ڕابی عەبدولڕەحمان، سەرۆکی ئەنجومەنی مافەکانی مرۆڤ لە سوریا (سوهر) کە ناوەندەکەی لە بەریتانیایە، ڕاگەیەندراوێکی بۆ ئاژانسی فرانس پرێسی بلاوکردەوە و وتی: "لە ئەنجامی هێرشەکانی ئەمریکا بۆ سەر ئەو شوێنانە کە گروپە لایەنگرەکانی ئێران بەکاریان دەهێنن ٩ کەس کوژراوە".

لۆید ئۆستین وەزیری بەرگری ئەمریکا ڕایگەیاند کە، ئەمریکا بۆ وەڵامدانەوەی ئەو هێرشانەی کە لەسەر کارمەندانی ئەمریکا ئەنجامدراوە "مەغزەنێکی چەک و جەبلخانە"ی سەربە ئێرانی لە سوریا، کرد بە ئامانج.

بەرپرسێکی پنتاگۆن لە ڕاگەیەندراوێکدا ڕایگەیاند: "هێزە سەربازییەکانی ئەمریکا هێرشێکیان بۆ سەر ناوچەیەک لە سوریا ئەنجامداوە کە سوپای پاسدارانی ئێران بەکاری دەهێنن، هێرشەکە هێرشێکی پاراستنی بووە".

ئۆستین وتی: ئەم هێرشە لەلایەن ٢ فڕۆکەی جۆری ئێف ١٥ی ئەمریکی لە دژی مەغزەنێکی هەڵگرتنی چەک ئەنجامدراوە.

بەرپرسێکی پنتاگۆن ڕایگەیاند: "هێرشەکە وەڵامێکە بۆ ئەو هێرشانەی کە لە بەرامبەر کارمەندانی ئەمریکا لە عێراق و سوریا ئەنجامدرا بوو".

 سوپای ئەمریکا هێزەکانی ئێران بە بەرپرسی ئەم هێرشانە دەبینێت.

لەگەل دەستپێکردنی شەڕی نێوان ئیسرائیل و حەماس کە لە ٧ی تشرینی یەکەمەوە دەستیپێکردووە، هێرشەکان لەسەر هێزەکانی ئەمریکا لە ناوچەکە زیادی کردووە.