لە ئەسینای پایتەختی یۆنان، چالاکییەکی چادرهەڵدانی ٥ ڕۆژە بۆ ئیدانەکردن و ریسواکردنی هێرشی چەکی کیمیایی و سیاسەتە پیسەکانی شەڕی دەوڵەتی تورک لە دژی گەریلاکانی ئازادیی کوردستان دەستیپێکرد.

لە یەکەم ڕۆژی چالاکیی چادرەکەدا، کە لە گۆڕەپانی ئەکادیمیا بە پێشەنگایەتیی ناوەندی ڕۆشنبیریی دیموکراتیکی کورد لە ئەسینا و تەجەشە بەڕێوەچوو، ئاڵاکانی پەکەکە و کەجەکە و وێنەکانی ڕێبەری گەلی کورد عەبدوڵا ئۆجالان هەڵواسرابوون و پۆستەر و لافیتەش بۆ ئیدانەکردن و ریسواکردنی هێرشی کیمیایی بەرزکرابوونەوە.

هەروەها بۆ دەرهێنانی ناوی پەکەکە لە لیستی تیرۆر واژۆ کۆکرانەوە و بڵاوکراوەش بە زمانی ئینگلیزی و یۆنانی بەسەر هاووڵاتییانی سنووری چالاکیەیکەدا بڵاوکرایەوە، کە تیایدا  باسی لە تاوانەکانی شەڕی دەوڵەتی تورک و بەرخودانی گەریلاکانی دەکرد.

داوا لە هەموو ڕێکخراوە نێونەتەوەییەکان و بە تایبەتی نەتەوە یەکگرتووەکان و ڕێکخراوی قەدەغەکردنی چەکی کیمیایی (OPCW) کرا، کە نەبنە هاوبەش لە تاوانەکان دا و پشتیوانیی دەوڵەتی تورک نەکەن.

چالاکی چادرهەڵدانەکە بۆ ماوەی ٥ ڕۆژ بەردەوام دەبێت.

ژ.ت