شەنگال

لە چەند ناوەندێکی شەنگال ئاگری نەورۆز کرایەوە. لە خانەسۆر گەنجان بەدەم گۆرانیی شۆڕشگێڕییەوە هەڵپەڕکێیان کرد. ئەندامی مەجلیسی گەلی خانەسۆر حاجی کولی نەورۆزی ئازادی لە ڕێبەری گەلی کورد عەبدوڵا ئۆجالان و هەموو گەلی کورد پیرۆز کرد، داوای کرد نەورۆز ببێتە نەورۆزی ئازادی گەلانی بندەست.

هاوڵاتیان لە شارۆچکەی گوبەل کۆبوونەوە و ئاگری نەورۆزیان کردەوە، درووشـمی "بێ سەرۆک ژیان نابێ" و "بژی سەرۆک ئاپۆ" یان بەرزکردەوە، لەدەوری ئاگرەکە تا درەنگانی شەو هەڵپەڕین.

ئامەد

پلاتفۆرمی پاراستن و پشتیوانی شاری ئامەد لە قەڵای ئامەد پێشوازی نەورۆزیان دەست پێ کرد، بە زاراوەکانی کورمانجی و کورمانجکی و زمانی تورکی ڕاگەیاندراو خوێنرایەوە، تێیدا ئاماژە بەوە کراوە لە هەرێمەکەدا نەورۆز لەژێر زوڵم و ستەمێکی ناڕەوادا بەردەوامە.

ئاماژە بەوە کراوە، نەورۆزی ٢٠١٣ هیوای چارەسەری پرسی کوردی خوڵقاند، بەڵام پێچەوانەکەی جێبەجێ کرا، لە وڵاتەکەدا دیسان باس لە مەرگ و خوێن و وێرانکاری و کۆچبەری دەکرێت.

لە ڕاگەیاندراوەکەدا دیسانەوە بانگەوازکراوە پرسی کورد بەشێوەیەکی دیموکراتیک و ئاشتیانە چارەسەر بکرێت.

ئاگری

لە گەڕەکی جەزاوی ئاگری نەورۆز کرایەوە و بانگەوازکرا بۆ بەشداربوون لە نەورۆزی ئاگری لە ٢٥ ی ئادار. جەماوەر بەردەوام درووشمی "بژی سەرۆک ئاپۆ" و "پەکەکە گەلە، گەل لێرەیە"یان بەرزکردەوە.

کاندیدی دەم پارتی ئاگری، هەزەل ئاراس ڕایگەیاند بڕوامان وایە لە هەڵبژاردنی ٣١ ی ئادار گەلەکەمان بڕیاری ڕاست دەدەن و پێکەوە سەردەکەوین.

کاندیدی هاوسەرۆکی شارەوانی دەم پارتی لە ئاگری، محەمەد ئاکوش بانگەوازی لە هەموو دانیشتووانی شارەکە کرد، بەشداربن لە نەورۆزی مەزنی ئاگری و گردبوونەوەی کۆتایی ٢٥ ی ئادار لە ئاگری.