چالاکی دانیشتن کە لە مانگی کانوونی دووەمی ئەمساڵەوە لە بەردەم نوسینگەی نەتەوە یەکگرتووەکان لە جنێف بۆ داواکردنی ئازادی جەستەیی ڕێبەری گەلی کورد دەستی پێکردبوو، بەردەوامە. لە چالاکیەکەدا داوای لێکۆڵینەوە لە بەکارهێنانی چەکی کیمیایی کرا.
کوردستانیان لە ئەوروپا لە 25ی کانوونی دووەمەوە وەک هەموو هەفتەیەک لە ڕۆژی چوارشەممەوە لە بەردەم نوسینگەی جنێفی یوئێن لە سویسرا دانیشتنێکیان دەستپێکرد و ئەم هەفتەیەش بە داواکاری ئازادکردنی جەستەیی ڕێبەری گەلی کورد عەبدوڵا ئۆجالان بەردەوامە.
چالاکوانان کە لە کاتژمێرەکانی بەیانیدا گەیشتنە بەردەم نەتەوە یەکگرتووەکان، کاتژمێر 13:00 گردبونەوەیەکیان ئەنجامدا.
چالاکیەکەدا بە ڕێزگرتن لە 7 گەریلایە دەستیپێکرد کە لەلایەن هێزەکانی پەدەکەوە لە خەلیفان شەهید کران.
ساڵح ساغلام هاوسەرۆکی ناوەندی کۆمەڵگەی کوردی جنێڤ لە چالاکیەکەدا قسەی کرد و ڕایگەیاند، کە بەم هێرشانە کە ئامانجەکەی قڕکردن و کۆمەڵکوژی گەلی کوردە، دەوڵەتی تورک لەبەر چاوی جیهان تاوان ئەنجام دەدات و بە گازی کیمیایی بەردەوامی بە هێرشەکانی دەدات.
ساغلام گۆتی، "پێویستە پێش هەموو شتێک ڕێکخراوی UN و کۆمەڵگەی نێودەوڵەتی شاندێک بۆ لێکۆلینەوە لە بەکارهێنانی گازی ژەهراوی و کیمیایی کە مرۆڤ و سروشت دەکاتە ئامانج پێک بهێنێت.
ساغلام بەبیری هێنایەوە کە ئەو هێرشانە هیچ جیاوازیەکی نییە لەگەڵ پیلانگێڕیی نێودەوڵەتیی سەر ڕێبەری گەلی کورد عەبدوڵا ئۆجالان و رایگەیاند، هەمیشە لە گۆڕەپانەکان دەبن بۆ تەشهیرکردنی هێرش و کوشتار و کۆمەڵکوژییەکانی دەوڵەتی تورک و بەڕێوەبەرانی پەدەکە.
ف.ق
