”حەمزە مەقروزی“ کۆڵبەری نۆدشەیی کە تووشو نەوەشیێوی سەختی بییەن و پنەوازی خێراش بە نەشتەرگەری هەن و پەی ئەنجامدای نەشتەرگەریەکەی پنەوازی بە دەیان ملیۆن تومانێ هەن. بەڵام ”حەمزە مەقروزی“ کە پیشەش کۆڵبەریەن و بەهۆکارو ئانەی کە نەوەشەن و یاگەگیرییەن و بێ دەرامەتەن، توانایی دابینکەردەی ئا بڕە پولێشە نییەن. ئانەیچە ژیوای حەمزەیش وستەن مەتەرسی جددی و ئەگەر بە زوویی نەشتەرگەریەکەش پەی ئەنجام نەدریۆن، تەرسی هەنە گیان جەدەست بدۆنە.

هەر پەوکەی پەی کۆکەردەی ئا بڕە پوڵیە، ناوەندە خێرۆمەندیەکێ ئوفوق جە شارو نۆدشەی و ئەیتام جە شارو پاوەی، دەستبەکارێ بیێنێ و تا بە ئارۆچ زیاتەر جە 227 ملیۆن تومانێشان جە خێرۆمەندێ هەورامانی پەی نەشتەرگەری و چارەسەرکەردەی”حەمزە مەقروزی“ کۆکەردەنەوە.
یاگۍ سەرنجین کە 20 ملیۆن تومانێش ژەنێوێ پاوەیێ بەنامێ خاتوو ”تەلیعە لهۆن“یێ بەخشان کە وێش و خانەوادەکەش جە پاوە و هۆرامانەنە بە خێرۆمەندێ و پەخشای و دەستودڵوازی ئەشناسیێنێ.

جەدمای کۆکەردەی ئا بڕە پوڵیە، بڕیارەن بەزوویی کۆڵبەرە نۆدشەیەکە ڕەوانەو نەوشخانەی بکریۆنە و نەشتەرگەریەکەش پەی ئەنجام بدریۆن و نەوەشیەکەش چارەسەر بکریۆنە.

دەسەڵاتداری کۆمارو ئیسلامی ئێرانی کە جە چارەسەرکەردەی و نەشتەرگەری و ژیوای ”حەمزە مەقروزی“ کۆڵبەری نۆدشەیی  ئەرکدار و وەرپەرسیارەن، ئا ئەرک و وەرپەرسیاریەتییەیە بەگا ناوردەن و هیچ هامکاری و ئاسانکاریێوش پەی نامبریای نەکەردەن.

ناوەندە خێرۆمەندیەکێ ئوفوقی و ئەیتامی داواکارێنێ هەرکەس و لایێ وازیارەن هامکاری دارایی ئا کۆڵبەریە بکەرۆنە، با هامکاریەکەیش بکیانۆن پەی ئی ژمارە حساب بانکیا چێری:
 
شماره حساب مرکز نیکوکاری افق نودشه:
۰۱۱۰۱۷۰۴۵۵۰۰۶

شماره کارت مرکز نیکوکاری افق نودشه:
۶۰۳۷۹۹۱۸۹۹۵۳۴۴۵۱

ساڵێ ویەدێ (2020)، جە وەرکەوتو کوردستانی ٥٨ کۆڵبەرێ و کاسبکارێ کوردێ بە گوللێ هێزە چەکدارەکێ ئێرانی کوشیێنێ، ١٢ کۆڵبەرێ تەرێ بە ڤییەرێ چوون، کەوتەرەی جە بەزایی، سەردی هەوای و هەرەسەو ڤەرڤێ و تەقای مینی گیانشانشان جەدەستدان کە یەرێشان زارۆڵێ بیێنێ کە تەمەن و نامەکێشان بە ئی جۆرەنە:
فەرهادی خەسرەوی، تەمەن ١٤ ساڵان
ئیسماعیل ساوجی نەژاد، تەمەن ١٦ ساڵان
 ئازاد خەسرەوی، تەمەن ١٧ ساڵان