‌یدی جه ئه‌ده‌بیاتوو هه‌ورامانیه‌نه و…
دلێو ئی دیوانیه‌نه ۱۱۱ پارچه شێعرێ ئاماینێ و به هه‌ورامی شه‌رحه کریاینێ که ۳۸ پارچه شێعرێشا وه‌ڵته‌ر چاپێ نه‌کریانێ و دلێو ئا دیوانیه‌نه که بازاره‌نه هه‌ن، نیه‌نێ.
ئومێدواره‌نا هه‌رمانه‌و دیوانوو سه‌یدی به دڵوو وانه‌ره وه‌شه‌ویسه هه‌ورامیه‌کا بۆ و تاوابۆم هه‌نگامێوه هه‌رچن گولالێ په‌ی خزمه‌ت به زوان و فه‌رهه‌نگیما هۆرگێروو.
عەبدوڵڵا حەبیبی نویسەر و پەیجورکار سەرەڕاو ئی بەرهەمەیە چەندین بەرهەمێ تەرێش ئامادێ و چاپێ که‌ردٚێنێ کە بریتینێ جە:
۱- گلێره‌وه‌که‌ردٚه‌ی و له‌یه‌که‌وه‌دای دیوانوو مامۆسا مه‌وله‌وی جه ۸٥۰ لاپه‌لێنه هه‌ڵای چاپ نه‌بیه‌ن.
۲- گلێره‌وه‌که‌ردٚه‌ی و له‌یه‌که‌وه‌دای «دیوانوو بێسارانی» جه ۷٥۰ لاپه‌لێنه که ساڵه‌و ۱٤۹٥ی لاو ئێنتشاراتوو کوردستانی چاپ و وه‌ڵا بیه‌نه‌وه.
۳- ئاماده که‌ردٚه‌ی «گوڵزاروو هەورامی» جه ٦٥۰ لاپه‌لێنه که ساڵه‌و 1396ی لاو ئێنتشاراتوو کوردستانی چاپ و وه‌ڵا بیه‌نه‌وه.
٤- ئامادٚه که‌ردٚه‌ی کتێبوو «خامه و خه‌یاڵ»ی غه‌زه‌ڵێ ۹ کەسێ جه غه‌زه‌ڵ واچانو هه‌ورامانی جه ٤۰۰ لاپه‌لێنه که ساڵه‌و ۱۳۹٦ لاو ئێنتشاراتوو زایڵه‌ی چاپ و وه‌ڵا بیه‌نه‌وه.
٥- گلێره‌وه‌که‌ردٚه‌ی و له‌یه‌که‌وه‌دای «دیوانوو سه‌یدی هه‌ورامی» جه ٦٥٤ لاپه‌لێنه که ساڵه‌و ۱۳۹۸ی لاو ئێنتشاراتوو کوردستانی چاپ و وه‌ڵا بیه‌نه‌وه.
