حسێن سورگەچ زیندانی نەخۆش کە لە زیندانی تەکیرداغ سزای زیندانی تاکەکەسی بەسەردا سەپێندرا، زانراوە سزاکە بە بیانووی فاکسێکەوە بووە کە سورگەچ هەوڵی داوە بۆ وەیسی ئاکتاشی بنێرێت لە زیندانی ئیمرالی.
زانراوە حسێن سورگەچ نووسەری زیندانیکراو لەلایەن ئیدارەی زیندانەوە سزای ١١ ڕۆژ زیندانی تاکەکەسی بەسەردا سەپێنراوە. هەروەها ڕاگەیەندراوە لە ١٠ی نیساندا بۆ ژووری تاکەکەسی گواستراوەتەوە و هەموو مافەکانی پەیوەندیکردن و سەردانی لێ قەدەغە کراوە.
دادگای ئەمنی دەوڵەت لە کاتی خۆیدا بە بیانووی دۆسیەی ١٥ی شوباتی ١٩٩٩ سورگەچی بە شێوەیەکی نایاسایی دەستگیر و سزای زیندانی هەتاهەتایی بەسەردا سەپاندووە.
سورگەچ یەکەمجار لە زیندانێکی شاری مەلەتی و پاشان دوورخرایەوە بۆ زیندانەکانی چەولیک، ئامەد و ئەلبەسان و ماڵتەپەی ئەستەنبوڵ. سێ مانگ لەمەوبەر دوور خراوەتەوە بۆ زیندانی تەکیرداغ پیتی F ژمارە ٢.
شایانی باسە سورگەچ تووشی چەندین نەخۆشی دێژخایەنی وەک ڕۆماتیزم و نەخۆشییەکانی دڵ و ڕیخۆڵە بووە.
سورگەچ لە ماوەی ٢٦ساڵی زیندانیدا، کتێبەکانی بە ناوی "فرمێسکی دێرسیم" و "کۆمەڵگا و دێوانە"ی نووسیوە.
هەروەها سورگەچ ساڵانێکی زۆر لەگەڵ وەیسی ئاکتاش لە زینداندا ماوەتەوە. بڕیار بوو ساڵی ڕابردوو وەیسی ئاکتاش ئازاد بکرێت، بەڵام ئازادکردنی بۆ ماوەی ساڵێک بەشێوەیەکی هەڕەمەکی دواخراوە.
