له ده‌یان شاری رۆژهه‌ڵاتی كوردستان و ئێران سه‌رباری هێرشی ده‌وڵه‌تیش سه‌رهه‌ڵدان له رۆژی ٢٦ هه‌میندا به‌رده‌وامه، هاوكات پێنج پێشكه‌شكاری ته‌له‌ڤزیۆنی حكومه‌ت ده‌ستیان له‌كار كێشایه‌وه و سزای نێونه‌ته‌وه‌یی زیاتریش به‌سه‌ر ده‌وڵه‌تی تاراندا سه‌پاند.
دوای ئه‌وه‌ی كه ژینا ئه‌مینی ته‌مه‌ن ٢٢ ساڵ له‌لایه‌ن "پۆلیسی ئاكاریی" ده‌ستگیركرابوو و به هۆی ئه‌شكه‌نجه‌وه له ١٦ی ئه‌یلولدا كوژرا، توڕه‌یی و ناڕه‌زایه‌تی زۆری لێكه‌وته‌وه و به‌هۆیه‌وه سه‌رهه‌ڵدان هاته ئاراوه.
چالاكییه‌كانی شه‌ڕمه‌زاركردن له ٢٦هه‌مین رۆژدا به‌رده‌وامن. له ١٠ی تشرینی یه‌كه‌م سه‌رباری ئه‌وه‌ی گوشارێكی زۆری سه‌ربازی و پۆلیسی گیرایه‌به‌ر و به فیشه‌كی راسته‌قینه هێرش ئه‌نجامدرا، به‌ڵام به‌رخودانێكی گه‌وره له به‌رامبه‌ریدا كرا.
شاره‌كانی سنه، مه‌هاباد، سه‌قز، كرماشان، دێوڵان، مه‌ریوان، بانه و بۆكانی رۆژهه‌ڵاتی كوردستان و چه‌ند شاری تر له دژی ده‌سه‌ڵاتداران چالاكی كرا. چالاكوانان ئاگریان كرده‌وه، رێگه‌یان گرت و له سه‌ر دیواره‌كان دروشمیان نوسی.
به‌پێی سه‌رچاوه خۆجێییه‌كان بۆ ئه‌وه‌ی چالاكوانان بترسێنن له كرماشان فڕۆكه‌ی شه‌ڕ به ئاسمانه‌وه سوڕایه‌وه و ئه‌و فڕۆكانه چه‌ند جارێك به نزمی فڕین.
له هه‌مان كاتدا له شاره‌كانی پارێزگای سیستان و به‌لوچستان، ئیسفه‌هان، وه‌رامین، فولادشه‌هر، یه‌زدانشه‌هر، تاران، كازرون، مه‌شهه‌د، قوم، ته‌ورێز، هه‌مه‌دان، شیراز، قه‌زوین، ئه‌راك، به‌نده‌ر عه‌باس، ئه‌هواز، مه‌روده‌شت و زۆر شاری تر سه‌رهه‌ڵدان به‌رده‌وام بوو.
له‌به‌ر ئه‌وه‌ی له ئێران ئینته‌رنێت راگیراوه، له‌سه‌ر تۆڕه كۆمه‌ڵایه‌تیه‌كان بڵاوكردنه‌وه‌ی دیمه‌نه‌كان كه‌متر بووه.
رێكخراوی مافه‌كانی مرۆڤ: تائێستا لانیكه‌م ١٨٥ كه‌س كوژراون
رێكخراوی مافه‌كانی مرۆڤی ئێران كه ناوه‌نده‌كه‌ی له ئۆسلۆیه له كۆتایی هه‌فته‌دا ئامارێكی بڵاوكردبووه‌وه و باسی له‌وه‌كردبوو كه ١٨٥ كه‌س كه ١٩ یان منداڵن له خۆپیشاندانه‌كاندا كوژراون. راگه‌یه‌نرا كه نیوه‌ی كوژراوه‌كان له پارێزگای سیستان و به‌لوچستانن.
موجاهیدینی خه‌لق كه گروپێكی به‌رهه‌ڵستكاری ئێرانه ناوی ١٩٢ كه‌سی بڵاوكردووه‌ته‌وه كه له خۆپیشاندانه‌كاندا كوژراون. به‌گوێره‌ی ئاماری ئه‌و گروپه له ٣١ پارێزگا و له ١٧٧ شار چالاكی ئه‌نجامدراون و ده‌وڵه‌ت لانیكه‌م ٤٠٠ كه‌سی كوشتووه.
دەست لەكاركشانەوەی پێنج پێشكه‌شكاری دەزگای دەنگ و رەنگی رژێم
دژبەرانی رژێم هەموو كاتێك دەزگای دەنگ و رەنگی"سەدا و سیمای" رژێمی ئێران بەپێچەوانە نیشاندانی راستیەكان و رۆڵیان لەدرۆستكردنی سیناریۆسازی ئەمنی و بڵاكردنەوەی دانپێیانانی ئیجباری"ناچاری" و سۆكایەتی و سەركۆتی ناڕەزایەتیەكان تاوانبار دەكەن.
لەگەڵ بەردەوام بوونی راپەڕینی گەلانی ئێران، درزەكان لەجەستەی رژێم و بەتایبەتی لەدام و دەزگا و دامەزراوەكانی رژێمدا قووڵتر و بەرفراوانتر دەبێت و لەنوێترین ئەو درزانەش ژمارەیەك لەكارمەندانی دەزگا ئەمنیەكان، هاوكات پێنج پێشكەشوانی دەزگای دەنگ و رەنگ"سەدا و سیما"ی رژێم دەستیان كێشایەوە لەبەردەوامبوون و هاوكاری لەگەڵ ئەم دامەزراوەیەدا.
دەزگای دەنگ و رەنگی رژێم لەبیست ساڵی رابردوودا لەلای زۆرێك لەهاوڵاتیانی ئێران بووەتە بنكەی درۆكردن و پێچەوانەكردنی راستیەكان و بەگوێرەی رەخنەگران و رای گشتی خەڵكی ئێران، ئەم دامەزراوەیە سەرەڕای ئینكاری و لەبەرچاونەگرتنی داواكاریەكانی گەل بووەتە بەشێك لەدەزگای سەركۆتكردن و پرۆپاگەندەی رژێم لەدژی گەلی ناڕازی ئێران.
ماڵپەڕی"ئەسكاننیوز"، رۆژی دووشەممە، ١٠ تەشرینی یەكەم بڵاویكردەوە كە باربد بابایی، پەیمان شێخی، مەجید غەزەنفەری، محەمەد حەسەنی و مۆجتەبا پوربەخش لەپێشكەشوانانی دەزگای دەنگ و رەنگی رژێم دەستیان لەهاوكاری كردن لەگەڵ ئەو دەزگایە كشاوەتەوە.
هەر بەگوێرەی زانیاریەكان، باربد بابایی ماوەیەك پێش لە پێگەی ئینستاگەرامی خۆیدا پشتیوانی خۆی لەراپەڕینی خەڵكی راپەڕیووی نیشاندا و لەئیستۆریەكدا لەلاپەڕەی ئینستاگەرامدا بڵاوكردەوە"من باربد بابایی دوای بیست و چوار ساڵ لەكاری راگەیاندن، رایدەگەیەنم لەبەرنامەی زەوجی نوێ و هیچ بەرنامەیەكی تردا بەشدار نابم، تا ئەو كاتەی خەڵكی وڵاتەكەم رەوشیان باش نەبێت و كەیفخۆش نەبن".
پێشتر محەمەد حەسەنی، پێشكەشوانی كاناڵی"سەلامەت" لەدەزگای دەنگ و رەنگی رژێم دەستی لەكاركێشایەوە. محەمەد حەسەنی لەپۆستێكدا كە لەلاپەڕەی فەرمی خۆی لەتۆڕی ئینستاگەرامدا بڵاویكردەوە كە بیست رۆژ دەبێت لەسەدا و سیمای رژێم دەركەوتووە و دەڵێتیش:"بۆ هەموو ئاگاداركردنەوەكان، بۆ هەموو ئەو ئاخاوتنانەی لەقۆرگماندا قووتماندا، بۆ هەموو فكرەكان كە دەتانگووت خۆت ئیسپانسر بێنە و پارەكانتان دەدا رانتخۆرەكانی خۆتان، بۆ ئارامبوونی خۆم، بۆ ئێوەی خەڵكەكەم".
هەر لەم رۆژانەی رابردووشدا مەجید میرغەزەنفەریش دەستی لەسەدا و سیمای رژێمی ئێران كشایەوە كە بەساڵانە لەو دەزگایە كاروخەبات دەكات تا ئەوەی كە دەنگی داواكاریەكان و عەداڵتخوازی بێت، بەڵام ئێستاكە هەست دەكات ئێدی بۆ مانەوە لەقابی راگەیاندندا هیچ بیانۆیەكی نەماوە.
دەستبەردان بوونی پێشكەشوانانی دەزگای دەنگ و رەنگی رژێمی ئێران لەكاتێكدا پێكدێت كە ئەم دامەزراوەیە رۆڵێكی كاریگەری لە سیناریۆسازیی هێزە ئەمنیەكان، بچووكخستنەوە و سەركۆتی ناڕەزایەتیەكان بۆ ماوەیەكی درێژ بەرێوە دەبرد.
بڵاوكردنەوەی دانپێانانی ناچاری زۆرێك لەچالاكوانانی مەدەنی و سیاسی و بنەماڵەی كۆژراوەكانی ناڕەزایەتیەكانی ئێستاكە لەئێران، لەكاناڵەكانی ئەم دامەزراوەیە بڵاودەكرایەوە و پێش لەوەش چەندین جار دەزگاكانی مافی مرۆڤ لەسەر ئەم بابەتە رژێمیان هۆشیار كردبوویەوە.
دەزگای دەنگ و رەنگی"سەدا و سیمای" رژێمی ئێران لەكاتێكدا هەواڵەكانی ناڕەزایەتیەكانی دژ بەحكومەتی خەڵكی ئێران ئینكار یا پێچەوانە دەكاتەوە لەكاتێكدا هاوڵاتیانی ناڕازی ئێران چەندین جار لەماوەی بیست و پێنج رۆژی رابردوو، درشمی"ننگ ما ننگ ما، سەدا و سیمای"مایان دەوتەوە.
هاوكات رۆژی شەممە، هەشتی تەشرینی یەكەم، هاوكات لەگەڵ ناڕەزایەتیە بەرفراوانەكانی گەل لەشارە جیاوازەكانی ئێراندا كاناڵی یەكی دەزگای دەنگ و رەنگی ئێران بۆ چەند ساتێك هاككرا و درۆشمی"ژن، ژیان، ئازادی"لەگەڵ وێنە و دیمەنی هەندێ لەو ژنانەی كۆژرابوون لەو ناڕەزایەتیانەدا لەكاتی بڵاكردنەوەی قسەكانی عەلی خامنەیی، بڵاوبوونەوە.
هەرچەندە گروپی سایبری"عەدالەتی عەلی"رایانگەیاند كە لەكاتی بەرنامەی زیندووی كاناڵی هەواڵی رژێمی ئیسلامی ئێرانیان هاك كردوە، بەڵام رایەدارانی ئێران بانگەشەی ئەوەیانكرد كە ئەم وێنە و دیمەنانەی پشتیوانی لەناڕەزایەتیەكان و درۆشمی دژ بەعەلی خامنەیی لەلایەن كارمەندنی ئەركداری تەلەفزیۆن، یا لەرێگەی چوونە ناو سێرڤری بەرنامەكەی پەخشەكەوە بەكارهاتوون و بەشێوەی چاوەڕواننەكراو، بڵاوبوونەتەوە.
بریتانیا، هاوشێوەی كانادا و ئەڵمانیا و ئەمریكا بەرپرسانی ئەمنی رژێمی ئێران سزا دەدا
بریتانیا، گەماروی خستە سەر بەرپرسانی پلە باڵای ئەمنی رژێمی ئیسلامی ئێران و"پۆلیسی ئاكاری".
بەگوێرەی پێگەی"رۆیترێز"، رۆژی دووشەممە، دەی تەشرینی یەكەم، جیمز كلورلی وەزیری دەرەوەی بریتانیا لەراگەیەندراوێكدا دەڵێت:"ئەم گەمارویانە پەیامێكی ئاشكرایە بۆ بەرپرسانی ئێران. ئێمە ئێوە بەهۆی سەركۆتكردنی ژنان و كچان و توندوتیژی وەحشیانە لەبەرامبەر بەگەلەكەتان بەبەرپرسیار دەزانین".
وەزارەتی دەرەوەی بریتانیا راشیگەیاندوە؛ پۆلیسی ئاكاری لەهەڕەشە و گۆشار بۆ دەستبەسەركردن و توندوتیژی بەمەبەستی كۆنترۆڵی جل و بەرگی ژنان لەئێران و شێوەی هەڵسوكەوتی ئەوان لەدەرەوەی ماڵەوە كەڵكی وەرگرتوە.
وەزارەتی دەرەوەی بریتانیا هاوكات راشیگەیاندوە؛ گەماروەكان دەزگای رەوشت، و محەمەد رۆستەمی چشمە گەچی، سەرۆكی ئەو دامەزراوەیە و هاوكات حاج ئەحمەدی میرزایی سەرۆكی لقی تارانی پۆلیسی رەوشت دەگرێتەوە.
هـ . ب
