'له‌سه‌ر داوای ده‌وڵه‌تی تورك و په‌ده‌كه گوشار ده‌خرێته سه‌ر مه‌خمور'
ئه‌ندامی كۆمیته‌ی په‌یوه‌ندییه‌كانی ده‌ره‌وه‌ی مه‌خمور سه‌عید چۆمله‌ك وتی، له ژێر گوشاری په‌ده‌كه و ده‌وڵه‌تی تورك، عێراقیش گوشاری قورسی خستووه‌ته‌سه‌ر خه‌ڵكی مه‌خمور.
ئه‌ندامی كۆمیته‌ی په‌یوه‌ندییه‌كانی ده‌ره‌وه‌ی كه‌مپی په‌نابه‌رانی شه‌هید رۆسته‌م جودی (مه‌خمور) سه‌عید چۆمله‌ك هه‌ڕه‌شه‌كانی داعش له‌سه‌ر مه‌خمور، گوشاری عێراق و دۆخی ئه‌م دواییه‌ی مه‌خموری بۆ ئاژانسی هه‌واڵی فورات (ANF) هه‌ڵسه‌نگاند.
چۆمله‌ك به بیری هێنایه‌وه، كه چه‌ندین ساڵه گوشار، گه‌مارۆ و ئاسته‌نگی به سه‌ر كه‌مپه‌كه‌دا ده‌سه‌پێنرێت، له‌و رۆژه‌وه‌ی بوونه په‌نابه‌ر تائێستا به‌رده‌وام دوو ئاسته‌نگی و رێگریی گه‌وره له‌به‌رده‌میان دانراوه و وتی، "یه‌ك له‌وانه ده‌وڵه‌تی توركه و ئه‌وه‌ی دیكه‌ش په‌ده‌كه‌یه. چه‌ندین ساڵه ئه‌و دوو هێزه هێرش ده‌كه‌نه سه‌ر ئێمه. وێڕای ئه‌و گوشارانه هه‌روه‌ها به‌رده‌وام هێرشی ئاسمانی ده‌وڵه‌تی توركیش ئه‌نجام ده‌درێت. سێ ساڵه پارتی دیموكراتی كوردستان (په‌ده‌كه) گه‌مارۆی به‌سه‌ر ئێمه‌دا سه‌پاندووه. ئه‌و گه‌مارۆیه له هه‌مان كاتدا له رووی سیاسی، ئابوری و كۆمه‌ڵایه‌تیشه‌وه كاریگه‌ری له‌سه‌ر گه‌له‌كه‌مان داناوه. نیگه‌رانی ئه‌وه له ئارادایه كه هێرشی نوێ له دژی كه‌مپه‌كه‌مان ئه‌نجام بدرێت".
چۆمله‌ك سه‌رنجی راكێشا بۆ سه‌ر هه‌وڵه‌كانیان بۆ دۆزینه‌وه‌ی رێگه‌ی نوێ بۆ دابینكردنی پێداویستی دانیشتوانی كه‌مپه‌كه و وتی "له دوو ساڵی رابردوودا هه‌وڵمان داوه رێگه‌ی نوێ بدۆزینه‌وه. بۆ ئه‌وه‌ی وه‌ڵامی پێداویستییه‌كانی گه‌له‌كه‌مان بده‌ینه‌وه. تائاستێك ئه‌و هه‌وڵانه سه‌ریان گرتووه. به تایبه‌تی ئێمه له موسڵ، به‌غدا و به‌سڕا له هه‌ندێك ناوچه ده‌رفه‌تمان دۆزیه‌وه كه كاری تێدا بكه‌ین. له‌به‌ر ئه‌وه‌ی هێڵی كه‌ركوك به رووی كرێكاران و گه‌ل داخراوه، دانیشتووانی هه‌رێمه‌كه ناتوانن بچنه سلێمانی. هه‌ر بۆیه چووینه موسڵ، به‌غدا، به‌سڕا و هه‌ندێك ناوچه‌ی دیكه‌ی عێراق. جار جار له‌و شوێنانه‌ش ئاسته‌نگمان بۆ دروست ده‌كه‌ن. بۆ رۆیشتن بۆ شاره‌كانی دیكه‌ی عێراق رێگه‌یه‌كی ترمان نییه".
هه‌ڕه‌شه‌ی داعش هه‌میشه له ئارادایه
چۆمله‌ك ئاماژه‌ی به هه‌ڕه‌شه‌ی چه‌ته‌كانی داعش بۆ سه‌ر مه‌خمور و ده‌وروبه‌ری كرد و له درێژه‌دا وتی، "هه‌ڕه‌شه‌ی داعش بۆ سه‌ر هه‌رێمه‌كه جار جار كه‌مبوو، به‌ڵام قه‌ت كۆتایی نه‌هاتووه. ئه‌وه‌ش مایه‌ی نیگه‌رانیه، بۆچی جار جار هه‌ڕه‌شه و مه‌ترسی كه‌م ده‌بێت و جار جاریش زیاد ده‌بێت؟ هه‌وڵێك هه‌یه كه رێگه بۆ داعش بكه‌نه‌وه. هه‌ر بۆیه هه‌ڕه‌شه‌ی داعش هه‌میشه له ئارادایه. به‌شێكی زۆری جموجۆڵه‌كانی داعش له‌و ناوچانه‌دایه كه له ژێر ده‌ستی په‌ده‌كه‌دایه. خه‌ڵكی ناوچه‌كه ئاگاداری ئه‌وه‌ن. هه‌ر وه‌ها له باره‌ی ژیان، جموجۆڵی ئه‌وان زانیاری له‌به‌رده‌تی ئێمه‌دایه. ئه‌وه‌ش له په‌یوه‌ندییه‌كان له‌گه‌ڵ كاربه‌ده‌ستانی عێراق ئاشكرا ده‌بێت. كاربه‌ده‌ستانی عێراق له بابه‌تی جموجۆڵی داعش له هه‌رێمه‌كه هۆشداریمان پێده‌ده‌ن و ده‌ڵێن كه ده‌بێت بتوانن خۆتان بپارێزن.
ئێمه له ژێر پاراستنی عێراقداین. عێراق ده‌توانێت بمانپارێزێت. ئێمه ده‌زانین كه چۆن ده‌توانین خۆمان بپارێزین. هه‌ڕه‌شه‌كانی داعش له رۆژانی رابردووشدا زیادیان كردووه. مه‌ده‌نییه‌كان و شانه‌كان ده‌ڕفێنن. به‌تایبه‌تی له‌سه‌ر رێگای سه‌ره‌كی. هه‌ڕه‌شه‌ی داعش به به‌رده‌وامی له‌سه‌ر ئێمه بوونی هه‌یه. ئامانجی داعش ئێمه‌ین. له‌و كاته‌وه‌ی بزوتنه‌وه‌ی ئازادی كورد له رۆژئاوا داعشی تێكشكاند تائێستا داعش به به‌رده‌وام هێرش ده‌كاته سه‌ر ئێمه. بۆ ئه‌وه‌ی بتوانن كۆمه‌ڵكوژی گه‌وره بكه‌ن، دوو جار په‌لاماری كه‌مپه‌كه‌یان داوه. له سایه‌ی وریایی و به‌رخودانی گه‌له‌وه شكستیان هێنا".
ده‌وڵه‌تی تورك له دژی مه‌خمور عێراق هان ده‌دات
چۆمله‌ك باسی له‌وه‌كرد، كه په‌ده‌كه و توركیا، عێراق له دژی خه‌ڵكی مه‌خمور هان ده‌ده‌ن و وتی، "هێرشه‌كان بۆ سه‌ر بزوتنه‌وه‌ی ئازادی بۆ سه‌ر ئێمه‌ش ئه‌نجام ده‌درێن. به‌رده‌وام ئێمه ده‌كه‌نه ئامانجی هێرشه‌كان. سه‌رباری ئه‌وه‌ی ئێمه له ژێر ده‌سه‌ڵاتی عێراق و له ژێر پارێزگای نه‌ته‌وه‌یه‌كگرتووه‌كانداین، توركیا هێرشی كرده سه‌ر كه‌مپه‌كه و هێشتاش هێرش ده‌كات. عێراق یه‌كده‌ست نییه، خاوه‌نی هێزی جیاجیایه. توركیا كاریگه‌ری ده‌كاته سه‌ریان و له دژی ئێمه هانیان ده‌دات. له كاتێكدا كه‌س چاوه‌ڕێی نه‌ده‌كرد، پێمان راگه‌یه‌نرا كه به ته‌ل ده‌وروبه‌ری كه‌مپه‌كه ده‌گرن. له سایه‌ی ناڕه‌زایه‌تی و هه‌ڵوێستی گه‌ل راگیرا. ئێمه پێمان وتن، كه ئێمه شتێكی له‌و جۆره به سوكایه‌تی ده‌بینین و ئێمه هه‌رگیز قبوڵی ناكه‌ین.
چه‌ندین ساڵه ئێمه له هه‌لومه‌رجی دژوارداین، به‌ڵام ئێمه هه‌رگیز هه‌موو شتێكمان قه‌بوڵ نه‌كردووه. هه‌ندێك شت هه‌یه كه ئێمه ده‌توانین قه‌بوڵی بكه‌ین، هه‌ندێكیش هه‌ن كه قه‌بوڵی ناكه‌ین. ئێمه له‌گه‌ڵ كاربه‌ده‌ستانی نه‌ته‌وه‌یه‌كگرتووه‌كان له موسڵ دیدارمان ئه‌نجامدا بۆ ئه‌وه‌ی تێبگه‌ین. ئێمه له‌گه‌ڵ ئه‌وان باسمان له پرسی گه‌مارۆدانی كه‌مپه‌كه به ته‌ل كرد، وتیان كه ئاگاداری بابه‌تێكی له‌و جۆره نین و مافی ئێمه‌یه كه دۆخێكی به‌و جۆره قه‌بوڵ نه‌كه‌ین. نه‌ته‌وه‌یه‌كگرتووه‌كان باسی له‌وه‌كرد، كه ئه‌وان له بابه‌تێكی به‌و جۆره‌دا به‌شدار نین. جه‌ختیان كرده‌وه كه ئه‌و دۆخه جێگه‌ی قبوڵ كردن نییه".
ئێمه له‌گه‌ڵ خه‌ڵكی شه‌نگالداین
ئه‌ندامی كۆمیته‌ی په‌یوه‌ندییه‌كانی ده‌ره‌وه‌ی مه‌خمور سه‌عید چۆلمه‌ك باسی له‌وه‌كرد، له‌سه‌ر داوای په‌ده‌كه و ده‌وڵه‌تی تورك له شه‌نگال دیوار دروست ده‌كرێت و وتی، "ئێمه ئه‌و دیواره‌ی له شه‌نگال دروست ده‌كرێت قبوڵ ناكه‌ین و له‌گه‌ڵ خه‌ڵكی شه‌نگالداین. گه‌مارۆ و ئابڵۆقه جێگه‌ی شه‌رمه‌زارییه. هه‌ڵوێستی خه‌ڵكی شه‌نگال له دژی دروستكردنی دیوار زۆر ره‌وا و له‌جێدایه. زۆر نا لۆژیكیه كه له مه‌خمور دیوار یان ته‌لبه‌ند دابنرێت. هه‌رگیز زیانمان به هه‌رێمه‌كه نه‌گه‌یاندووه.
هه‌ر بۆیه ئه‌وه‌ی ده‌كرێت راست نییه. كاتێك بینیمان كه به‌ده‌وری كه‌مپه‌كه‌وه ته‌لبه‌ند ساز ده‌كرێت هه‌ستایه‌نه سه‌ر پێ. دروست نییه كه كه‌مپی شه‌هید رۆسته‌م جودی قه‌ده‌غه بكرێت. ئێمه ئه‌وه قبوڵ ناكه‌ین. ئێمه ده‌زانین ئه‌وه له‌سه‌ر داوا و گوشاری ده‌وڵه‌تی تورك و په‌ده‌كه ده‌كرێت. ئێمه ئاماده‌ین به هه‌موو جۆرێك كاری یاسایی بكه‌ین. دروستكردنی ته‌لبه‌ند و دیوار نایاسایین. ئێمه هه‌موو كات دژی ئه‌وه ده‌وه‌ستینه‌وه".
هـ . ب
