دانیشتوانی كه‌مپی شه‌هید رۆسته‌م جودی (مه‌خمور) به رێپێوانێكی جه‌ماوه‌ری به‌رامبه‌ر به هێرشه‌كانی ده‌وڵه‌تی توركی داگیركه‌ر وه‌ستانه‌وه، كه له رێگه‌ی فڕۆكه‌وه بۆردومانێكی قورسی بۆ سه‌ر كه‌مپه‌كه ئه‌نجامدابوو به هۆیه‌وه دوو كه‌س شه‌هید بوون.
له دژی هێرشه‌كانی ده‌وڵه‌تی توركی داگیركه‌ر كه له رێگه‌ی فڕۆكه‌ی جه‌نگیه‌وه شه‌وی رابردوو په‌لاماری مه‌خمور، شه‌نگال و دێركی دابوو و له مه‌خمور دوو ئه‌ندامی هێزه‌كانی پاراستنی جه‌وهه‌ری شه‌هیدببوون، خه‌ڵكی مه‌خمور رژانه گۆڕه‌پانه‌كان.
دانیشتوانی كه‌مپه‌كه روویان كرده دامه‌زراوه‌ی بنه‌ماڵه‌ی شه‌هیدان له كاتژمێر 11:00 دا ده‌ستیان به رێپێوانێكی جه‌ماوه‌ری كرد.
جه‌ماوه‌ر تا به‌رده‌م نوسینگه‌ی نه‌ته‌وه‌یه‌كگرتووه‌كان رێپێوانیان كرد و به راگه‌یه‌نراوێك هێرشه‌كه‌یان شه‌رمه‌زار كرد.
دواتر دانیشتووانی كه‌مپه‌كه تابه‌رده‌م ناوه‌ندی كولتور و هونه‌ری مه‌خمور رێپێوانیان كرد.
له‌وێ بۆ رێزلێنان له هه‌ر دوو ئه‌ندامه‌كه‌ی هێزی پاراستنی جه‌وهه‌ری مه‌خمور رێوره‌سمێك سازكرا. دانیشتووانی مه‌خمور ته‌رمی هه‌ر دوو شه‌هیده‌كه ده‌بنه گۆڕستان و به مه‌راسیمێك به خاكیان ده‌سپێرن.
هـ . ب
