فیستیڤاڵوو کولتووری کوردیی پاریسنە بە سەرمەشقایەتیی کۆنسەی دیموکراتیکوو کورداو فەرەنسای (جەدەکە-فە) و کۆمەڵەو کولتوور و هونەروو کوردستانی (ئاجەکە)ی پاریسنە دەسش پەنە کەرد و تا ١و حوزەیرانی بەردەوام مبۆنێ.  

چی حەفتەنە شارەکاو پاریسی و شارەکای تەرینە نموونێو جە فۆلکلۆری دۆڵەمەندوو کوردی نیشانە مدریۆنێ، کولتووری کوردی کە ئینا چێروو هەڕەشانە مشناسیۆ و پەیام مدریۆ دژوو ئاسیمیلاسیۆنی کولتووری.

فیستیڤاڵەکەنە  داوا جە گلێرگەی کوردیی فەرەنسای و بەتایبەتی پاریسی کریا، کولتووروو وێشا بشناسانێ بە گەلای تەری.

فیستڤاڵەکەنە بواری کولتووری هەر چوار پارچەو کوردستانی نیشانە مدریۆ، موازییۆ پەی ئارامی و گەشەپەنەدای و بەختەوەریی گەلوو کوردی فەڕەنسانە، پەی دیالۆگی درێژخواینی و بنیاتنەری بەینوو کوردی و گەلە ئەرەنیشتاو  فەرەنساینە، پێوەندیی پتەوە بکریۆ.

فیستیڤاڵەکەنە بەرنامێوی هەمەڕەنگ پێشکەش مکریۆنێ، پێسەو نمایشی هونەری و کۆنسێرتوو سەرووجادەی و گۆرانییا و نیشانگای هونەری دەسی و واردەی کوردی. هەرپاسە نیشانگاو کێڵێ زارۆڵا ڕێک موزیۆ، فرسەت مڕەخسنیۆ پەی فێربییەی زوانی و مۆسیقای و هوڕپرای کوردی.

فیستیڤاڵەکە بییەن بە نەریتێوی ساڵانە، کورداو دیاسپۆرای و گەلوو فەرەنسای بە جۆشوخرۆشۆ چەمەڕوانییش مکەرانێ. ئارۆ سەعات ١٤:٣٠ بە ڕاپیماێو ناوەندی کولتووریی ئەحمەد کایاینە دەسش پەنە کەرد، دمایی بەڵگەفیلموو "یەک"ی جە بەرئاوردەی ڕۆژدا شیخۆی نیشانە مدریۆنێ و ڕۆی ئەوەڵ بە نمایشوو "پێرکوسیۆن"ی دماییش مێ.

کۆتا ڕۆو فیستیڤاڵەکەینە بەشداریی گرووپوو ئامەدی و چۆپی و دەزا ئامەدی کۆنسێرت ڕێک موزانێ.