نوێنەرانی هەرسێ وڵاتەکە لە ئاستانای پایتەختی کازاخستان کۆبوونەوە. لە سەرەتای دەستپێکردنی قەیرانی سوریاوە تائێستا ئەمە ٢٠ دیداری ئاستانایە. سەرجەم دیدار و کۆبوونەوەکانی پێشوو بێ ئەنجام بوون.

دەوڵەتی تورک کە لە قەیرانەکەدا فاکتەری سەرەکیە و لە پێگەی داگیرکەریدایە، یەکەم دیداری ئەمجارەی لە ئاستانا لەگەڵ ئێران ئەنجامدا.

نوێنەری تایبەتی نەتەوەیەکگرتووەکان بۆ کاروباری سوریا گیەر ئۆ پێدێرسۆنیش بەشداری دیدارەکە دەکات. ئوردن، عێراق و لوبنانیش وەک چاودێر شاندیان رەوانەی کۆبوونەوەکانی ئەم گەڕەی ئاستانا کردووە.

لە کۆبوونەوەکاندا کە ماوەی دوو رۆژ بەردەوام دەبن، گۆڕانکارییەکانی ناوچەکە پەیوەست بە دۆخی سوریا و رووداو و پێشهاتە مەیدانییەکان تاوتوێ دەکرێن. رەخساندنی هەلومەرجی گەڕانەوەی ئاوارە و پەنابەران بۆ سوریاش یەک لە خاڵەکانی بەرنامەی کاری کۆبوونەوەکان دەبێت.

پێشبینی دەکرێت لە چوارچێوەی دیدارەکەی ئەمجارەدا جێگرانی وەزیرانی دەرەوەی تورکیا، روسیا، ئێران و سوریا لەپێناو 'ئاساییکردنەوەی' پەیوەندییەکانی نێوان سوریا و تورکیا لەبارەی 'نەخشەرێگاوە' کۆبوونەوەی راوێژکاری چوارقۆڵی سازبکەن.

دەوڵەتی تورک لەئێستا رووبەرێکی بەرفراوانی لە ناوچە سنوورییەکانی باکور و رۆژهەڵاتی سوریای داگیرکردووە. لەو ناوچانە رژێمی تیرۆر و تۆقاندنی دامەزراندووە.

هـ . ب