لە گوندەواری شەنگال بۆ یەکەمجار دەربارەی واتای نەورۆز سیمینارێک بۆ گەلی عەرەب ڕێکخرا. بەشدارانی سیمینارەکە گوتیان: "لەڕێگەی پارادایمی ڕێبەر ئاپۆوە نەورۆزمان ناسی. بەهیواین ئەم نەورۆزە ببێتە نەورۆزی ئازادی ڕێبەر ئاپۆ".
لە گوندەواری شەنگال بۆ گەلی عەرەب سیمینارێک دەربارەی واتای نەورۆز ڕێکخرا. ئەمە یەکەمجارە سیمینارێکی لەم جۆرە بۆ گەلی عەرەبی ناوچەکە ڕێک دەخرێت.
هاوسەرۆکی مەجلیسی گوندەواری عەرەبا، ئەبو سەغیر نەورۆزی پیرۆز کرد و ڕایگەیاند ئامانجیان ناساندنی نەورۆزە بە گەل، نەوەک هەر گەلی کورد، گەلانی ئەوروپاش نەورۆز پیرۆز دەکەن، گوتی: "فیکری ڕێبەرێتیمان وایکرد گەلی هەرێمەکە پێکەوە ئەم جەژنە پیرۆز بکەین".
ژنێکی گەنج بە ناوی مەروا فازڵ گوتی: "پێش ئاشنابوون بە فیکری رێبەر ئاپۆ، نەماندەزانی نەورۆز چییە و واتای چییە، بەڵام ئەمڕۆ دەزانین نەورۆز تەنها هی گەلی کورد نیە، بەڵکو هی هەموو گەلانە".
ئەندامی دەسپێشخەریی گەنجانی عەرەب عەزیز حەساو گوتی: "بەهیواین ئەم نەورۆزە ببێتە نەورۆزی ئازادی ڕێبەر ئاپۆ".
ژنێکی دی بەناوی نۆفا شەرابی گوتی: "پێش ناسینی فیکری ڕێبەر ئاپۆ، واتای نەورۆزمان نەدەزانی، بەڵام ئەمڕۆ دەزانین نەورۆز ڕۆژی پێکەوەژیانی و یەکسانییە".
پاش سیمینارەکە هاوڵاتیانی عەرەب هاتنە دەرەوە و ئاگری نەورۆزیان کردەوە.
