سکرتێرو نەتەوەیی یۆبیەی پارتیزانا ئیتالیای فابریزیۆ دی سانکتیس ئەرەیاوناش، پەی ئانەی ڕابەر ئاپۆ بتاوۆنە جە چارەسەری پەرسو کوردینە دەورو وێش گێڵنۆ مشۆم ئازاد بکریۆنە و بتاوۆنە چنی هەمڕایاو، ئەنداما پارتەکەیش و گەلەکەیش جە گفتوکۆنە بۆ.
یۆجە پەشتیوانا هەڵمەتەو 'ئازادی پەی عەبدوڵا ئۆجالانی، چارەسەری پەی پەرسو کوردی' سکرتێرو نەتەوەیی یۆبیەو پارتیزانا ئیتالیای (ANPI) کە سەڎان هەزار ئەندامێش هەنێ، فابریزیۆ دی سانکتیس جەبارەو گۆشەگیری ئیمراڵی و پێشئامایەکا ئی دماییە جوابو پرسیارەکا ئاژانسوو هەواڵوو فوراتی (ANF)یش دێوە.
ئەنجامدای دیڎاری جە ئیمراڵینە فرە ئەرێنیا
سکرتێرو نەتەوەیی یۆبیەو پارتیزانا ئیتالیای (ANPI) فابریزیۆ دی سانکتیس ئانەش وست ڕووە کە دیڎار جە ئیمراڵینە فرە ئەرێنییا، بەڵام وەسێ نییا و گێرتەی ڕابەر ئاپۆی بە ماناو گێرتەی تەمامو گەلو کوردین و بەردەوامی ئی ئاژەیە پێسەو کۆسپێوەن وەردەمو ئازادی سیاسی کوردینە.
بە بێ ڕابەر ئاپۆی پەرسو کوردی چارەسەر نمەبۆ
دی سانکتیس ئانەش وست ڕووە کە ڕابەر ئاپۆ دلێ چارەسەرو پەرسو کوردینە نەبۆ، ئا پەرسە چارەسەرە نمەبۆ و ئەرەیاوناش: "بە پەیلواو من ئا دیڎارەو ئی دماییە متاوۆنە دەرچێوە گولانە بۆ پەی چارەسەری ئاشتیانەو پەرسو کوردی تورکیانە. پەی چارەسەری پەرسو کوردی دەرفەتێوە گۆرە ئینا ئارانە، جە ئاژێوە چیمنەنە واوەی قەڎەغەکەردەیۆ دیڎاری چنی ئۆجالانی ئاژێوە فرە جددییا. ڕۆشنا کەجە چوارچێوەو رێکارێوە تازەو گۆشەگیرینە ئا بڕیارە دریان و پەی چن مانگێ قەڎەغەو دیڎاری درێژکریانۆ. دوور وستەیۆ یەرە سەرۆک شارەوانیە هۆرچنریەکایچ هەر ئینا چا چوارچێوەنە".
پەنەوازیش بە ئازایەتی و غیرەتۍ سیاسی هەن
سکرتێرو نەتەوەیی ANPI فابریزیۆ دی سانکتیس ئەرەیاوناش، کە ڕابەر ئاپۆ جە پەیامەکەشەنە پەی راو گردینی بە ڕۆشنی نیشانەش دابێ کە لایەنگرو چارەسەری و سیاسی پەرسو کوردین و لایەنگرو ئاشتین و مشۆم ڕاش پنەبڎریۆ دەوری سیاسی وێش گێڵنۆ. "مشۆم پەی گفتوگۆی سەرو هەلومەرجو چارەسەری و ڕەئیەی سیاسی و ئاشتیانەکا پەرسو کوردی خوڵقەش بکەرا پەی پەرلەمانی. رووبەڕووبییەیۆ ئی ئاژە سیاسیە و گفتو گۆ چنی ئێژا ئۆجالانی کە نوێنەرایەتی ملیۆنان مرۆڤا مکەرۆ، پەنەوازیش بە ئازایەتی هەن".
پەی چارەسەری مشۆم ئازاد بکریۆ
دی سانکتیس ئانەیچش وست ڕووە کە پەی ئانەی ڕابەر ئاپۆ جە چارەسەری پەرسو کوردینە بتاوۆ دەورو ۋێش گێڵنۆ، مشۆم بە شێوۍ جەسەیی ئازاد بکریۆنە و واتش، "ئۆجالان مشۆم پێسەو مرۆڤێوە ئازادی بتاوۆنە قسێ بکەرۆ. بتاوۆنە بە شێوێوە ئازاد گفتوگۆ چنی هامڕایاشو، ئەنداما پارتەکەیش و گەلەکەیش ئەنجام بڎۆنە. پەی ئانەی بتاوۆ بەپاو پێگەی سیاسی وێش گفتوگۆ ئەنجام بڎۆنە، مشۆم گرد کەرەسە و ئامرازێوەش وەردەسەنە بۆ. پەی ئانەی بتاوۆنە دەوری حەقەتینی سیاسی گێڵنۆنە مشۆم ئازاد بکریۆ".
