جە شارو کرماشانی سەر بە وەرهۆرزو کوردستانی، دادگاو ئینقلابی ئیسلامی جە ئەرەنیشتێوشەنە کە ۲ شەممەی ویەردە ئەنجام دریان، بە تۆمەتبارکەردەی بە دژبەری ڕژێمی و ئاساییشی نەتەوەیی، پڕوپاگەندەکەردەی دژ بە دەسەڵاتی و ئەندام بییەی جە پارتە ئۆپۆزیسیۆنەکانە، ۳ هاموڵاتیێ شارەکەیش سزێ دێنێ.

زانیان، کە هەر یەرە هاموڵاتیەکێ ئەرەنیشتێ کرماشان-یەنێ و بە گردی  بە ۱۷ ساڵێ و ٦ مانگێ زیندانیکەردی سزێ دریێنێ کە نامەکێشان پی جۆرەنێ: (سوحبەت ئومیدی، خەلیل ئەسەدی بوژانی، مەهدی ئەدالی).

ئەگەر سزاکێشان جە دادگاو تەمیزی پەشتڕاستێ بکریانێوە، ئاوەختە بە پاو ماددەو ۱۳٤ی جە یاساو سزای ئیسلامی سزاکێ کەردەییە مەکریۆنە و پەی گوزەرنای سزاکێشان هەر یەرە هاموڵاتیەکێ ڕەوانێ زیندانێ بکریانێ.