کەجەکە جە ساڵڕۆو گەشمەرڎە بییەو سەید ڕەزای و هەمڕاکاشەنە کە جە ١٥و تشرینو دووەمو ١٩٣٧ی جە قەنارە دریێ ئەرەیاونێوەش وەڵا کەردۆ. کەجەکە دەستنیشانش کەرد کە پیر سەید ڕەزا بە سەرە-نەنامنایشەرە جە وەرا وەرو دژمنینە، میراتێوە مڎرامانش پەی مرۆڤایەتی و گردو گەلا چێردەسی، بە تایبەتی پەی گەلو کوردی جیائاست و ئەرەیاوناش: "ئامانجی سەرەکیما ئانەن ئی یاڎکەردەیۆ بە گرنگییۆ جابەجا بکەرمێ و ئازادی پەی گەلەکەیما بارمێنە. قەولما واوەی مکەرمێوە کە بیاومێ ئی ئامانجیە و وەڵێ یاڎکەردەیۆ و ئەرەکۆشای بە شکۆو سەید ڕەزاینە بە ڕێزۆ سەرەما منامنمێرە."

ئەرەیاوناکەو کەجەکەی پی جۆرەنە:

"نزیکۍ بیمێ جە ساڵڕۆو قەنارەدای سەرمەشقو مدرامانو دێرسیمی سەید ڕەزای. یاڎو سەید ڕەزای و هامڕایاش کە چنی ئاڎی جەقەنارەدریێ بەرزڕاگێرمێ. جە کەسایەتی ئاڎیشانە بە ڕێزۆ یاڎو ئانیشا  مکەرمێوە کە جە کۆمکوژی دێرسیمینە گەشمەرڎێ بیێ و ئاوەزیەتو قڕکەردەی شەرمەزار مکەرمێ. تەئکیدش مکەرمێوە کە ئەرەکۆشاو گەلەکەیما ۋنە پەرسایۆ جە گردوو کۆمکوژییەکا مکەرۆوە.

کۆمکوژی دێرسیمی یۆن جە کۆمکوژییە هەرە وەحشیانەکا تاریخو مرۆڤایەتی. ئێشێ گۆرەش دا بە گەلەکەیما، دڵو گەلەکەیماش عەزیەت کەردەن. بە دەیان هەزار مرۆڤێ بە گولـۍ، بۆمب واران و گازی کیمیاویی کوشیێنۍ. ئا مەلۆتکۍ کە هەڵای نامێنێنۍ دنیاوە جە لەمەو ئەشێشانە کوشیۍ و ئانێچ زیڼۍ بێنۍ هەر بە زیڼەیی کوشیێ. دەرەو مونزوری بە ۋنەو ئاڎیشا سووربیی. وەرو ئینەی جە کۆمکوژی دێرسیمینە جە عەزییەتو گەلوو کوردەسانینە بی بە مەڵامەتو عەزییەتی و توڕەیێ گۆرەی. کۆمکوژی دێرسیمی جە ویر و یاڎەوەری گەلوو کوردینە چەسپیان و حیچ وەختۍ جە ویر مەشۆوە.

بێگومان کۆمکوژی دێرسیمی جە چوارچێوەو کۆمکوژی کوردانە ئەنجام دریابێ. دۆڵەتو تورکی کە ئاوەزیەت و سیاسەتو کۆلۆنیالی قڕکەری ڕاوەبەر مکەرۆ، پەی دلێنە بەردەو گەلو کوردی بە دەیان کۆمکوژیێش ئەنجام دێنێ. بەڵام داخەم نمەشۆ مرۆڤ متاۆنە واچۆ کۆمکوژی دێرسیمی جەگردیشا قورستەر بۍ. کۆمکوژی دێرسیمی، دژمنداری دۆڵەتو تورکیش جە دژو گەلو کوردی و تاریکایەتی ئی ئاوەزیەتەیە فرە بە ڕۆشنی نیشانەدا. پۆکەی، سەرو گردیۆ کۆمکوژی دێرسیمی، مرۆڤ نمەتاۆنە بە بێ قبوڵکەردەی و ڕوبەروبییەیۆ کۆمکوژی و قڕکەردەی سەرو گەلوو کوردی و گەلا تەری، وانایۆیۍ درووسو تاریخی بکەرۆ. دیسان ئینا وەڵێ گردو کۆمکوژیەکاوە دێرسیم، تا وەنەپەرسایۆ گردو کۆمکوژییەکا جە وەرپەرسا کۆمکوژییەکا نەکەرمێوە، نمەتاومۍ ئا ئەرکە تاریخییەو سەرو شاناما جابەجێ بکەرمێنە، بیمۍ بە خاوەنو حەقیقەتی و بە ڕاسی بژیومۍ. بێگومان ئەرەکۆشای ئازادی کوردەسانی بە پەرەپنەدای بە هۆشمەندی ئازادی، بە ماڕای هۆشمەندی قڕکەری و چەوەسنەری و بە ڕزگارکەردەی گەلوو کوردەسانی ئی ئەرکە تاریخییە جابەجا مکەرۆ و ۋنەپەرسایۆ جە وەرپرسیارا کۆمکوژییەکەی مکەرۆوە. ئەرەکۆشایما سەرو بنەماو ئازادی کوردەسانی و دیموکراتیکبییەی تورکیای و وەرکەوتو مېیامینی وەڵێ گنۆ و پەشتیش هێقمەنە بە ژیوای هامبەشی و یەکسانی گەلا، هۆشمەڼی قڕکەر، کۆلۆنیالی و قڕکەری ڕێخەنە مارۆ و سەر جەنۆ ئازادی منویسۆوە.

واوەی هۆشمەڼی قڕکەر، کۆلۆنیالی و قڕکەری شەرمەزار مکەرمێ و جە کەسایەتی پیر سەید رەزای و هەمڕایاشەنە گردو گەشمەردا شۆڕشی و دیموکراسی بە پنەزانای و ڕێزۆ یاڎۍ مکەرمێوە. پیر سەید ڕەزا بە سەرە-نەکۆمنایشەرە جە وەرا وەرو دژمنینە، میراتێوە مڎرامانیش وەڵێ گرڎ چێوێنە پەی گەلو وکوردی، پەی مرۆڤایەتی و گردو گەلا چێردەسی جیائاست. مەرامی سەرەکیما ئانەن ئی یاڎکەردەیۆ بە گرنگیۆ جابەجاکەرمێ و ئازادی پەی گەلەکەیما بارمێنە. قەولما واوەی مکەرمێوە؛ بیاومێ پی ئامانجیە و ۋەردەمو یاڎکەردەیۆ و ئەرەکۆشای بە شکۆو سەید ڕەزاینە بە ڕێزۆ سەرەما منامنمێراوە."