قەدەغەى سەر پەکەکە لە ئەڵمانیا ماوەی ٢٥ ساڵە بەردەوامە. لە کۆنفرانسێکدا لێکدانەوە بۆ زیانەکانى ئەو قەدەغەکارییە لەسەر کوردان و دیموکراسیى ئەڵمانیا دەکرێت. دکتۆر ئەلمار میلیچ یەکێک لە رێکخەرانى کۆنفرانسەکە وتى "ئێمە ستراتیژیی خۆمان لە دژی قەدەغەى سەر پەکەکە دەستنیشان دەکەین".

قەدەغەی سەر پەکەکە لە رۆژی ٢٦ی تشرینى دووەمی ١٩٩٣ / ٥ی سەرماوەز و لەسەر بڕیارى حکومەتى فیدراڵی ئەڵمانیا دەستیپێکرد. بەهۆی ئەو ٢٥ ساڵ قەدەغەکارییە لە دژی پەکەکە رۆژی شەممە ٢٠ی تشرینى یەکەمی ٢٠١٨ / ٢٨ی رەزبەر لە شاری بەرلینى پایتەختى ئەڵمانیا کۆنفرانسێکى بەرفراوان رێکدەخرێت.

لە کۆنفرانسەکەدا شیکاری بۆ زیانەکانى ئەو قەدەغەکارییە بۆ سەر گەلی کورد و دیموکراسیى ئەڵمانیا دەکرێت.

کۆنفرانسەکە لە بینای کارڵ لیبکنەیت هاوس لە ژێر ناوی "٢٥ ساڵ قەدەغەى سەر پەکەکە – گوشاری ٢٥ ساڵ و دیموکراسیی ئەڵمانیا لە خزمەتى سیاسەتى دەرەوەدایە" بەڕێوەدەچێت.

کۆنفرانسەکە لەلایەن کۆمەڵەى ئازادی کە بۆ ئازادیى سیاسەتمەدارە زیندانیکراوەکانى کورد لە ئەڵمانیا کار دەکات، کۆمەڵەى نێونەتەوەیى بۆ مافەکانى مرۆڤ و دیموکراسی (ماف داد، MAF-DAD)، کۆمەڵەى یاساناسان بۆ دیموکراسی و مافەکانى مرۆڤ EJDM/ELDH) ) و بەڕێوەبەرایەتیى فیدراڵی رۆت هێلەفەRote Hilfe) ) رێکدەخرێت.

ئەو کەسایەتییانەى کە چەندین ساڵە لە دژی قەدەغەی سەر پەکەکە لە تێکۆشاندان و پسپۆڕانى یاسا و مافەکان بەشداریى کۆنفرانسەکە دەکەن.

دکتۆر ئەلمار میلیچ یەکێک لە بەڕیوەبەرانى کۆمەڵەى ئازادی لەبارەى ئامادەکارییەکان بۆ کۆنفرانسەکە بە ئاژانسى هەواڵی فورات (ANF) راگەیاند، ئامادەکارییەکانیان تەواوبوون. راشیگەیاند، قەدەغەکاریى سەر پەکەکە پەیوەندیى بە سیاسەتى دەرەوەى ئەڵمانیاوە هەیە و ماوەى ٢٥ ساڵە ئەو قەدەغەکارییە بە چڕی و بە وردی بەردەوامە.

د. میلیچ ئاماژەى بەوەشکرد، هاوکات لەگەڵ قەدەغەى سەر پەکەکە، ئاڵا و سیمبولەکانى پەیەدە، یەپەگە و یەپەژەش قەدەغە کراون. دەوڵەتى ئەڵمانیا هەمیشە ئەو قەدەغەکاری و سیاسەتەی لە دژی بزووتنەوەى ئازادیى کورد وەک کارتێک بەرامبەر بە تورکیا بەکارهێناوە. ئەڵمانیا بۆ ئەو قەدەغەکارییە لە دژی کوردان، لە بریى ئەوەى پێوەرەکانى دەوڵەتى یاسا بکاتە بنەما، بەرژەوەندییەکانى خۆی کردووەتە بنەما.

چەپەکانى ئەڵمانیاش بوونەتە ئامانجی دەوڵەت

د. ئەلمار میلیچ داکۆکیکاری مافەکانى مرۆڤ لە ئەڵمانیا لەبارەی سیاسەتى ئەڵمانیا لە دژی پەکەکە وتى "ژمارەیەکى زۆر کورد لە ئەڵمانیا دەژین. لەبەر ئەوەش دەوڵەتى ئەڵمانیا قەدەغەکاری و رێگرییەکانی بەشێوەیەکى ورد و پلان بۆ دانراو بەڕێوەدەبات".

دکتۆر میلیچ وتیشی "هەوڵ دەدەین لە کۆنفرانسەکەى رۆژى شەممەدا ستراتیژییەکى هاوبەش و تێکۆشانێکى هاوبەش لە دژی قەدەغەکاریى سەر پەکەکە دەستنیشان بکەین. گفتوگۆ لەسەر ئەوە دەکەین، کە لە رووی یاسایى و بەپێى مافەکان چیمان پێدەکرێت و دەبێت چی بکەین. بە تایبەتیش گفتوگۆ لەسەر نەهێشتى قەدەغەکاری لەسەر سیمبولەکانى پەیەدە، یەپەگە و یەپەژە دەکەین. گفتوگۆش لەسەر ئەو گوشارانە دەکەین، کە لەم دواییانەدا زۆر زیادیان کردووە، چونکە گوشارەکان نەک تەنها بەرامبەر بە کوردان بەڕێوەدەچن، بەڵکو ئەو چەپانەى ئەڵمانیاش کە پشتیوانى لە رۆژئاوا دەکەن، بوونەتە ئامانجی دەوڵەت".

کەسایەتییەکان لە دژی قەدەغەکاریى سەر تێکۆشان بەشداری لە کۆنفرانسەکەدا دەکەن

کۆنفرانسەکە سەر لەبەیانى دەستپێدەکات و تاوەکو ئێوارە بەردەوام دەبێت. چاوەڕێ دەکرێت ئەم کەسایەتییانە لە کۆنفرانسەکەدا وتە و بابەتیان هەبێت و بەشداری لە گفتوگۆکاندا بکەن.

*  ئیدت لۆنئیڤا پارێزەری ئەو سیاسەتمەدارە کوردانە، کە لە ساڵی ١٩٨٨دا لە دوسلدۆرفی ئەڵمانیا دادگایى کران.

*  محەمەد دەمیر سیاسەتمەداری کورد.

*  مۆنیکا مۆرس خەباتکاری کۆمەڵەى ئازادی.

*  پارێزەر جان فریمۆن، کە لە بەلجیکا بەشداریى دانیشتنى دادگا بۆ بەرگریکردن لە پەکەکە بوو و لە ئەنجامدا دادگای باڵاى بەلجیکا بڕیاردا کە 'پەکەکە رێکخستنێکى تیرۆریسى نییە".

* پارێزەر تامارا بوروما بەشداربووی دانیشتنى دادگای یەکێتیى ئەوروپا بۆ بەرگریکردن لە پەکەکە بە ناوی 'بۆ ئەوەى پەکەکە لە لیستى رێکخستنە تیرۆریستییەکانى یەکێتیى ئەوروپادا دەربهێنرێت".

* لوکاس تۆینە پارێزەری سیاسەتمەدارە کوردەکان کە لە ئەڵمانیا زیندانیکراون.

* دکتۆر پییەر شتۆلە سەرۆکی کۆمەڵەى پارێزەرانى کۆماریپارێز.

* یورگن هاپە سەرنووسەری پێشووی بەرنامەى (دەبلیو دی ئاڕ - WDR) لە تەلەفزیۆنى رۆژئاواى ئەڵمانیا WDF)).

* جانسو ئۆزدەمیر پەرلەمانتاری ئەیالەتى هامبورگ.

* هاینەر بوش بەڕێوەبەری کۆمیتەى دیموکراسی و مافە بنەڕەتییەکان.

ر.م