لە شاری نورنبێرگی ئەڵمانیا بە ئامانجی شەرمەزارکردنی هێرشی فاشیستەکانی تورک بۆ سەر ئەو کوردانەی لە هیوسدن- زۆلدەری بەلژیکا لە ئاهەنگی نەورۆز دەگەڕانەوە، گردبوونەوەیەک ئەنجامدرا.

چالاکییەکە لەلایەن ناوەندی جڤاکی کوردی دیموکراتیک (دەکتەم) ڕێکخرا، نوێنەری ناوەندەکە گوتی: "ئەم هێرشە بە فەرمانی ئەردۆگانی فاشیست ئەنجامدراوە. بوێری خۆی لە سیاسەتی دووڕووانەی ئەوروپا بەرامبەر کوردان وەردەگرێت. ئەردۆگانی فاشیست خۆی لەبەردەم سەرهەڵدانی کوردان نەگرت و ئەم هێرشەی ڕێکخست. ئەمە هێرشی یەکەم و کۆتایی نییە. بێدەنگی دەوڵەتانی ئەوروپا بەرامبەر هێرشە فاشیستییەکان زیانی مەزن بەو دەوڵەتانە دەگەیەنێت".

نوێنەری پارتی یەکێتی دیموکراتیک (پەیەدە) گوتی: "گەلی کورد بۆ ئازادی ڕێبەرەکەیان گۆڕەپانەکان چۆڵ ناکەن. دەوڵەتی تورک ناتوانێت بەرگەی بەرخۆدانی گەلەکەمان بگرێت کە لە نەورۆز پیشانیاندا، بۆ فاشیستەکانی دەنێرێتە شەقامەکان و هێرش دەکاتە سەر کوردان. بەداخەوە دەوڵەتانی ئەوروپا چاو لە هێرشەکان دەپۆشن. دەوڵەتانی ئەوروپا بەرامبەر کۆمەڵکوژییەکانی دەوڵەتی تورک لەنێوان ساڵانی ٢٠١٣-٢٠٢٢ لە پاریس بێدەنگ بوون، دەبێت بزانن بەم نزیکایەتییە زیاتر ڕووداوەکانی زیندوو دەهێڵنەوە.  هەموو بێدەنگییەکتان بەرامبەر هێرشی سەر کوردان، بوێری دەداتە فاشیستەکان".