هاوسه‌رۆكی ئه‌نجومه‌نی خۆبه‌ڕێوه‌به‌ری دیموكراتیكی شه‌نگال خه‌زاڵ ره‌شۆ باسی له مه‌ترسیه‌كانی ئه‌و دیواره‌ی له لایه‌ن به‌غداوه له نێوان شه‌نگال و رۆژئاوا دروست ده‌كرێت كرد و وتی، " بۆ ئه‌وه‌ی ئه‌و دیواره دروست نه‌كرێت چیمان پێبكرێت ده‌یكه‌ین".
له‌لایه‌ن حكومه‌تی كازمیه‌وه له رێگه‌ی دروستكردنی دیواری كۆنكرێتی له نێوان شه‌نگال و رۆژئاوادا كۆمه‌ڵگای ئێزدی دابه‌ش ده‌كرَت. هاوسه‌رۆكی خۆبه‌ڕێوه‌به‌ری دیموكراتیكی شه‌نگال خه‌زاڵ ره‌شۆش داوای هۆشیاری له پێكهاته‌كانی شه‌نگال كرد و ئه‌وه‌ی خسته‌ڕوو كه ئه‌و دیواره بۆ گه‌مارۆدانی شه‌نگاله و وتی، به‌ڕێوه‌به‌رایه‌تی خۆبه‌ڕێوه‌به‌ری له دژی دروستكردنی ئه‌و دیواره‌یه.
ئه‌وه ماوه‌یه‌كه پلانی چه‌په‌ڵ له‌سه‌ر شه‌نگال داده‌ڕێژێن. به‌تایبه‌تی له نێوان رۆژاوا و شه‌نگال جموجۆڵێكی زۆری سوپای عێراق له‌ئارادایه. به پاساوی پاراستنی سنوور به‌رده‌وام هێزه‌كانی عێراق له سنوور ده‌گه‌ڕێن. هه‌روه‌ها له‌م دواییه‌دا ویستبوویان له نێوان گونده عه‌ره‌بی و ئێزدیه‌كان به دووری پێنج كیلۆمه‌تر له سنوور ته‌لبه‌ند دابنێت و هاتووچۆ له نێوان گونده‌كانی عه‌ره‌ب و ئێزدی بپچڕێنن. دوای كاردانه‌وه‌ی گه‌ل ئه‌و بڕیاره تائێستا جێبه‌جێ نه‌كراوه. به‌ڵام له‌لایه‌كی تره‌وه له‌سه‌ر سنووری رۆژئاوا و شه‌نگال دیواری كۆنكرێتی دروست ده‌كرێت. ئه‌و دیواره درێژییه‌كه‌ی ٢٥٠ كیلۆمه‌تره و له‌لایه‌ن لیوای ١٨ی اسه‌وانی سنووری عێراقه‌وه دروست ده‌كرێت. به‌رزی دیواره‌كه ٣ مه‌تر و ٧٥ سانتیمه‌تره.
هاوسه‌رۆكی ئه‌نجومه‌نی خۆبه‌ڕێوه‌به‌ری دیموكراتیكی شه‌نگال خه‌زاڵ ره‌شۆ له‌سه‌ر ئه‌و بابه‌ته قسه‌ی بۆ ئاژانسی هه‌واڵی فورات (ANF) قسه‌ی كرد. خه‌زال سه‌رنجی راكێشا بۆ سه‌ر مه‌ترسی دروستكردنی ئه‌و دیواره له‌سه‌ر پێكهاته‌كانی شه‌نگال وتی، "له كاتی فه‌رمانه‌كه‌دا له‌سه‌ر شه‌نگال به هه‌زاران مرۆڤ له‌گه‌لی ئێمه له‌م سنووره‌وه خۆیان له پاكتاوكاری رزگار كرد. ئێستاش ئه‌و سنووره به ته‌واوی داده‌خرێت. ئه‌وه ده‌بێته مه‌ترسی له‌سه‌ر هه‌موو پێكهاته‌كانی هه‌رێمه‌كه به تایبه‌تی له‌سه‌ر كۆمه‌ڵگای ئێزدی. جیا له‌وه هه‌وڵی ئه‌وه‌شیان هه‌یه كه ناوچه‌كانی ئێزدیه‌كان و عه‌ره‌به‌كان له‌یه‌ك داببڕن".
خه‌زاڵ باسی له‌وه‌كرد، كه ئه‌و دیواره نه‌ك بۆ پاراستنی سنوور، به‌ڵكوو بۆ گه‌مارۆدانی شه‌نگاله و وتی، "ئه‌گه‌ر ده‌یانه‌وێت سنوور كۆنتڕۆڵ بكه‌ن، با ته‌واوی سنووره‌كانی عێراق توند و به‌هێز بكه‌ن، نه‌ك ته‌نیا شه‌نگال. به هۆی ئه‌وه‌ی ئه‌و دیواره ته‌نیا له نێوان شه‌نگال و رۆژئاوادایه. به‌و جۆره دیاره كه ئه‌و گه‌مارۆیه جێبه‌جێ كردنی رێككه‌وتنی ٩ی تشرینی یه‌كه‌مه‌وه. عێراق به شێوه‌یه‌كی سه‌ربه‌خۆ و ته‌نیا ئه‌و پلانه‌ی دانه‌ڕشتووه. به هاوكاری ده‌وڵه‌تی تورك و په‌ده‌كه ده‌یكات".
ره‌شۆ له درێژه‌دا سه‌رنجی راكێشا بۆ سه‌ر زیندوبوونه‌وه‌ی داعش و وتی: "ئایا له ٣ی ئابی ٢٠١٤دا داعش له كوێوه‌هات؟ ئێمه ده‌بینین له ناو عێراقدا داعش هه‌سه، نه‌ك له‌سه‌ر سنوور. با عێراق بپارێزن، باشوری عێراق بپارێزن و رێگری له چه‌ته‌كان بكه‌ن. داعش لێره خۆی رێكناخاته‌وه، به‌ڵكوو ناو عێراقدایه.
به داخستنی ئه‌و سنووره مه‌ترسی بۆ سه‌ر گه‌له‌كه‌مان دروست ده‌بێت و ئێمه گه‌مارۆ ده‌درێین. هه‌موو كه‌س ده‌زانێت ئه‌وانه‌ی له شه‌نگال خۆڕاگرییان كردووه، به هیچ جۆرێك ناتوانن سه‌ردانی باشوری كوردستان بكه‌ن. له‌به‌ر ئه‌وه‌ی ئێمه خۆمان راده‌ستی ئه‌وان نه‌كردووه. ئێمه وه‌ك به‌ڕێوه‌به‌رایه‌تی خۆبه‌ڕێوه‌به‌ری شه‌نگال له پێناو ئه‌وه‌ی ئه‌و دیواره دروست نه‌كرێت، چیمان پێبكرێت ده‌یكه‌ین. ئامانجمان ئه‌وه نییه پشێوی بنێینه‌وه، به‌ڵام ئێمه ده‌مانه‌وێت له‌سه‌ر خاكی خۆمان به ئازادی بژین و له گه‌مارۆدا نه‌بین.
هاوسه‌رۆكی ئه‌نجومه‌نی خۆبه‌ڕێوه‌به‌ری شه‌نگال خه‌زاڵ ره‌شۆ له‌باره‌ی پلانه‌كان له‌سه‌ر سنوور بانگه‌وازی وشیاری ئاراسته‌ی پێكهاته‌كانی شه‌نگال كرد و وتی، "ئه‌مڕۆ هه‌ڕه‌شه و مه‌ترسیه‌كی گه‌وره له‌سه‌ر شه‌نگال هه‌یه. با گه‌له‌كه‌مان بزانێت ئه‌م دیواره نایانپارێزێت. ده‌وێت گه‌له‌كه‌مان له دژی دروستكردنی ئه‌و دیواره بوه‌ستنه‌وه. ئه‌وانه‌ی سنووریان ده‌پاراست هه‌ر ئه‌وانه داعشیان ئاودیو ده‌كرد. ئه‌وه پلانێكی چه‌په‌ڵه و با گه‌له‌كه‌مان به‌وه نه‌خه‌ڵه‌تێن".
هـ . ب
