سودانی: قبوڵی ناكەین هیچ وڵاتێك هەڕەشە لە عێراق بكات
سەرۆك وەزیرانی عێراق رایگەیاند، قبوڵی ناكەن هیچ وڵاتێك هەڕەشە لە عێراق بكات و دەشڵێت، “نامانەوێت هیچ وڵاتێك سنووری وڵاتێكی تر ببەزێنێت”.
ئەمڕۆ لە ئوردن كۆنگرەی لوتكەی بەغدای دوو بە بەشداری سەرۆكی فەرەنسا و سەرۆكی وڵاتانی رۆژهەڵاتی ناوەڕاست لە عەممانی پایتەختی ئوردن دەستیپێكرد، كە تایبەتە بە ئاسایشی ناوچەكە و عێراق.
لە كۆنگرەی لوتكەی بەغدای دوودا، محەمەد شیاع سوودانی، سەرۆک وەزیرانی عێراق وتارێکی پێشکەشکرد و وتی:”هیوادارین ئەم لوتكەیە ئەنجامی باش بەدەستبهێنێت و هیوای گەورەمان هەیە، داواش لە وڵاتان دەکەین، هاوكاریمان بكەن بۆ گەڕانەوەی پارەكانی عێراق”.
سوودانی هەڵوێستەی لەسەر دۆسیەی ئاویش کرد و وتی:”بەهۆی كەمیی ئاوەوە لە ژێر هەڕەشەیەكی گەورە داین و كێشەی ئاومان لەگەڵ توركیادا هەیە، داوا لە توركیا و ئێران دەكەین، پشكی ئاوی عێراق بەربدەنەوە”.
وتیشی:”نامانەوێت هیچ وڵاتێك سنووری وڵاتێكی تر ببەزێنێت، هەروەها قبوڵی ناكەین هیچ وڵاتێك هەڕەشە لە وڵاتەكەمان بكات”.
هەر لە كۆنگرەكەدا، ئێمانوێل ماکرۆن، سەرۆكی فەرەنسا قسەی كرد و وتی: سودانی پێیوتین عێراق چی لە ئێمە دەوێت و چارەسەرمان بۆ عێراق پێیە، دەستێوەردانی دەرەكیی لەلایەن هەر وڵاتێك بۆ سەر عێراق ڕەتدەكەینەوە.
دەشڵێت:”لە ئەنجامی دەستێوەردانەكان، خەڵكی بێتاوان دەبنە قوربانی و دەبێت هاوكاربین بۆ پاراستنی سەروەری عێراق، دەمانەوێت لەم لوتكەیەدا بگەینە بڕیار و ئەنجامی باش”.
ف.ق
