ساڵیادوو مەردەی بامشاد سلێمانخانی، وانیاروو گەنجی ئیلامی، بنەیانەکەش ڕەتش مکەرانێوە، کە وێش کوشتەبۆ و بەڵگەنامە ڕسمییەکا ئاشکرامکەرانێ، کە دلێشانە ئاماژە پانەیە کریان، کە گەنجە کوردەکە ئەشکەنجە دریان.
ی ئایاروو ٢٠٢٣ گەنجێوی ١٩ساڵەو خەڵکوو ئابدانانوو ئیلامی و ئەرەنیشتەو دێهلورانی بە نامێ بامشاد سلێمانخانی، وەختوو وێنیشاندایەکاو سەرەوردای ژەنی، ژیوای، ئازادی-ینە بە شێوەی گوماناوی مەردەن وڕووەدایەکەیچ کاردایوە ئەرەنیشتاو ئابدانانیش وەنە کەوتۆ و وێنیشانەدایەکا و ناڕەزایەتییەکاو ئا شارەینە بڕێ فرێ وێنیشاندەرێ بریندارێ بیێ.
میدیاکاو حکومەتوو ئێرانی وەڵاشا کەردۆ، کە ئا وانیارە ڕاو واردەی دەرمانیوە وێش مرنان.
هاموخت چنی یوەم ساڵیادوو ئا وانیارەیەنە، محەمەد سلێمانخانیی تاتەش، مەراسیمێوەنە سەروو قەبرەو کوڕەکەیشۆ واتش، بە پاو بەڵگەنامەکاو دادگای و ئەنجاموو تۆکاریینە کاسەو سەرەیش و پەراسووێ کوڕەی مەڕینێ و تووشوو ونوەربییەی بییەن، کە دەرەنجاموو دایوەنەی و ئەشکەنجەیا.
جەختیچش کەردۆ، کوڕەکەش هیچ کێشیوی دەروونی و جەستەیی و کەسایەتییش نەبییەن و واتش: "کوڕەکەم تەنیا دووێ خەمێ و پەژارێش بیێنێ، خەموو وەڵاتی و خەموو یاواینەی، ڕەخنەش جە حەرچیێوی بیێ سەرش نویسێ، هەست بە وەرپەرسیی کەرێ و هونەروو ژیوای ئازادانەیش بێ، چا ڕووەوە شانازییش پۆوە مکەروون. ئاد بێدەنگ نەبێ، من بێدەنگ بێنا، سەرنجڕاکێشا کە میدیاکاو دەسەڵاتی واتشا کە چی بێدەنگنا، ئیساتێچ کە دەنگم بەرز کەردەنۆ، سەبای پێسەو تاوانباری مشناسانێم".
جەختیچش کەردۆ، کە هیچم نییا جەدەسیش بدەو، بەڵگێم هەنێ کە مسەلەمناش کوڕەکەم کوشیێنێ و هیچ گومانێوەم چی قسامە نییا".
بامشاد سلێمانخانی پەیدابییەو ٢٠٠٢ وانیاروو بەشوو میکانیکوو زانکۆو ئیلامی بێ، بۆنەو نویستەیە ڕەخنەگێرانەکاشوە تۆڕەکۆمەڵایەتییەکانە چندین جارێ هێزە ئەمنییەکا وەنە پێتۆ و هەڕەشێشا وەنە کەرد.
