"ئێشکگریی ئازادی" لە شاری ستراسبۆرگی فەرەنسا بۆ ئازادیی جەستەیی ڕێبەری گەلی کورد عەبدوڵا ئۆجالان بە دەستپێشخەریی کەمپەینی "ئازادی بۆ عەبدوڵا ئۆجالان" لە ٢٥ی حوزەیرانی ٢٠١٢ەوە دەستیپێکردووە و ماوەى ٤٩٣ هەفتەیە ئەو چالاکییە بەردەوامە.

هەموو هەفتەیەک چالاکیی ئێشکگریی ئازادی لەلایەن کۆمەڵێک لە کوردەکان و دۆستەکانیانەوە لە ئەوروپا بەڕێوەدەچێت. ئێشکگرانی ئەم هەفتەیە ئەندامانی کۆمەڵەی ژنانی ڕوناهین و لە شاری هانۆڤەری ئەڵمانیاوە بۆ ئێشکگرییەکە هاتوون.

دەستە ئێشکگرەکەى ئەم هەفتەیە پێکهاتوون لە عالیە ئیکینجی، ڕۆناهی دەنیز و ئایسەل دۆغان.

عالییە ئیکینجی بەناوی گروپەکەوە ڕایگەیاند، ڕێبەری گەلی کورد ماوەی ٢٢ ساڵە دیل و گۆشەگیرکراوە.

عالییە ئیکینجی ئاماژەی بەوەکرد، ماوەی ١٠ ساڵە لە گۆڕەپانی بەردەم دامەزراوە ئەوروپییەکاندا لە ریگەی ئەم چالاکییەوە هاوکاریی نێوان دەوڵەتی تورک و یەکێتی ئەوروپا و دید و چەمکیان بۆ ئەشکەنجەی سەر ئیمراڵی ئیدانە و ریسوا دەکەین  و ڕایگەیاند، شەرمەزارییە لە کەسایەتیی عەبدوڵا ئۆجالان دا دژایەتیی گەلی کورد دەکەن و مافەکانی ئەم گەلە پێشێل دەکەن.

عالییە ئیکینجی وتی: "ئەمە شەرمەزارییە بۆ ئەوروپا" و لە بەردەوامیدا وتی: "ئێمە ناتوانین لە ڕێبەر ئاپۆ زانیاری بەدەست بهێنین. دامەزراوە ئەوروپییەکان ئەرک و بەرپرسیاریەتییەکانیان جێبەجێ ناکەن".

عالییە ئیکینجی باسی لە نیگەرانییەکانی گەلی کورد سەبارەت بە پرۆسەکە و قۆناغەکە کرد و داوای لە دامەزراوەکانی ئەوروپا کرد دەستبەجێ دەست بەکاربن.

عالییە ئیکینجی وتیشی: "هەتا ڕێبەرمان ئازاد نەبێت ژنانیش ئازاد نابن" و راشیگەیاند، بە دڵنیاییەوە ژنان فاشیزم دەڕووخێنن و ڕێبەرەکەیان ئازاد دەکەن.

عالییە ئیکینجی لە کۆتایی وتەکانیدا بانگەوازی بۆ گەلی کورد و دۆستەکانی هەبو و وتی: "ئازادیی گەلی کورد بە ئازادیی ڕێبەرایەتی بەدی دێت. ڕێگای چارەسەریی ئاشتییانە و دیموکراسییانەی پرسی کورد بە ئیمراڵیدا تێدەپەڕێت. پێویستە گەلەکەمان و دۆستەکانمان بۆ ئازادیی رێبەرەکەمان چالاکیی زیاتر ئەنجام بدەن".

ژ.ت