بەپاو هەواڵو تۆرەو مافەکا مرۆڤو کوردەسانی ڕۆو چوارشەمەی یەرێ زینانیێ بە نامەکا موحسین مورادی، جەعفەر رەستگاری و حەمزە تەرکاشوەندی کە خەڵکو پارێزگاکا لوڕستانی و کرماشانی بێنێ جە زینانەکا قزلحیساری کەرەجینە جە قەنارە دریێنێ.

ئا یەرە زینانیێ بەتۆمەتو بازرگانی بە ماددەی هۆشبەریۆ ئا سزێشا سەرەرە سەپیێنە.

بەپاو هەواڵێوە رێکوزیاو مافەکا مرۆڤو ئێرانی ئارۆ و هیزی لاوکەمیۆ ٥ کەسێ جە زینانەکا یاسوج، جیرۆفت، زاهیدان، قەزوینی و قزلحیسارینە جەقەنارە دریێنێ، کە تۆمەتو کوشتەی و مادەی هۆشبەریشا رووبەڕوو کریا بێوە.

ماوەو دووێ ساڵان جابەجێکەردەی سزاو جەقەنارەدای ئێرانەنە زیاڎش کەردەن، بەتایبەتی دماو سەرهۆرداو 'ژەنی، ژیوای، ئازادی' جابەجێکەردەو ئا سزایۍ زیاڎش کەردەن و ئینەیچ بە هەوڵێوە دەسەڵاتی پەی چەمتەرسنای کەردەی گلێرکەی جە یۆی مڎریۆوە.

پێسە ڕێکوزیاو مافو مرۆو ئێرانی وەڵاش کەردەبێوە، جە ساڵەو ٢٠٢٣ ێنە لاو کەمیۆ ٨٣٤ کەسێ جەقەنارە دریێنی، ئینەیچ مقارنە بە ساڵۆو ٢٠٢٢ کە ژمارەو جابەجێکەردەی سزاکۍ ٥٨٢ حاڵەتۍ بۍ بە رێژەو سەڎەنە ٤٣ بەرزبیەیۆیش پۆوە  دیارا.