هەرمانگەو تەندروستی شارستانەکێ هەورامانی (پاوە، جوانڕۆ، ڕوانسەر، سەلاس باوەجانی) ئاشکراش کەرد: ۳٥ کەسێ هۆرگێرێ (کۆرۆنا ڤایرۆس)یەنێ و بە ڤایرۆسەکەی ۲ کەسێ گیانشان جەدەستدان.
جە هەرێمو هەورامانی کە چەندین شارێ و شارچێ و سەدان دەگایێ جەوێش مەگێرۆنە، پەتا و نەوەشی (کۆرۆنا ڤایرۆس-کۆڤید ۱۹)ی تەشەنەش کەردەن و پەی ڕاگیریش ڕاوجای تونڎ گیریانەرەوەر.
جەی بارەوە هەرمانگەو تەندروستی شارستانەکێ هەورامانی کە شارستانەکێ (پاوە، جوانڕۆ، ڕوانسەر، سەلاس باوەجانی) جەوێش مەگێرۆنە ئامارێوی نوش سەبارەت بە کۆرۆنا ڤایرۆسی و تووشبیەکێ و قوربانیەکی ڤایرۆسەکەی وەڵاو کەردەنەوە.
جە ئامارەکەنە ئاشکرا کریان: تا ئیسە ۳٥ کەسێ هۆرگێرێ (کۆرۆنا ڤایرۆس)یەنێ و ۲۰شان جە نەوەشخانەکانە بەستەری کریێنێ. هامکات جە پاوە ۱ کەس و جە جوانڕۆ ۱ کەس بەگردی ۲ کەسێ بەنەوەشیەکەی گیانشان جەدەستدان (مەردێنێ).
یاگێ ئاماژەیەنە ئامارەکە تەنها شارستانەکێ هەرێمو هەورامانی کە سەر بە ئوستانو کرمانشان-یەنێ مەگێرۆوە و شارێ و شارچەکێ هەرێمو هەورامانی سەر بە پارێزگاکێ سنە-ی و هەڵەبجەی نمەگێرۆوە.
