کرێکارە کوردەکان کە لە گوندی بایرالای ناوچەی ئەلمای ئەنتاڵیا، لە باخ و زەویە کشتوکاڵیەکاندا کاریان دەکرد، رووبەرووی هێرشی ٣٠٠ تورکی نەژادپەرست بوونەوە. کرێکارەکان گوندەکەیان بەجێهێشت

سەروەت کورگا کە کرێکارێکی کوردە بە ئاژانسی میزۆپۆتامیای راگەیاندووە، ٢ رۆژە ئەو گروپە هێرش دەکاتە سەریان و وتی، "دوێنێ هێرشیان کردە سەرمان. لوت و پەراسوی کارسازەکەمیان شکاند. بە ئێمەیان وت 'ئێوە کوردن و لەسەر خاکمان بچنە دەرەوە'. ئەمڕۆش هێرشیان کرد. ئێستا ئێمە لەژێر چاودیری جەندرمەکانین . هیچ شتێکمان هەڵنەگرت و گوندەکەمان بەجێهێشت."

موستەفا کورگاش کە ئەویش بو کرێکاری رووی کردووتەوە ئەو گوندە وتی، "خانەوادەکەم لە گوندەکە دەرهێنراوە و دەچین بۆ ماڵی خزمێکمان. ژیانمان لە مەترسیدایە و ئێستا لەژێر چاودیری جەندرمەکاندا دەژین."

وتیشی، کاتێک هێرشیان کردووەتە سەر خانەوادەکەیان، نەیانتوانیەوە هیچ شتێک بکەن. بۆ پاراستنی خۆیان بەتەنها گوندەکەیان بەجێهێشتووە و وتی، "پێیان راگەیاندین، تاوەکو سبەی شەو کاتتان هەیە کە بڕۆن بە پیچەوانەوە ماڵەکانتان دەسووتێنین. ٢ جار هێرشیان کرد. ئەوان بە خۆیان دەڵێن ئولکوج. موختاری گوندەکە هانیان دەدات و بۆیەش گوندەکەمان بەجێهێشت."

ف.ق