محه‌مه‌د سه‌ڤینچ كه‌ ٢٨ ساڵ بوو له‌ زینداندابوو، له‌ گرتووخانه‌ی ئاكحیساری مانیسا كوژرا. به‌ پێی بانگه‌شه‌كان له‌ ٣ی نیساندا له‌ كاتژمێر ٠٣:٠٠ كاتێك پاسه‌وانه‌كان چوونه‌ قاوشی یه‌ك ژووری بینیویانه‌ كه‌ سه‌ڤینچ له‌ هۆش خۆی چووه‌. دوای ئه‌وه‌ی سه‌ڤینچ بۆ نه‌خۆشخانه‌ی ده‌وڵه‌تی مسته‌فا كیرازئۆغڵووی ئاكحیسار گواستراوه‌ته‌وه‌ ده‌ركه‌وتووه‌ كه‌ تووشی خوێنبه‌ربوونی مێشك بووه‌ و نه‌شته‌رگه‌رییان بۆ كردووه‌.

بنه‌ماڵه‌كه‌ی چه‌ندین رۆژه‌ له‌به‌رده‌م نه‌خۆشخانه‌ن. كاتژمێر ١١:٠٠ سه‌ربازه‌كان بنه‌ماڵه‌كه‌یان ئاگادار كرده‌وه‌ كه‌ سه‌ڤینچ ژیانی له‌ده‌ستداوه‌. به‌مه‌به‌ستی توێكاری ته‌رمی سه‌ڤینچ گواسترایه‌وه‌ بۆ پزیشكی داد.

‌باوكمیان خسته‌ ژووری تاكه‌كه‌سی و كوشتیان‌

كچه‌كه‌ی به‌ ناوی بێریڤان سه‌ڤینچ زانیاری گه‌یانده‌ ئاژانسی مێزۆپۆتامیا و وتی"باوكمیان خسته‌ ژووری تاكه‌كه‌سی و ئه‌ویان له‌وێدا كوشت. هیچ زانیارییه‌كمان پێناده‌ن. ئێمه‌ نازانین بۆ كوژراوه‌ و چی به‌سه‌ر هاتووه‌. نه‌ك پزیشكه‌كان به‌ڵكوو سه‌ربازه‌كان له‌ باره‌ی مردنه‌كه‌ی زانیاریان پێداین".

هـ . ب