دەوڵەتی تورکی داگیرکەر و چەتەکانی لە کانوونی یەکەمی ٢٠٢٤ەوە تاوەکو ئێستا هێرشی بەنداوی تشرین و پردی قەرەقۆزاق دەکەن. شەڕڤانانی یەپەژە، یەپەگە و قەسەدە بە ڕۆحێکی فیدای و شارەزایی سەربازی بەرخۆدان دەکەن و هێرشە داگیرکارییەکان پوچەڵ دەکەنەوە. شەڕڤانانی ئازادی لە بەرەکانی بەرخۆداندا بە جۆشێکی مەزنەوە پێشوازی لە ٨ی ئادار ڕۆژی جیهانی ژنانی کرێکار دەکەن.

شەڕڤانانی یەپەژە ڕۆژبین عەرەب و ڕوناهی چیا سێ مانگە لە بەرەی بەرخۆدانی قەرەقۆزاقدان، لەسەر ٨ی ئادار بۆچوونەکانی خۆیان بۆ ئاژانسی هەواڵی فورات (ANF) دەربڕی.

شەڕڤانی یەپەژە ڕۆژبین عەرەب ٨ی ئاداری لە هەموو ژنان پیرۆز کرد و گوتی: "بەرخۆدان لە ٨ی کانوونی دووەمەوە تاوەکو ئێستا لە لایەن گەلی هەرێمەکە و شەڕڤانان بەڕێوە دەبرێت، هێرشەکانی دووژمن و داگیرکاری پوچەڵ دەکرێتەوە".

ڕۆژبین عەرەب ئاماژەی بەوەشدا هەرچەندە لە لایەن چەتەکان و دەوڵەتی تورکەوە، هەرێمەکە ڕۆژانە بە سەختی بۆمباران دەکرێت بەڵام بەرخۆدانی مێژووی گەل بێپچڕان بەردەوامە.

ڕۆژبین عەرەب سەبارەت بە ٨ی ئادار گوتی: "٨ی ئادار لە تەواوی ژنانی کرێکار جیهان پیرۆز دەکەم. پێویستە ئەم ڕۆژە بۆ هەموو ژنێک ببێت بە ڕۆژی ئازادی".

شەڕڤانی یەپەژە ڕوناهی چیا ئاماژەی بەوەدا سەرەڕای هێرشی سەختی چەتەکان، هەمووساتێک لە ناو بەرخۆداندان و گوتی: "ئەم شەڕەی بەڕێوەدەچێت شەڕی گەلی شۆڕشگێڕە. ئەمەش لە بەرخۆدانی بەنداوی تشرین بە پێشەنگایەتی گەلەکەمان ڕابەری دەکرێت. سەرەڕای ئەوەی لە ئەنجامی تۆپبارانی ڕاستەوخۆدا لەسەر گەل تاوەکو ئێستا بە دەیان شەهید و برینداری لێکەوتۆتەوە، بەڵام گەلەکەمان بە شێوەیەکی بە هێزتر تێدەکۆشن".

ڕوناهی چیا ٨ی ئاداری لە ژنان و هاوڕێیانی تێکۆشانی پیرۆز کرد و گوتی: "ڕۆژی جیهانی ژنانی کرێکار بە تایبەت لە تەواوی ژنان و هەڤاڵانمان لە بەرەکانی شەڕدا بەرخۆدان دەکەن، پیرۆز دەکەم و هیوای سەرکەوتنیان بۆ دەخوازم".