ئاهەنگی نەورۆز لە ڕحا بە درووشمی "ڕاپەڕە کاتی ئازادی و سەرکەوتنە" لە یاریگای ١١ ی نیسان ئەنجامدرا، هەزاران کەس بەشداربوون. هاوڵاتیان بە جلوبەرگی کوردی و ئاڵای سەوز و سور و زەردەوە گەیشتنە گۆڕەپانی نەورۆز.

هاوڵاتیان گۆرانیان چڕی، درووشمی "بژی بەرخۆدانی زیندان" و "ژن، ژیان، ئازادی" و "بژی نەورۆز" و "بژی سەرۆک ئاپۆ"یان بەرزکردەوە. هەروەها پانکارتی "ڕاپەڕە، کاتی ئازادی و سەرکەوتنە" و "نەورۆز پیرۆز بێت"یان هەڵواسی.

برای ڕێبەری گەلی کورد عەبدوڵا ئۆجالان، محەمەد ئۆجالان و ئەندامانی مەجلیسی دایکانی ئاشتی ڕحا، عایشە چیچەک، خوشکی یەک لە سیمبولەکانی بەرخۆدانی ڕۆژووی مەزنی مردنی ١٤ ی تەمموز عەلی چیچەک، بەشداری ئاهەنگەکە بوون.

لەسەر ناوی تەڤگەری ژنانی ئازاد (تەژەئا) ساڵیحە ئایاتا ڕایگەیاند ژنانی کورد بە ئایدۆلۆژیای خۆیان بوونە پێشەنگ و نموونە، گوتی: "ئەم ئایدۆلۆژیایە گۆشەگیری ئیمراڵی دەشکێنێت، بەتایبەت نەورۆزی ژنانی کورد لە زیندان پیرۆز بێت. ئەم قەیومانە دەنێرینەوە و بە سیستەمی هاوسەرۆکایەتی شارەکانمان بەڕێودەبەین. ئەم سەدەیە دەبێتە سەدەی ژنانی بەرخۆدەر".

پاشان پەرلەمانتاری دەم پارتی ڕحا، عومەر ئۆجالان گوتی: "نەورۆزی ڕێزدار ئۆجالان پیرۆز بێت. گەلی ڕحا لێرەیە. لە ڕێگەی ڕاست دەڕۆین. ڕۆحی سەید ڕەزا و شێخ سەعید و قازی محەمەد شاد بێت. لە چوار پارچەی کوردستان شەڕ هەیە. ڕێگەی ئیمراڵی بکەنەوە و با ڕێزدار ئۆجالان قسە بکات و چارەسەر بێتەدی. گەلی دەیەوێت ڕێگەی ئاشتی بکاتەوە. دەمانەوێت لەسەر خاکی کوردستان بەشێوەیەکی ئازاد و خوشک و برایەتی بژین. بۆ ئەوەش موخاتەب ئیمراڵییە. موخاتەب بەڕێز ئۆجالانە".

پەرلەمانتاری دەم پارتی ئیستەنبوڵ، سیری سورەیا ئۆندەر بەهۆی ڕەوشی تەندروستییەوە بەشداری نەکرد و لەڕێگەی پەیامێکی ڤیدیۆییەوە نەورۆزی پیرۆز کرد.

هەروەها سیاسەتمەداری کورد، عوسمان بایدەمیر پەیامێکی ڤیدیۆیی نارد و نەورۆزی لە هەمووان پیرۆز کرد.

ئاهەنگەکە بە گۆرانی و هەڵپەڕکێ بەردەوامە.