پلاتفۆرموو ڕەنج و دیموکراسیی ڕحای، هجوومو ٨ و ٩ و نیسانوو سەروو بیناو پارتوو یەکسانی و دیموکراسیی گەلا (دەم پارتی)یش بێرەجوکنە شەرمەزار کەرد. ئەرەیاونایەکە وەردەموو بیناو دەم پارتیینە ونیاوە، پێکئامایەکاو پلاتفۆرمەکەی و هامسەرۆکەو شارەوانیی بێریڤان ئیلکایا ماناسە و چندین کەسێ بەشدارێ بێنێ. ئەرەیاونایەکەنە لافیتەو "نا پەی زەوتکەردەی ئیرادەی" و پانکارتوو "ئێمە شکۆو وێما هەنما،  بە مدرامانی گەورێ بیمێ، نمەتەرسمێ، ئینایمێ چێ" بەرزێ کریێوە، قسەکەروو پلاتفۆرمەکەی و هامسەرۆکوو لەقوو ڕحاو سەندیکاو کرێکاراو خزمەتگوزاریی مەدەنی و تەندروسی (سەس) فەرهاد دەمیر قسێش کەردێ.

دەمیر واتش، گەلوو بێرەجوکی ٣١ و  ئادارینە دەم پارتیش ورچنی و داواش کەردە، ڕێز وەنەو  ئیرادەو گەلی بگیریۆ، واتش: "هەوڵێ کەسانێو پەی بۆ دەسملەرەگێرتەی شارەوانییەکەی ڕاو چەکیوە، شەرمەزار مکەرمێ".

دەمیر واتش گرد هەوڵێوی چەکداری پەی دیزاینکەردەیوە ئیرادە و مەیلوو گەلی شەرمەزار مکەرانێ و واتش: "گەرەکمانە گرد لێوە بزانا، ئێمە ئینایمێ چەنی کۆشیای دیموکراتیکوو گەلی".

ئەرەیاونایەکە بە چەپڵەڕێزان دماییش ئاما.