تونجەر باکرحان هامسەرۆکی گردینو هەدەپی وەراوەرو مردنای کارەوانو سەیارەکاشۆ نارەزایەتییش نیشانە دا و واتش: "پێسە چەنی ساڵەو ١٠٧١ خەلەتیایمێ، هەوڵێ مدا هەزار ساڵێ تەرێچ خەڵەتناما".وەلێ ئی جارە دیوارەکانە گیرشا واردەن ".
هامسەرۆکی گردینو پارتو یەکسانی و دیموکراسیی گەلا (هەدەپ) تونجەر باکرحان چوارچوەو سەردایەکاشنە پەی سەرحەدی سەرێ شارو موشیش دا. باکرحان مەنتێقەو مەخدیکو موشینە لاو جەماوەریوە خێرامایش وەنە کریا. وەختوو زیایۆیشەنە شارۆچکەکەنە پۆلیس کارەوانو سایارەکاشا مردنا و هەوڵێشا دێ و شناسنامەکاشا کۆنترۆڵ کەرا. سەروو ئی بابەتەیە پەرلەمانتاراو هەدەپی و جەماوەر کاردانەوەشا نیشانە دا. دماو واتەواچی کاروانوو سەیارەکا درێژەیان بە ڕێکێشا دا. وەختو لوای پەی شارو موشینە واوەی پۆلیسەکێ ڕاشا وەنەو کارەوانو سەیارەکا گێرتە و هەوڵێشا دێ شناسنامەو جەماوەری و ئەنداماو جی بی تی وشکنا. باکرحان و شاندەکەش کاردایۆشا وەراوەروو ئانەیە نیشانە دا و دەسنیشانیشکانشا کەرد، کە تا ئا وەختە کە دمایی پی هەرمانا نێ، سەرەمڕ چالاکیێ کەرا. دماتەر پۆلیس مردنێ و ڕاشا بە کارەوانو سەیارەکا دا، کە بلا پەی یاگێ مەبەستی. دماتەر کاروانو سەیارەکا پیاسێشا شارەنە کەرد و باکرحان و شاندەکەش لوێ پەی هۆڵێوە ئاهەنگو شارەکەی. شاندەکە بە چەپڵێ و دروشمێ خێرامایشا کریا. هۆڵەکەنە پانکارتێ "ژەنێ، ژیوای، ئازادی و ئازادیی پەی ڕابەرایەتی"، " وەرنیشتنە کۆکوشی هەن"، "وەرنیشت شکۆو ئێمەن"، "ئێمە بەگەنجی دەسما پەنە کەرد و بەگەنجیچ سەرێ گنمێ" و "بە ژەنی ژیوای ئازادی بەرەو ئازادی" ڕازیێبێنێوە.
دیدارەکەشنە چەنی خەڵکوو مەنتێقەکەی باکرحان ناڕەزایی وێش بەروست وەراوەرو ڕاگێریەکاو پۆلیسیوە و واتش: "بەداخۆ ئا خاسێ کە ئێمە کەرمێشا بە خراپە جوابما مداوە. تاتەوباباما واچێنێ: 'با یاگێنە ئەرەنیشتێ با و ئەنادۆڵیچەنە ئەرەنیشتێ با، ئی خاکە بەشوو گرد لاێوە کەرۆ' و بەرەو وەڵاتەکەیما ڕووەشارە کریاوەن. وەلێ بەداخۆ ئیساتێ ئێمە دماو ٣-٤ وشکنایا میاومێ وەڵاتوو وێما. بە مەژگوو فاشیستیی وێشا هەوڵێ مدا گاڵتەما پەنە کەرا. وەلێ ئێمە بە ئینسانیەت جوابوو هەرمانەکاشا مدەیمێوە. باوڕ کەردێ وەروو تەرسەو وێشا ئی هەرمانێ کەرا، ئێمە بە ورچنییەی ڕاوبەرایەتی مدەیمێوە ".
باکرحان درێژەو قسەکاشنە واتش: "ئاکەپە دژایەتیی کوردی کەرۆ و گلێرگەی دابەش کەرۆ. هەوڵێ مدۆ گردوو ڕەنگەکاو گلێرگەی دلێنە بەرۆ و پێسە وێش پەنەش کەرۆ. باوڕ کەردێ ئیتر گەل بێزار بییەن و نەعلەتێشا وەنە کەرۆ. شارەوانی و ڕاوەبردەکەیچشا پێسەن عەقڵیەتیشانە. پەی لایەنگێراشا هەرمانە کەرا و گۆش بە خەڵکی مەدا، بەدڵنیاییوە دمایی پی عەقڵیەتەیە مارمێ.
دماو وتارەکەی، باکرحان لوا شارۆچکەو ڤارتینیسی.
