چارەنووسی ئەو تەرمانە دیار نییە، کە لە گۆڕستانی خەرزان دەرهێنراون. بنەماڵەی موزەیەن گۆردەمیر، کە هیچیان لەبارەى چارەنووسى تەرمەکانەوە دەست نەکەوتوە هەڵوێستیان وەرگرتووە. بنەماڵەکە دەڵێن "لەکام ئاییندا ستەمێکی بەم شێوەیە رەوایە".
لە گوندی ئۆلەکای سەر بە تەتوانی بەدلیس، ڕۆژی ١٩ ی کانوونی ساڵی ٢٠١٧ لە گۆڕستانی خەرزان ٢٦٧ تەرم دەرهێنران و چارەنووسی ٢٦٥ تەرمیان نازانرێت و نادیارە. لەو ٢٦٧ تەرمە، کە بۆ پزیشکی دادوەرییان لە ئەستەمبوڵ گواستبوویەوە، تەنها تەرمی هەریەک لە دیلان بنگۆل و جەلال ئۆڤمەن پاش ٦١ ڕۆژ بە بنەماڵەکانیان درانەوە. نازانرێت کە ئەو ٢٦٥ تەرمەکەی تر کەی ڕادەستی بنەماڵەکانیان دەکرێتەوە. بنەماڵەی موزەیەن گۆردەمیر 'بێریڤان' و بنەماڵەکانی تر، بۆئەوەی تەرمی ڕۆڵەکانیان وەربگرنەوە، ڕێگای یاسایی دەگرنە بەر.
'هیچ مانایەکی جەژن نەما'
شوکران سینجار خوشکی گۆردەمیر تیشکی خستە سەر ئەوەی، کە هیچ بنەمایەکی یاسایی و مرۆیی بوونی نییە، بۆیە ئەو هەموو تەرمە لە گۆڕستان دەردەهێنن. بۆ ئەوەی کە تەرمەکانیان وربگرنەوە، تەواوی ڕۆژەکانی مانگی ڕەمەزان دوعایان دەکرد و دەپاڕانەوە.
شوکران وتیشی "بۆ ئێمە جەژن هیچ مانایەکی نەماوە. ئەم جەژنەش بەو بێ ماناییەوە تێپەڕی. داوای من ئەوەبوو، کە جەژنی ڕەمەزان لەسەر گۆڕی خوشکی خۆم بم و دوعا بکەم. بەڵام ئەوە ڕووینەدا. ئێمە نە ئێسک و پروسکیمان بینی و نە توانیشمان بچینە سەر گۆڕستان".
'رەفتاری لەمجۆرە لە کام ئایین و پەرتوکی پیرۆزدا رێگا پێدراوە'
سینجار رایگەیاند، خوشکەکەی ساڵی ١٩٩٣ گیانی لەدەستداوە و وتی "کاتێک کە خوشکەکەم شەهید بوو، ئێمە بە ساڵان نەماندەزانی تەرمەکەی لە کوێیە. پاش ئەوەی گۆڕستانی خەرزان دروست کرا، ئێمە توانیمان تەرمی خوشکەکەمان بدۆزینەوە و گۆڕێک پەیدا بوو، کە ئێمە دوعاى لەسەر بکەین. دەمانویست دوعا لەسەر گۆڕەکەى بخوێنین، بەڵام ڕێگەیان پێنەداین کە لەسەر تەرمەکەی دوعا بخوێنین و هەموو تەرمەکانیان لە گۆڕستانەکە دەرهێنا و بردنیان. کە تەرم دەنێژرێت، دەبێت هەتا هەتایە هەر لەو شوێنەدا بێت. لە هیچ ئایین و پەرتوکێکی پیرۆزدا گۆڕ هەڵنادرێتەوە و تەرم دەرناهێنرێت. کێ بەرپرسە لەم کارە، دەبێت لێپرسینەوەی لەگەڵدا بکرێت و سزا بدرێت".
'ئێمە ئاشتی و ئەوانیش شەڕ دەخوازن'
سینجار جەختی لەوەش کردەوە، کە پاش ئەوەی تەرمی خوشکەکەیان لە گۆڕستانی خەرزان دەرهێناوە، نمونەی خوێنیان لێوەرگیراوە بۆ پشکنینى دى ئێن ئەی و وتی "ئیدی بەسە. ئێمە پیش ٣ مانگ نمونەی خوێنی خۆمانمان دا بە فەرمانگەی پزیشکیی داد. ئێمە نمونەی 'دی ئێن ئەی'مان داوە. ئێمە ئێسک و پروسکی خوشکەکەمان دەوێتەوە. ئێسک و پروسکی خوشکەکەمان لە هەر کوێیەک بێت، دەبێت بیدەنەوە بە ئێمە. دەبێت دەوڵەت ئێسک و پروسکی خۆمان بداتەوە بە خۆمان. ئێمە ئێسک و پروسکی هەموویانمان دەوێتەوە".
لە کۆتایی قسەکانیشیدا سینجار وتی "ئێمە هەمیشە ئاشتیمان ویستووە و ئاشتیشمان دەوێت، بەڵام دەسەڵات بۆ دەسەڵاتدارێتی خۆی ئاگری شەڕ خۆش دەکات. ئێمە بەم ستەمە دەڵێین: ئیدی بەسە".
ر.م
