هاوڵاتیانی شاری سلێمانی دژی بەکارهێنانی چەکی کیمیایی گردبوونەوە
هاوڵاتیانی شاری سلێمانی لەدژی بەکارهێنانی چەکی کیمیایی لەلایەن دەوڵەتی داگیرکەری تورک خۆپیشاندانیان ئەنجامدا.
هاوڵاتیانی شاری سلێمانی لەدژی بەکارهێنانی چەکی کیمیایی لەلایەن دەوڵەتی داگیرکەری تورک خۆپیشاندانیان ئەنجامدا.
دەستەی دژی تیرۆر و داگیرکاری لە شاری سلێمانی گردبوونەوەکەی ڕێکخست کە لە چەند رێخراوێک پێکدێت.
هێمن مامەند، ئەندامی دەستەکە پەیامێکی خویندەوە کە تیایدا هاتووە “ئەوە بۆ ماوەی پێنج مانگە فاشیزمی ئەردۆغان بەسوپایەکی زەبەلاح و هەموو تواناکاریەکی تەکنیکی و تەکنۆلۆژیای سەربازیەوە هێرش و داگیرکاری بۆ سەر باشووری کوردستان دەستپێکردووە. هەرێمەکانی پاراستنی میدیا بۆتە ناوەندی ئەو شەڕە و گەریلا و گیانبازانی ئازادیش بە بەرخودانێکی بێوێنە ڕووبەڕووی ئەم هێرش و داگیرکاریە بوونەتەوە و ڕۆژانە داستان و نەبەردی تۆمار دەکەن.”
دەستەکە ڕاشیگەیاند “لوتشکانی سوپای داگیرکەری تورکیا ئەردۆغانی تووشی هستریا کردووە، بۆیە دوور لەهەموو پێوانەیەکی ئەخلاقی و مرۆیی و نێودەوڵەتی پەنای بردۆتە بەر بەکارهێنانی چەکی قەدەغەکراوی کیمیاوی و ڕۆژانە گەریلا و هەرێمەکانی پاراستنی میدیا کیمیاباران دەکرێت. ئەمەش بەبەرچاوی ڕای گشتی جیهان و بێ ئەوەی کۆمەڵگای نێو دەوڵەتی و نەتەوە یەکگرتووەکان، کە خۆیان بڕیاری قەدەغەی بەکارهێنانی ئەم چەکە کۆمەڵکوژەیان داوە، ورتەیان لێوە بێت و بێدەنگیان هەڵبژاردووە”.
دەستەکە لە ڕاگەیەندراوەیەدا دەڵێت: مخابن نەک هەر کۆمەڵگای نێودەوڵەتی بێدەنگیان هەڵبژاردووە بەڵکو لەنێو خۆشدا پەرلەمان و حکومەت و ڕاگەیاندنەکان بەهیچ شێوەیەک باس لەم تاوانە مەزنەی سوپای داگیرکەری تورکیا ناکەن و ئامادە نین بەدواداچوون و ڕووماڵی ئەو هێرشە نائینسانی و دڕندانەی فاشیزمی ئەردۆغان بکەن. بۆیە لێرەوە زۆر بەڕاشکاوی ڕایدەگەیەنین کە بێدەنگی دەسەڵات و حکومەت و پەرلەمانی هەرێمی کوردستان و دەزگاکانی ڕاگەیاندن بەرامبەر بەکارهێنانی چەکی کیمیاوی، پەڵەیەکی ڕەشە بەنێوچاوانیانەوە و نیشانی خیانەت و ڕازیبوونیانە بەو دۆخەی دەگوزەرێت.
لە کۆتایی ڕاگەیەندراوەکەشدا هاتووە: ئەو گیانبازانە چاوەڕوانی پشگیری زلهێزەکان و هێزە وابەستەکانی باشوور ناکەن تا بەدەنگیانەوە بێن، بەڵکو تەنیا و تەنیا چاوەڕوانی پاڵپشتی و پشتگیری لەخەڵکی ئازادیخوازی کوردستان ئەکەن. با ئێمەش مەردانە و بەرپرسیارانە خاوەنداری لەگەریلا نەبەردەکانی هەرێمی پاراستنی میدیا بکەین و لەبەرامبەر ئەم هێرشە هۆڤ و دڕندانەیەی فاشیزمی ئەردۆغان و ئەو بێدەنگیە بێشەرمانەی هەیە، بەتەنیا نەیانهێڵینەوە و هاوار و دەنگی پاڵپشتی بڵند بکەینەوە.
ف.ق