جە چوارچێوەو پڕۆسەو "ئاشتی و گلېرگەو دیموکراتیک"ینە کە پەی چارەسەری پرسو کوردی و دیموکراتیزەکەردەی دەسشپنەکەرڎەن، ڕووەدایێوە تاریخی قۆمیا. ڕابەر ئاپۆ پەی جاری دووەمی جە زینانو ئیمراڵیوە پەی ڕای گرڎیی پەیامێوەش وەڵا کەرڎۆ. جە پەیامە ڤیدیۆییەکەو ڕابەر ئاپۆینە بانگەواز کریا کە تورکیا بلۊنە دلې پڕۊسەو دیموکراسیوە. ئینە یووەم پەیامو ڤیدیۆیی ڕابەر ئاپۆی بې جە ماوەو ٢٦ ساڵا گۆشەگیرینە و نەک تەنیا تورکیانە بەڵکم جە جەهانیچەنە، دەنگوەدایې فرەش چنەکۊتۆ.

هاموڵاتیې ئامەدی کە دماو ٢٧ ساڵا وینەرې پەیامو ڤیدیۆیی ڕابەر ئاپۆی بێنې و گۆششا چنە گێرت، قسێشا پەی ئاژانسوو هەواڵو فوراتی (ANF) ی کەردې.

'گەلو کوردی تەنیا داواو ئاشتی مکەرۆ'

سەلاحەدین ئار کە ئەرەنیشتەو شارو ئامەدیا ئەرەیاۋناش کە ئاڎې شایەتې ساتەوەختێوە تاریخی بێنې و واتش: "ڕزگاری ۋەرکۊتوو مېیامینی بە پارادایمو ڕابەر ئاپۆی بەدی مې، ئەر قەرار بۆ ئاشتی پەی ۋەرکۊتوو مېیامینی بې ئاراوە، جە سەیەو مۊچیاریەکا ڕابەر ئاپۆیۆ متاویۆ بەدی بې، ڕزگاری گەلان ئینا چانەینە، ئانەی ڕابەر ئاپۆ ساڵۊو ١٩٩٣واتش، ئارۊیچ هەمان قسێش واوەی کەردۆ. ئانې جەنگشا گەرەکا، پەنەوازا عال بزانا گەلو کوردی تەنیا ئاشتیش مەتڵەبا، گەلو کوردی باوەڕیش بە ڕابەرو ۋێش هەن، حیچ ڕێوەتەرە نیەنە جگە جە ڕێککەوتەی چنی تورکیای، ڕزگاری گەلی بە مۊچیارییەکا ڕابەر ئاپۆی بەدی مې."

'ئێمە باوەڕیما بە ڕابەر ئاپۆی هەن'

سەلاحەدین ئار سەبارەت بە کەیف وەشی ۋێش دماو ئەژنیەی دەنگو ڕابەر ئاپۆی واتش: "نمەتاومې باس جە هەستەکاما بکەرمې، ئی گەلە عەیامېوەن ئینا حەسرەتو ئەژنیەی دەنگ و وینای ڕووخسارو ڕابەر ئاپۆینە، دماو ئازاڎکەردەی ڕابەر ئاپۆی، گەل بە تەمامی ئازادی ۋێش موینۆ، تا ڕابەر ئاپۆ ئازاڎ نەکریۆ، ۋەرکۊتوو مېیامینی ئازاڎ نمەبۆ، ئێمە ئیتر جەنگ و مەردەیما گەرەک نیا، باوەڕیما بە ڕابەر ئاپۆی و پارادایمەکەیش هەن. چونکی ڕابەر ئاپۆ تا ئیساتې پەی گەلو ۋێش و گەلا تەری بەڕاسگۆیی ئەوەکۊشایش کەرڎەن."

'ڕابەر ئاپۆ کۊشش مکەرۆ کە گەلی جە جەنگی ڕزگار بکەرۆ'

هەرپاسە مەجید تورگای واتش: "دماو ئەژنیەی دەنگو ڕابەر ئاپۆی، کەیف وەش بیا، پېسە کوردێوە بەڕاسی دڵوەشەنا، پەیامی ڤیدیۆیی ڕابەریم دماو ٢٦ ساڵا فرە کەیف وەشش کەرڎا، بەڕاسی متاوو واچو هەڵسی ئامې چەمامەرە، چونکی شایەتو ئی ساتە تاریخیە بێنا، پەنەوازا گرڎ کەسێ ئی بانگەوازەیە بەرز بوینۆ. ئارۆ ڕابەر ئاپۆ پېسە پێغەمبەر نوحی هەوڵو ڕزگارکەردەی گەلا مڎۆ. مشۊم عال فام پی مژارییە بکەرمې. هیواڎارەنا دۊڵەتو تورکیای چی بارۆ ڕاسگۆیانە هەنگامە هۊرگێرۆ. پەنەوازا تورکیا دەمودەس جوابو ڕاسگۆییەکا رابەر ئۆجالانی بڎۆوە. هەرپاسە پەنەوازا دەمودەس مافو هیوای جابەجێ بکریۆ. ڕابەرایەتیما گەرەکشا گەلەکەیش و ۋەرکۊتوو مېیامینی جە جەنگی پارېزنۆ."

'پەنەوازا دۆڵەت دەس بە پرۆسەی یاسایی بکەرۆ'

هەرپاسە محەمەد شەنەر جەختش چانەی کەرڎۆ کە ئاڎې هیواشا بە پڕۆسەو ئاشتی فرەتەر بیەن و واتش: "ئێمە باوەڕیما هەن کە چێوې عالې ڕووە مڎا، گرڎ تامەزرۆنمې، گەرەکمانە ئی پرۆسەو جەنگیە کە عەیامێوەن بەردەواما، دمایش بې، پەنەوازا دۆڵەتیچ دەمودەس پرۆسەو یاسایی دەس پنە بکەرۆ."

'ئەژنەوییەو دەنگو ڕابەر ئاپۆی مۆڕاڵو ئێمەش بەرز کەرڎۆ'

یۆتەر جە هاموڵاتیا بەنامې بوراک بەکتاشی، ئەرەیاۋناش کە ئیتر ئی خاکە پەنەوازش بە ئاشتی هەن و واتش: "بە جۆشۆ پێشوازیما جە پەیامەکەو ئېژا ئۆجالانی کەرڎ، ئەژنەویەو دەنگیش بی بە مەڵامەتو بەرزکەردەیۆ مۆڕاڵو گرڎیما، ئێمە گەرەکمانە ئاشتی چی خاکەنە بێنە ئاراوە، پەنەوازا دۊڵەتیچ دەمودەس هەنگامەی خێرا بنیۆ، گەرەکمانە ئی پرۆسە پېسە پرۆسەکا وەڵتەریش سەرەرە نې."