دەوڵەتی داگیرکەری تورک لە نزیک سەیدسادقی سەر بە پارێزگای سلێمانی ئۆتۆمبیلێکی کردە ئامانج، بەهۆیەوە دوو ڕۆژنامەنووسی ژنی کۆمپانیای چەتر (گوڵستان تارا و هێرۆ بەهادین) شەهیدبوون.

ئێوارەی ئەمڕۆ بە مەراسیمێکی جەماوەری لە گۆڕستانی قەرەتۆغان لە سنووری سلێمانی بە ئامادەبوونی کەسوکار و و چالاکوانان و هاوخەباتانی شەهید، تەرمی شەهید هێرۆ بەهادین بەخاکسپێردرا.

لە مەراسیمەکەدا بەڕێوەبەری کۆمپانیای چەتر کەمال حەمەڕەزا سەرەخۆشی لە کەسوکار و هاوخەباتانی شەهیدەکان کرد و هێرشەکەی شەرمەزار کرد و گوتی: "ئەم هێرشەی دەوڵەتی تورکی داگیرکەر بۆ سەر ڕاگەیاندنی ئازاد، دەرخەری ئەو ڕاستییەیە کە ڕاگەیاندنی ئازاد بووە بە ئاستەنگێک لەبەردەم جێبەجێکردنی پیلانگێڕیی و داگیرکارییە گڵاوەکانیان، ڕاگەیاندنی ئازاد هەمیشە ڕۆڵی سەرەکیی گێڕاوە لە پوچەڵکردنەوەی ئەو سیاسەتانەی لەسەر گەلەکەمان بەڕێوەدەچن."

کەمال حەمە ڕەزا بەڵێنی دا بە درێژەدان بە ڕێگەی ڕاگەیاندنی ئازاد.

بە درووشمی "شەهید نامرێت" و "هێرۆ نامرێت" تەرمی شەهید هێرۆ بەخاک سپێردرا.