له زۆر شار هێرشه‌كانی سه‌ر هه‌ده‌په شه‌رمه‌زار كران
ئۆپراسیۆنه‌كانی پاكتاوی سیاسی له دژی هه‌ده‌په له زۆر شار شه‌رمه‌زار كران.
ده‌وڵه‌تی تورك له ١٢ی نیساندا له ژێر ناوی لێپرسینه‌وه‌ی كۆبانێ‌دا له ١٣ شار ئه‌ندامان و به‌ڕێوه‌به‌رانی هه‌ده‌په‌ی كردووه‌ته ئامانج، له باره‌ی ٩١ كه‌سه‌وه بڕیاری ده‌ستگیركردنی داوه و به ده‌یان كه‌س ده‌ستگیركراون. به تایبه‌تی بینای هه‌ده‌په‌ی جزیر له‌لایه‌ن پۆلیسه‌كانه‌وه تاڵان كراوه. ئه‌و هێرشانه له چه‌ندین شار شه‌رمه‌زار كران.
ئامه‌د
له ئامه‌د له‌به‌رده‌ممۆنۆمێنتی مافه‌كانی مرۆڤ له پاركی كۆشیوڵو كۆنفرانسی رۆژنامه‌وانی به‌سترا. په‌رله‌مانتارانی هه‌ده‌په دێرسیم داغ، ئیمام تاشچه‌ر و هاوسه‌رۆكانی شاره‌كه‌ش له نێویاندا به‌ڕێوه‌به‌رانی ده‌به‌په‌ش به‌شداری كۆنفرانسه رۆژنامه‌وانییه‌كه بوون.
له كۆنفرانسه رۆژنامه‌وانیه‌كه‌دا سه‌ره‌تا هاوسه‌رۆكی هه‌ده‌په‌ی ئامه‌د زه‌یاد جه‌یلان قسه‌ی كرد و باسی له‌وه‌كرد، كه له ساڵی ٢٠١٥ه‌وه له دژی پارته‌كه‌یان هه‌زاران ئۆپراسیۆن به‌ڕێوه‌چوون و وتی، "له‌و ئۆپراسیۆنانه‌دا هه‌زاران هه‌ده‌په‌یی ده‌ستگیركران و له هه‌مان كاتدا هه‌زاران هه‌ده‌په‌ییش زیندانی كران. ئامانجی ده‌سه‌ڵاتی ئاكه‌په-مه‌هه‌په ئه‌وه‌یه كه هه‌ده‌په بێكاریگه‌ر بكه‌ن و نه‌هێڵن سیاسته‌تی دیموكراتیك به‌ره‌وپێش بچێت. كۆمه‌ڵگا كوشتنی خۆی و شه‌ڕ ناوێت. هێرشه‌كانی ده‌سه‌ڵات نه‌ك له رووی به‌هێزیه‌وه‌یه‌تی، به‌ڵكو له رووی لاوازیه‌تی. چی ده‌بێت با ببێت ئاكه‌په- مه‌هه‌په گه‌یشتوونه‌ته ئاستی كۆتاییهاتن. ئه‌وه‌ی زیانی به‌رده‌كه‌وێت ئه‌وانن ئه‌وه‌شی كه قازانج ده‌كات سیاسه‌تی هه‌ده‌په و داموده‌زگاكانی كۆمه‌ڵگای دیموكراتیكه".
دوای قسه‌كانی زه‌یاد جه‌یلان په‌رله‌مانتار دێرسیم داغیش قسه‌ی كرد و "لێپرسینه‌وه‌ی كۆبانێ"ی وه‌ك "ساخته‌كاری و فرت و فێڵ" پێناسه كرد و وتی، "ده‌سه‌ڵات به 'لێپرسینه‌وه‌ی كۆبانێ'ده‌یه‌وێت ده‌ستكه‌وته‌كانی گه‌لی كورد له‌ناو ببات. له كۆبانێ داعش زیانی به‌ركه‌وت و شكستیهێنا. ده‌سه‌ڵاتی ئاكه‌په ئه‌وه‌ی پێقبوڵ ناكرێت و له‌به‌ر ئه‌وه‌ش هێرشده‌كاته سه‌ر گه‌لی كورد. و ده‌یه‌وێت تۆڵه‌ی داعش له كورد بكاته‌وه. ئاكه‌په-مه‌هه‌په به‌و ئۆپراسیۆنانه ده‌یانه‌وێت تێكۆشانی كوردان قه‌ده‌غه و نایاسایی بكه‌ن. به‌ڵام وه‌ك چۆن داعش شكستی هێنا ئاكه‌په-مه‌هه‌په‌ش شكست ده‌هێنن".
رحا
رێكخستنی هه‌ده‌په‌ی شای رحاش له به‌رده‌م بینای خۆیان كۆنفرانسی رۆژنامه‌وانیان ساز كرد و گوشاره‌كانیان شه‌رمه‌زار كرد. په‌رله‌مانتارانی هه‌ده‌په‌ی رحا ئایشه سوروجو و عومه‌ر ئۆجالان و چه‌ندین كه‌سی تر به‌شدارییان له كۆنفرانسه رۆژنامه‌وانییه‌كه‌دا كرد.
هاوسه‌رۆكی هه‌ده‌په‌ی رحا زیا چالشكان باسی له‌وه‌كرد، كه ده‌سه‌ڵاتی ئاكه‌په-مه‌هه‌په بۆ ئه‌وه‌ی تێكۆشانی هه‌ده‌په له به‌رچاوی گه‌لی كورد ره‌ش بكات، ئه‌و گوشارانه په‌یڕه‌و ده‌كات و ئه‌و گوشارانه‌ش سه‌رناگرن.
په‌رله‌مانتار عومه‌ر ئۆجالانیش باسی له‌وه‌كرد، ئه‌وان زۆر ترس و گوشاریان تێپه‌ڕاندووه و رایگه‌یاند، "ئه‌و بیركردنه‌وه چه‌ته‌گه‌ریه تێكده‌چێت و ئێمه سه‌رده‌كه‌وین. ئێمه ره‌واین و ده‌بێت رێز له ئیراده‌ی گه‌ل بگیرێت".
مێردین
رێكخستنی هه‌ده‌په‌ی شاری مێردین له‌به‌رده‌م بینای خۆیان كۆنفرانسی رۆژنامه‌وانیان ساز كرد و ده‌ستگیركردنه‌كان و گوشاره‌كانی سه‌ر بینای هه‌ده‌په‌ی جزیره‌یان شه‌رمه‌زار كرد. ژماره‌یه‌كی زۆر له به‌ڕێوه‌به‌ران و ئه‌ندامانی هه‌ده‌په به‌شدارییان له كۆنفرانسه رۆژنامه‌وانییه‌مه‌دا كرد و پلاكاردی "هه‌ده‌په ده‌پارێزین"یان به‌رزكرده‌وه.
هاوسه‌رۆكی هه‌ده‌په‌ی مێدین په‌ریخان ئاغائۆغڵو باسی له‌وه‌كرد، كه ئامانجی هێرشه‌كانی ئاكه‌په و مه‌هه‌په ئه‌وه‌یه كه هه‌ده‌په سیاسه‌ت نه‌كات و وتی، "هه‌ده‌په رێگه‌ی سێهه‌مه. هه‌ده‌په هزر و رامانێكه. هه‌ده‌په ئازادیه. هه‌ده‌په هیوای گه‌لانه. ئێوه ناتوانن ئیراده‌ی گه‌لان ئاسته‌نگ بكه‌ن و ئێمه فاشیزمی ده‌سه‌ڵاتداری شه‌رمه‌زار ده‌كه‌ین، ئێمه هه‌بووین، ئێمه هه‌ین و هه‌ر ده‌بین".
هاوسه‌رۆكی هه‌ده‌په‌ی مێردین ساڵح كودایش وتی، كه گه‌لی كورد به‌رامبه‌ر ئه‌و گوشارانه‌ش سه‌ر دانانه‌وێنێت و تێكۆشانی ئه‌وان سه‌رده‌كه‌وێت.
ئیسكه‌نده‌رون
رێكخستنی ناوچه‌ی ئیسكه‌ندرونی هه‌ده‌په‌ش له بینای خۆی گوشاره‌كانی سه‌ر پارته‌كه‌ی شه‌رمه‌زار كرد. هاوسه‌رۆكی ئه‌سكه‌نده‌رون عه‌بدولره‌حیم شاهین باسی له‌وه‌كرد، كه ئه‌وان له دژی دۆسیه‌كانی فرت و فێل و ساخته‌كاری ده‌وه‌ستنه‌وه و تێكۆشانی خۆیان درێژه پێده‌ده‌ن. شاهین داوای كرد ئه‌و كه‌سانه‌ی ده‌ستگیركراون ده‌ستبه‌جێ ئازاد بكرێن.
مێرسین
رێكخستنی هه‌ده‌په‌ی مێرسینیش له پاركی منداڵانی ئازاد كۆنفرانسی رۆژنامه‌وانی سازكرد و نوێنه‌رانی پارته سیاسیه‌كان، سه‌ندیكا، كۆمه‌ڵه و چه‌ندین كه‌س به‌شدارییان له كۆنفرانسه‌كه‌دا كرد و پلاكاردی "گوشاره‌كان ناتوانن بێزارمان بكه‌ن" هه‌ڵدرا. هاوسه‌رۆكی هه‌ده‌په‌ی مێرسین به‌دریه كوش رایگه‌یاند، كه ئه‌و له دژی گوشاره‌كان خۆڕاگری ده‌كه‌ن و هه‌ده‌په سه‌رده‌كه‌وێت.
هـ . ب
