هامسەرۊکایەتی دەسەو ڕاوەبەریی کەجەکەی هجوومە وێکوشییەکەو شاروو کرمانوو ئێرانیش شەرمەزار کەرد و واتش، "بە خەمگینیێوە فرەوە، بۊنەو ئا کۊکوشییوە هامخەمیی وێما پەی گەلوو ئێرانی بەر وزمێ".
ئەرەیاونایەکەو هامسەرۊکایەتیی دەسەو ڕاوەبەریی کەجەکەی پێسنەن:
'٣ کانوونوو دووەموو ٢٠٢٤ شاروو کرمانوو ئێرانینە دژوو جەماوەرێوە، کە پەی یادکەرڎەیۊ قاسم سولەیمانیی لوێنێ قەبرسان، هجوومێوە کریا و کۊکوشیی گەورە ڕووەش دا. چا هجوومەنە دەیان کەسێ مەرڎێ و سەدانیچ بریندارێ بیێ. بە نامێ جمیەرەکەیما و گەلەکەیماوە، ئێمە بە ڕێزۊ یادوو ئا کەسا کەرمێوە کە چا کۊکوشییەنە مەرڎێ و سەرەوەشی وەنەو گەلوو ئێرانی، بەتایبەتی بنەیانەو ئا کەسا کەرمێ، مەرڎێنێ و هومێدوو زووخاسبییەیۊ پەی بریندارا موازمێ. ئەوەڵۊ دیار بێ کە هجوومەکە بە مەژگێوە داعشانە کریان و ئیساتێچ ئەرەیاونیا، کە داعشی کەرڎەن. ئا کۊکوشییە بەتندی سەرکۊنە کەرمێ.
گەرەکشابێ جەنگ وەرکەوتوو دلێراسەینە وەڵا بۊوە
ئا هجوومە نەک هەر وەراوەروو گەلاو ئێرانی بێ، بەڵکوم هجووم دژوو تەماموو گەلاو وەرکەوتوو دلێڕاسەی کریا و بەئامانجوو قووڵکەرڎەیۊ جەنگی وەرکەوتوو دلێڕاسەینە بێ. پەوکای ئا هێزێ پەشتەو ئا هجوومیوە کە گەرەکشابێ جەنگ وەرکەوتوو دلێڕاسەینە دژوارتەر بۊ. بڕێ چا هێزا کە حەماس و ئیسرائیلیشا دێ جەنگ وەراوەر مردنێشا، وەلێ ئا ئەنجامە گەرەکشابێ دەسشا نارد. گەرەکشانە جەنگ وەرکەوتوو دلێڕاسەینە زیاتەر قووڵ بۊوە و بەتەمامی هەرێمەکەرە وەڵا بۊوە. پەی ئانەیچ هەوڵەکێشا وستێ هەرمانە. ئا هێزێ گەرەکشانە وەرکەوتوو دلیڕاسەینە جەنگی قووڵتەر کەراوە، زوۊن هەوڵێ مدا کە دەوڵەتوو ئێرانی و ئیسرائیلی و ئەمریکای بدا جەنگ. کەرڎەی ئا هجوومی ئێراننە و هامکاتبییەی چەنی ڕۊو یادکەرڎەیۊ قاسم سولەیمانی و هامڕایەکاش، ئامانج و پلانێوە چانێ وزۊ ڕووە، جە ڕاو ئا هجوومیوە، ڕووەی هەقەتینەو ئا هێزا ئاشکرا بییە، کە وێشا دژوو جەنگی غەززەنە نیشانە مدا.
ئا هێزێ هیزی پەشتەو داعشیوە بێنێ، پاسەشا کەرد داعش هجووم کەرۊ
کەردەی ئی کۊکوشییە لاو داعشیوە ڕاسیی داعشی و هێزەکاو پەشتەو داعشی و ئامانجەکاشا وزۊ ڕووە. ئا هێزی گەرەکشانە جەنگ جە وەرکەوتوو دلیڕاسەینە قووڵ بۊوە، پەشتیوانیی داعشیشا کەرد، ڕەوایەتیشا بە داعشی دا و کەردشا گژێ گەلوو کوردیرە و گەلاو هەرێمەکەیرە. ئیساتێ هەمان هێز پەی هەمان مەبەس پاسەشا کەرد، کە داعش هجووم کەرۊ. هیزی کێ پشتەو داعشیوە بێ، ئارۊ هەمان هێز ئینا پەشتەو داعشیوە و پاسەشا کەرد، کە داعش هجووم کەرۊ. جمیەروو ئازادیی کوردی و گەلوو کوردستانی دژوو فاشیزمی و دڕندەیی داعشی جەنگشا کەرد، داعششا ماڕا و وەرکەوتوو دلێڕاسەی و جیهانیشا جە بەڵای و کارەساتێوە گەورەی ڕزگار کەرد. گەورەتەرین جەنگوو دژ بە داعشی لاو گەلوو کوردی و جمیەروو ئازادیی کوردیوە کریا. پەوکای جمیەرەکەما و و گەلەکەما دژوو داعشی و ئا هێزا کە پەشتەو داعشیوەنێ درێژە بە کۊشیای وێشا مدا، گرد جۊرە هجوومکەردەێوە داعشی وەرپەرچ مداوە. چا هجوومایچنە ڕاستەوخۊ گەل کریا ئامانج و سەدان کەسێ گیانشا جە دەس دا و فرێچ بریندارێ بیێ.
جەنگ دژوو گەلوو کوردی بە ماناو قووڵکەردەیۊ جەنگین وەرکەوتوو دلێڕاسەینە
ئانە کە داعشش کەرد گژێ کوردی و گەلاو وەرکەوتوو دلێڕاسەیرە، دەوڵەتوو تورکی و حکومەتوو تەیب ئەردۊغانی بێ. ئیساتێچ ئانە دەوڵەتوو تورکی و حکومەتەکەو تەیب ئەردۊغانین، کە پشتیوانیی داعشی کەرۊ دەکات و پەی مەبەستوو وێش بەکارش مارۊ. حکومەتوو تورکی و دەسەڵاتداری تەیب ئەردۊغانی گەرەکشانە جەنگوو وەرکەوتوو دلیڕاسەی قووڵتەر کەراوە. پەوکای گرد یاگێونە هجوومێ کەرۊ سەروو کوردی، هجووم کەرۊ سەروو چێرخانوو وەرنیشتی، کە ئی هجوومێ ئا ڕاسییە نیشانە مدا. پەنەوازا گرد کەسێوە ئینەیە بزانۊ و یاوۊشنە. جەنگوو کوردی بە ماناو پەرەداین بە جەنگی وەرکەوتوو دلێڕاسەینە. ئانێ جە وەرکەوتوو دلیراسەینە بەردەوام پلانەو ئاشتی و ناستەی جەنگیشا هەن، مەبۊ دژوو کوردا جەنگ کەرا."
ئاخروو قسەکانە کەجەکە جارێوە تەر کۊکوشیی کرمانیش شەرمەزار کەرد و بە ڕێزۊ ئا خەڵکە کە کۊکوشیەکەنە مەردێنێ یادێ کەردێوە و هومێدوو خاسبییەیۊشا پەی بریندارەکا واست و هامخەمیی وێشا پەی گەلاو ئێرانی بەروست.
