گروپێک گەنجی ئینتەرناسیۆناڵ ڕوویان کردە باشووری کوردستان تاوەکو خۆیان بکەنە قەڵغانی زیندوو لە دژی داگیرکاریى دەوڵەتی تورکیا بۆ سەر باشووری کوردستان و داواش لە ئازادیخوازانى دونیا دەکەن، بەرامبەر داگیرکەریی تورکیا بۆ سەر باشووری کوردستان بێدەنەگ نەبن.
ئەو گەنجانە ئینتەرناسیۆنالیستانە، کە ڕوویان کردووەتە باشووری کوردستان دەربارەی ئامانجی هاتنیان بۆ ئاژانسی هەواڵی فورات (ANF) قسەیان کرد.
یەک لەو گەنجانە بە ناوی ئەلیسی ئیجا لە وڵاتی فەرنساوە هاتووە و دەڵێت، لە دژی ئەو شەڕ و هێرشەی دەوڵەتی تورکیای داگیرکەر بۆ سەر کوردستان هاتووم بۆ ئێرە، چونکا ئەو هێرشانەی دەوڵەتی تورکیا بۆ سەر کوردستان بە هەموو شێوەیەک ناڕەوا و دڕندانەیە. تورکیا دەیەوێت هەموو خاکی کوردستان داگیر بکات، بۆیە داوا لە هەموو ئازادیخوازانی دونیا دەکەم لەبەرامبەر ئەو هێرشانەدا بێدەنگ نەبن.
ئەلیسی وتیشی، هەر کەسێکی ئازادیخواز و ئینتەرناسیۆنالیست لە هەر شوێنێکى دونیادایە و لە توانایدایە بابێت بۆ کوردستان و هاوکاریی گەلی کورد بکات لە بەرامبەر ئەو داگیرکارییەی دەوڵەتی تورکیا ئەنجامی دەدات.
مەتیس جەمەد یەکێکی ترە لەو گەنجە ئینتەرناسیۆنالیستانە کە لە پاریسەوە هاتووە بۆ کوردستان تاوەکو لە دژی هێرش و داگیرکاریى تورکیا خۆى بکاتە قەڵغانی زیندووە.
مەتیس وتی، من لە ٢٠١٣ و کاتێک سێ ژنە تیكۆشەری کورد ساکینە جانسز و هەڤاڵەکانی شەهید کران گەلی کوردم ناسی. هەروەها لە ٢٠١٥دا هێرشی دەوڵەتى تورکیام بۆ سەر ناوچەی سوور و جزیر لە باکوری کوردستان بینی. لە دواى ئەوەش داگیرکردنى عەفرینم لەلایەن دەوڵەتى تورکیاوە بینی. بەو کارانەش زیاتر و روونتر دڕندەیی دەوڵەتی تورکیام بەرامبەر بە گەلی کرد بۆ دەرکەوت.
وتیشی، ئیستاش هاتوم بۆ باشووری کوردستان بۆ ئەوەی ببمە قەڵغانی زیندوو بۆ گەلی کورد و گەلی کورد بپاررێزم. داواش لە هەموو کەسانی مرۆڤدۆست لەسەرتاسەرى جیهان دەکەم، چییان لە دەست دێت ئەنجامى بدەن بۆ پاراستنی گەلی کورد، چونکە پێویستە ئێمە کورد بە تەنها بەجێنەهێڵێن و پشتیوانییان لێ بکەین.
ر.م
