زیندانیانی رێبازی پەکەکە و پاژک، لە یادی ٣٩ ساڵەی هەڵمەتی ١٥ی ئابدا راگەیەندراویان بڵاوکردەوە و داوایان لە گەل کرد، چالاکی بەو جۆرە ئەنجام بدەن کە خەباتی گەریلا گەورەتر بکەن و وەڵامدەرەوەی تێکۆشانی گەریلا بن.
دەنیز کایا، لەسەر ناوی زیندانیانی پەکەکە و پاژکەوە راگەیەندراوێکی بڵاوکردەوە و تیادا ڕایگەیاند، " جەژنی گەریلا و ژیانەوەی ١٥ی ئاب کە بە رەنج و ماندووبوون ماوەی ٣٩ ساڵی تێپەڕاندووە و پێیناوەتە ٤٠ ساڵەی خۆیەوە، سەرەتا لە ڕێبەر ئاپۆ و لە کەسایەتیی فەرماندەی نەمر مەعسوم کۆرکماز (عەگید)، لە شەهیدانی مرۆڤایەتی و ئازادی، لە گەلی ستەملێکراو و خۆڕاگر، لە گەریلا قارەمانەکان، کە بە ڕۆحی ١٥ی ئاب تێکۆشانێکی گەورە دەکەن و بە رەنج و فیداکاری گورزی گەورە لە دوژمن دەدەن، لە هەموویان پیرۆز دەکەین. لە کەسایەتی فەرماندە عەگید و فەرماندە زیلاندا، سەرجەم شەهیدانی ئازادی بە رێز، خۆشەویستی و پێزانینەوە بەبیردەهێنینەوە".
لە ڕاگەیاندراوەکەدا هاتووە، "بۆ گەلی کورد، کە کۆیلایەتی بەسەردا سەپێنرابوو و لە ڕووی جەستەیی و کولتوورییەوە تیرۆردەکران، هەڵمەتی گەریلا لە ١٥ی ئابی ١٩٨٤ هەنگاوێکی مێژوویی بووە بەرەو ژیانێکی ئازاد".
دەنیز کایا ئاماژەی بەوەدا، "واتا و گەورەیی ئەو چالاکییانەی کە ٣٩ ساڵ لەمەوبەر لەلایەن کۆمەڵێک گەریلا لە دھێ و شەمزینان ئەنجامدراون ئەمڕۆ باشتر درکی پێدەکرێت"، وتی: "بۆ زۆرێک لە هێز و لایەنەکان بوو بە سەرچاوەیەکی سوودوەرگرتن. جەژنی ژیانەوە هەڵمەتی گەریلای ١٥ی ئاب بەهایەکی گەورەی سەربازی و سیاسی و کۆمەڵایەتی و کولتووری هەیە، کاریگەریی ئەم هەنگاوە لەسەر ئاستی ناوخۆیی و نێودەوڵەتی بە پێشەنگایەتی پەکەکە و پاژک بەتایبەتی ژنان و گەنجان، کاریگەرییەکی ئەفسانەیی لەسەر زۆرێک لە ڕێکخراو و لایەنەکان هەبوو. هێزی گەریلاکانمان بە چالاکی وەڵامی داگیرکەری و کۆلۆنیالیزمی دەوڵەتی تورکیان دایەوە، لە هەمان کاتدا فیشەکیان لە زنجیری کۆیلایەتی سەر گەلەکەمان دا، بەم شێوەیە گەلەکەمانمان لە کۆیلایەتی رزگارکرد و بوونی گەلەکەمان جارێکی تر لە لاپەڕەکانی مێژوودا نوسرایەوە".
دوای هەنگاوی گەریلای ١٥ی ئاب ١٩٨٤، خەباتی گەریلا و راستی پەکەکە-پاژک لە ڕوانگەی سەربازی، کۆمەڵایەتی، سیاسی و کولتوورییەوە بەردەوام بوو، هاوکات لەگەڵ کاریگەرییەکانی لەسەر ئاستی ناوخۆیی و نێودەوڵەتی، لە کوردستانیش زۆر گۆرانکاری سیاسی و کۆمەڵایەتی دروست کرد.
هەر لە راگەیەندراوەکەدا هاتووە، کە ئەو بەرخۆدانە بە هەڵمەتی گەریلا لە ١٥ی ئابی ١٩٨٤ ئەنجامدرا، گەلی کوردی لە خەوی مەرگ بەئاگا هێنایەوە، چەخماخەی بەرخۆدانی لە دڵ و مێشکی گەلدا هەڵگیرساند و وترا : "کورد نابێتەوە بەو کوردەی جار، بووە کوردێک کە بڕیاری لەسەر ژیانێکی ئازاد داوە، بۆ ژیانێکی ئازاد بەرخۆدان دەکات و شەردەکات".
زیندانیانی دۆزی پەکەکە و پاژک ڕایانگەیاند، کە هەنگاوی گەریلا لە ١٥ی ئاب کە ٣٩ ساڵی تێپەڕاندووە، بە بەرخۆدانێکی گەورەوە پێدەنێتە ٤٠ ساڵەی خۆیەوە، لە ڕوانگەی سەربازی، کۆمەڵایەتی، سیاسی، کولتووری، زانستی و فەلسەفیەوە گەورە دەبێت. لە ڕاگەیەندراوەکەدا هاتووە، "چالاکی گەریلا لە ١٥ی ئابی ١٩٨٤ لەبەر ئەوەی گرنگییەکی گەورەی بۆ گەلەکەمان هەیە وەک جەژنی ژیانەوە بەرزڕادەگیرێت و پیرۆز دەکرێت و وەک بڕیارێک بۆ گوڕدان بە تێکۆشان دەبینرێت. هەروەها هەڵمەتی گەریلا لە ١٥ی ئاب، وێڕای جەوهەری نەتەوەیی، خاوەن کارەکتەرێکی گەردونیە، وەک سەرەتای هەڵمەتی دیموکراسی و ئازادی جیهانی لە لاپەڕەکانی مێژوودا شکۆمەندانە جێگەی خۆی دەکاتەوە".
چالاکییەکان بۆ بەرزکردنەوەی تێکۆشانی گەریلا
لە درێژەی راگەیەندراوەکەدا باس لە لەوەکرا، تێکۆشانی گەریلا کە لە شەمزینان و دهێ بە هێزەکانی ڕزگاریخوازی کوردستان (هەرەکە) دەستی پێکرد، ئەمڕۆ لە کوردستان و تورکیا بەتایبەت لە زاپ و ئاڤاشین و مەتینا، بە ڕۆحی پەکەکە و پاژک لەلایەن ئاپۆییەکان و ڕاستی بەرخۆدانی هەپەگە و یەژاستار بەردەوامە، وەک بەرخۆدانی شکۆمەندی و خاوەنداریەتی لە بەها مرۆڤایەتییەکان، بەتایبەتی بەهاکانی گەلی کورد، وەک هیوایەک بەردەوامە.
لە ڕاگەیەندراوەکەدا هاتووە، "تێگەیشتن لە گرنگی خەباتی گەریلا، کە بە فیداکاریەکی زۆر بەڕێوەدەچێت، تاکە ڕێگایە بۆ تێکشکاندنی فاشیزم. داوا لە گەلی کورد و هەموو لایەک دەکەین خاوەنداری لە تێکۆشانی گەریلا بکەن، بۆ گەورەکردنی خەباتی گەریلا و وەلامدەر بوون لە بەرانبەر تێکۆشانی گەریلا، چالاکی ئەنجام بدەن".
هـ . ب
