بە پێشەنگایەتی کۆمەڵەی کولتووری کورد، لە کانتۆنی بێرنی سویسرا، شەهیدانی بەرخۆدانی گەورەی رۆژووی مردنی ١٤ی تەمووز کەمال پیر، خەیری دورموش، عەلی چیچەک و عاکیف یەڵماز، یادیان کرایەوە.

لە سەرەتای مەراسیمەکەدا، محەمەد عەلی خۆجە وتەیەکی پێشکەشکرد و تیایدا هەڵسەنگاندنی بۆ کودەتای ١٢ی ئەیلول و لێکەوتەکانی کرد و ئاماژەی بەوەکرد، بە هەزاران گەنجی کورد بەهۆی کودەتاوە راپێچی زیندان کران.

وتیشی: ئەقڵیەتی کودەتا ویستی چۆکیان پێدابدات، بەڵام ئێمە لەسایەی بەرخودانی هاوڕێ پێشەنگەکانمان، کە شەهیدبوون ئەو هێرشەمان پوچەڵ کردەوە.

خۆجە ئەوەشی خستەڕوو، بۆ پاراستنی ناسنامەی کورد، قوربانی گەورە دراون و رایگەیاند، "پەکەکە چۆکی دانەدا. قوربانی بەخشی و خۆڕاگری کرد. تێکۆشانی ئەمڕۆ لە سایەی ئەو رۆحەوەیە".

لای خۆیەوە عیرفان بابائۆغڵو قسەی کرد و وتی: دەوڵەتی تورک هەرگیز بە بیریدا نەدەهات کە دوای ساڵانی ١٩٥٠، سەرلەنوێ تێکۆشانی کوردستان دەستپێبکاتەوە، وابیریان دەکردەوە کە گەلی کوردیان خستووەتە گۆڕەوە و لە ژێر کۆنکرێتدا هێشتووەتەوە، بەڵام پەکەکە بە رۆحی بەرخودانەوە ئەو کۆنکرێتەی هەڵتەکاند و تێکیشکاند.

بابائۆغڵو روونیشیکردەوە، بۆ ئەوەی بەرخۆدانی پەکەکە لەناو ببەن، پرۆژەی زیندانی ئامەدیان هێنایە ئاراوە و بەم جۆرە بەردەوام بوو: "ویستیان لە رێگەی ستەم و زۆردارییەوە پێشەنگەکان ناچار بە خۆبەدەستەوەدان بکەن و کۆتایی بە تێکۆشان بهێنن. لەو قۆناغەدا کەمال پیر، خەیری دورموش، عەلی چیچەک و عاکیف یەڵماز لە دژی هێڵی خۆبەدەستەوەدان دەستیان بە بەرخۆدان کرد. بڕیاری بەرخۆدانی مانگرتن لە خواردن رۆژی ١٤ی تەمووز لە دادگا راگەیەندرا. لەم رێگەشەوە هەم هەواڵی بەرخۆدانەکە گەیشتە دەرەوە و هەمیش گەیشتە هۆڵەکانی دیکەی زیندان. هۆڵەکانی زیندان پەیوەندییان پێکەوە نەبوو. لە ئامەد نزیکەی ٣ هەزار کەس زیندانی کرابوون. لەگەڵ راگەیاندنی بڕیارەکە جۆش و خرۆش کەوتە ناو زیندان و دەوڵەت دەستەوەستان مایەوە و نەیدەزانی چی بکات".

ژ. ن