بە ناونیشانی "بەرێکخستن بوون و ئیرادەی ئازاد، تێکۆشانی دیموکراتی فراوان دەکەین" یەکەمین کۆنگرەی ڕێکخستنەکانی تەڤگەری ئازادیی کۆمەڵگەی کوردستان لە ئەوروپا بەڕێوەچوو، بە ڕاگەیاندراوێک ئەنجامنامەی کۆنگرەکە بڵاوکرایەوە.

لە ئەنجامنامەکەی ئاماژە بەوە کراوە، دۆخی ناوچەکە و جیهان پڕ مەترسییە، ئەم ڕەوشە چارەنوسسازە، کورد و کوردستانیش لەنێو ئەم نەخشە سیاسی و سەربازییەدا جێ دەگرن. دوژمنانی گەلەکەمان لە هێرش و گەمارۆدان بەردەوامن بە ئامانجی لەناوبردنی دەسکەوتەکان. کۆنگرەکەش لەنێو ئەم هەلومەرجە هەستیارەدا بەستراوە.

هەروەها تیشکخراوەتە سەر ئەوەی پێویستە جیا لە فاکتەرە جیهانی و ناوچەییەکان، ڕەچاوی فاکتەرە ناوخۆییەکان بکرێت. لە کوردستان و عێراق نادادی سیاسی و پێشێلکاری ماف و ئازادییەکان بەردەوامە و زیهنیەتی دەسەڵاتی خۆسەپێن جێبەجێ دەکرێت.

هەروەها ئاماژە کراوە بە ڕۆڵی نەرێنی ئیسلامی سیاسی بە نوێنەرایەتی ئیخوانیزم و داعش و سەلەفیزم کە دەیانەوێت جڤاک بەرەو زیهنیەتێکی دۆگماتیک ببەن. ئەم زیهنیەتەش ڕێگرە لە بیری ئازاد و سەرچاوەی جیاکارییە، دژی گەنج و ژن و ماف و ئازادییەکان پەیڕەو دەکرێت، بەمەش کوردستان دەخرێتە خزمەتی داگیرکەرانەوە.

هەروەها جەخت لەوە کرایەوە، هێرشی داگیرکەران بۆ سوەر وڵاتپارێز و خەباتکارانی کورد بەردەوامە بە هاوکاری پەدەکە. لە بەرامبەر ئەمەدا بانگەواز کرا بۆ خۆڕێکخستن و بەرزکردنەوەی ئاستی ڕۆحی شۆڕشگێڕی و پەروەردە.

هەروەها باس لەوە کرا، دەبێت کوردانی ئەوروپا ڕۆڵی خۆیان باشتر بگێڕن، تاوەکو بتوانن ئاراستەی گۆڕانکارییەکام بەرەو سیستەمێکی دیموکراتیک و جەماوەری ببەن.

ئەنجامنامەی کۆنگرەکە بە چەند خاڵێک داڕێژرایەوە و تێیدا هاتووە:

١/ تێکۆشانی هەمەلایەن لە دژی داگیرکاریی کوردستان، لە دەرەوەی وڵات و پێشخستنی تێکۆشانی هاوبەش لەگەڵ لایەن و رێکخستنە دیموکراتییەکان و ئازادییخواز لە باشوری کوردستان و عێراق لە پێناوی بەرقەرارکردنی ئازادیی و دیموکراتیی لە وڵات.

٢/ تێکۆشان بۆ ئەوەی کورد لە دیاسپۆرا، ببێتە هێزی پاڵپشتی خەباتی دیموکراتیی و ئازادیی لە ناوەوەی وڵات، ئەمیش بۆ ئەوەی ڕەوەندی کوردیی لە دەرەوەی وڵات بە ناسنامەی ڕاستەقینەی نەتەوەیی و بەها کۆمەڵایەتیی، دیموکراتییک و بەدەستهێنانی مافەکانی بناسێندرێت و بژیت.

٣/ تێکۆشان دژی گۆشەگیریی لە ئیمرالی و هاوکات پێشخستنی کاروخەبات بۆ ئازادیی جەستەیی ڕێبەر ئاپۆ.

٤/ پێشخستنی چالاکی هاوبەشی نەتەوەیی لەگەڵ لایەنە سیاسیی و رێکخراوەکانی کۆمەڵگەی مەدەنیی و دەزگا کولتووریی و فەرهەنگییەکان و بەشداریی لەسەرجەم ئەو چالاکییانەی لە پێناو بەدەستهێنای مافە نەتەوەیی و نیشتمانییەکان ئەنجام دەدرێت.

٥/ دروستکردنی کۆمیتە، ئەنجومەن و رێکخستنەکانی تەڤگەری ئازادیی لە وڵاتانی ئەوروپا و پێشخستنی سیستمی خۆبەڕێوەبەریی لە ناو گەلدا.

٦/ بە سیستەم کردنی پەروەردە و پێشخستنی پەروەردە لە ناو ئەندامان و لایەنگران و وڵاتپارێزان.

٧/ دروستکردنی گرووپێکی هونەریی تایبەت بە باشوری کوردستان، لە پێناو پێشخستنی هونەری وڵاتپارێزیی لە دەرەوەی وڵات.

٨/ دروستکردنی سەکۆیەک بۆ کۆکردنەوەی دەنگ و رەنگی ئازادییخوازان لە ئەوروپا.

٩/ لە پێناوی گەڕانەوەی ڕۆڵ و پێگەی ئازادانەی ژن لە کۆمەڵگەی کوردستان تێدەکۆشێت و هەروەها بۆ بەدەستهێنانەوەی ناسنامە و ئیرادەی ئازادیی ژن لەبەرامبەر زهنیەتی پاشکەوتوو دژە ژن و رێگریی کردن لە کوشتنی ژنان تێدەکۆشێت.

١٠/ پرسی ژینگە پرسێکی جیهانگیریی و سەرتاسەرییە، هیچ سنوورێک ناناسێت، بۆیە تەڤگەری ئازادیی هەوڵی ئەوە دەدات لە ناوەندەکانی بڕیار و ئۆرگانە نێودەوڵەتییەکان پرسی ژینگەپارێزیی بووروژێنێت و لە سەرووی خەبات و تێکۆشانی خۆیەوە دادەنێت و هۆشیاریی ژینگەپارێزیی لە نێو کۆمەڵگەدا بەرزدەکاتەوە و پێشیدەخات.