ئەمڕۆ، لە سەنتەری ڕۆشنبیریی شاری کەرکووک، لەلایەن چەند گرووپ و چالاکوانێکی مەدەنی شارەکەوە، لە کونگرەیەکی ڕۆژنامەوانیدا هەڵمەتی کۆکردنەوەی هاوکارییان بۆ ڕۆژئاوای کوردستان دەستپپێکرد.

لە کۆنگرەکەدا ئاماژە بەوەدرا، وەک کۆمەڵێک گرووپ و چالاکوانی مەدەنی و کەسایەتی شاری کەرکووک، هەستاوین بە ڕاگەیاندنی هەڵمەتێکی کۆکردنەوەی هاوکاری بۆ خوشک و براکانمان لە ڕۆژئاوای کوردستان، ئێمەی کەرکووکی سەختی و ئاوارەیی زۆرمان بینیوە داواکارین لە هاوڵاتییانی شاری کەرکووک بە گڕوتینەوە بەشداری بکەن لە هاوکاری کردنی براکانمان لە ڕۆژئاوای کوردستان.

لە بارەی شوێنی هەڵمەتەکەوە ئەوەیان خستەڕوو، لە هەنگاوی یەکەمدا، لە سەنتەری ڕۆشنبیری شاری کەرکووکەوە دەستمان پێکردووە، لەلایەن چەند گەنجێکی خۆبەخشی شارەکەوە پڕۆسەی کامپینەکە بەڕێوەدەچێت و چاودێری پڕۆسەکە دەکەین لە ئەگەری بەشداریکردنی بەرفراوانی هاوڵاتییان، لە هەڵمەتەکە لە شار و شارۆچکە و گەڕەکەکانی شارەکە، شوێنی ئەنجامدانی هەڵمەت و کۆکردنەوەی هاوکاریی زیاد دەکەین.

'داخستنی دەروازەی سنووری سێمێلکا، ڕێگرە لە گەیاندیی کەلوپەلەکان'

لەبارەی ڕێکارەکانی کۆکردنەوەی هاوکاری تیشکیان خستەسەر ئەوەی، بەهۆکاری داخستنی دەروازەی سێمێلکا، کە دەروازەکە دەکەوێتە نێوان باشوور و ڕۆژئاوای کوردستان، ناتوانرێت هاوکاری خۆراک و جلوبەرگ و پێداویستیەکانی دیکە ڕەوانەی ڕۆژئاوا بکرێت، هەر بۆیە لە ئێستادا تەنها پارە کۆدەکرێتەوە، دوای بەستنی پەیوەندی لە نێوان باشوور و ڕۆژئاوادا دەگەیەندرێتە دەستیان.

هەروەها ئەو چالاکوانانە پەیامێکیان ئاڕاستەی کوردانی شاری کەرکووک کرد و داوایان کرد هاوشێوەی هەڵمەتەکانی ڕابردوو، کە بۆ کوردانی باکوور و پارچەکانی دیکە ئەنجامدراوە بەشێوەیەکی بەرچاو بەشداریی بکەن لە هەڵمەتەکە و هاوکاریکردنی ڕۆژئاوا بکەن.

لە پاش کۆنگرەکە سەرپەرشتیارانی کامپینەکە بڕیاریاندا ژمارە بانکییەکی تایبەت بەهەڵمەتەکە درووست بکەن بەمەبەستی کۆکردنەوەی هاوکاری کوردانی دەرەوەی باشووری کوردستان، هەروەها لە ڕێگەی هەردوو سیستەمی جزدانی ئەلیکترۆنی  fastpay و FIB دەتوانرێت هاوکاری بگەیەنرێت بە هەڵمەتەکە.