زینڎانیا سیاسی جە ٢٧و تشرینوو دووەمیۆ بە داواکاری "ئازاڎیی پۍ عەبدوڵا ئۆجالانی، چارەسەری سیاسی پۍ پرسوو کوردی" دەسشا بە مانگرتەی جە وارڎەی کەرڎەن. چالاکییەکە ئینا ڕۊو ١١ەمینیەنە. تا ئیسە حیچ هەنگامېوە پۍ  جابەجێکەرڎەی داواکاری زینڎانیا نەنریان. جە ئاژېوە چانەنە سیاسەتوو فشاری و هەڕەشۍ دژوو زینڎانیا دەسش پنەکەرڎەن.

یۆ چا زینڎانیا زینڎانوو ئەرەغلی کە مانیش جە وارڎەی گرتەن، ئیسماعیل چۆبانا. ڤاجیپ چۆبان براو چۆبانی، سەبارەڎ بە هەڵسوکۊتوو ڕاوەبەروو زینڎانی جە ۋەران ۋەروو زینڎانیا مانگرتەینە، واتش:" براکەم جە دماین چەمپنەکۊتەیمانە واتش ،کە ئیدارەو زینڎانەکەی هەڕەشېشا ۋنەکەرڎېنۍ و ماچا 'چێیچ سیستموو ئیمراڵی جابەجێ کەرمۍ، ئازاڎکەردەیتا مردنمۍ"، حەرپاسە فشاری دەروونی وزۆ سەروو زینڎانییەکا و ماچۆ؛ "تا مردۍ چۍ مەندېوە."

هامسەرۆکەو جەمەو هامکاری و پەشتیوانی جە بنەیانەو زینڎانیا و سزادریاکا، ئەرگین ئاڵتونتاشە، ئاشکراش کەرڎ کە بەپاو ئا زانیاریا جە هەمان زینڎانۆ دەسشا کۊتەن، پاشێلکاری ۋەران ۋەر بە زینڎانییەکا کریان.

ئاڵتونتاشە ڕۊشنش کەرڎۆ کە بەردەوام جە زینڎانەکانە مامەڵەی جیاواز دژ بە زینڎانیا سیاسی کریۆ و ماچۆ:"بەتایبەت دماو مانگرتەی جە وارڎەی، مامەڵەی خراپ و هەڕەشۍ زیاڎشا کەرڎەن. بە بنەیانە و هامڕایا زینڎانییە ئازاڎکریاکاشا واتەن کە ئازاڎشا مەکەرا. حەرپاسە زانیاری هەن کە زینڎانیەکۍ وزیانە زینڎانی تاکەکەسیۆ. پېسە نەریتێوە جە دیڎارەکانە زینڎانییەکۍ سڵام جە کەسوکاروو زینڎانییەکا تەریچ کەرا.بەڵام ڕا چینەیچ گېرا."