پارتی یەکسانی و دیموکراسی گەلان (دەم پارتی) لە ڕاگەیاندراوەکەدا دەڵێت: "هاوڕێمان سەڵاحەدین دەمیرتاش کاتێک دەچێتە دیدار و دەگەڕێتەوە، پشکنینی بەسەردا دەسەپێنرێت. ئەمەش لەلایەن پارێزەرەکانییەوە بۆ ڕای گشتی ڕاگەیاندراوە. ئەم پشکنینە نایاسایی و "شکۆشکاندنە" بەرامبەر دەمیرتاش ڕەت دەکەینەوە. ئەم فشارانەی لە زیندانەکان زیادیان کردووە بەئامانجی ئاستەنگکردنی خەباتی هەڵبژاردنی ئێمە بەڕێوەدەچن. بەرپرسی ئەم فشارانە، وەزارەتی داد و دەسەڵاتە".

لە درێژەی ڕاگەیاندراوەکەدا هاتووە: "وەک دەم پارتی خەباتی هەڵبژاردنمان بە کەمپەینێک بەڕێوەدەبەین کە کەسانی هەڵبژێردراومان و هەڤاڵە زیندانیەکانمان  بەشدار دەبن. پێویستە بزانرێت ناهەقییەکان دژی شکۆی مرۆڤایەتی دەم پارتی ناوەستێنێت.

بانگەواز دەکەین کە کارە نامرۆییەکان بەرامبەر دەمیرتاش و هەڤاڵانی زیندانیمان دەمودەست کۆتایی بێت. بانگەواز لە ئۆپۆزیسیۆنی دیموکرات و ڕای گشتی دەکەین، دژی ئەم ناهەقییانە بوەستنەوە و پێکەوە تێبکۆشین".